وەغەرا خالێ ناجی، جڤاک یان تەخسیرییا کەرتێ تەندروستی... مخابن!!

2 مانگ پێش ئێستا

نزار پیرۆ
لدەسپێکێ دبێژم، وەغەر خێربیت، ژبەرکو ل دوو ڕۆژێن بوریدا، رویدانا وەغەرکرنا (ناجی بالەتەیی) کو دبیتە بابێ بەرلەمانتارێ کورد لبەغدا (ئارام بالەتەیی)، ئەوێ ئەڤە نزیکی دوو هەیڤانە ب نەخۆشییا کورۆنایێ کەتی و رەوشا وی، نەیا جێگیربو و هیڤی و دوعا دکەین کو بسلامەتی ژێ دەربازبیت و خودێ سەبرو هەدارێ بدەت کەس و کارێن وان .

ئەو رویدانا کو باژێرێ دهۆکێ  ب تایبەت و  دەوروبەرا و هەرێما کوردستانێ ب جارەکێ غەمبارکری و کارڤەدانێن ڤێ رویدانا مەزن، کو  ناخێ خەلکی هەژاندی و خەلک پێ داخباربووی ئەوبوو، ئەو سوزداری و ڤیانا دناڤبەرا کورو بابەکی دابۆ ژلایەکی، و ژلایێ دی، بێ ئومێدییا وی بابی بوو، کو ددیت ڕۆژ بۆ ڕۆژێ کورێ وی یێ تاقانە ئەوێ هێشتا دژییەکێ بچویکدا ب نڤیسینێن خۆ، کو ئاستێ وان نڤیسینا گەلەل لژیێ وی مەزنتربوون و بوان ئاستێن خۆ یێن خوێندنێ ئەوێن دەربازکرین ل ناڤخۆ و لدەرڤەی کوردستانێ و هەتا خوێندنا خۆ یا بلند بدوماهیێ ئینا  و هێشتا دژییەکێ بچووکدا، پلا دکتورایێ  بدەستخۆڤە ئینای، و لدیڤدا بویە بەرلەمانتار ل پەرلەمانێ عێراقێ، ئەو کور لپێش چاڤێن وی بابێ دل سۆتی، وەکو گولەکا گەش گاڤا د وەرییێت و هیڤییێن وی لێ دکەتە حەسرەت.

ئەڤ بارێ دەرونیێ مەزن، ئەز باوەرناکەم کو مڕۆڤەک هەبێت بشێت بەرگرییا وێ بکەت، ئەوبوو ئەو رویدانا دل تەزین بدویڤ خورائینا و بۆو ئەگەرا وێ چەندێ، کو خالێ ناجی روحا خۆ  دانیتە سەر روحا کورێ خۆ یێ تاقانە، لداوییێ، دبێژم،  مخابن،  ژبەرکو دەرفەت هەبوو ئو  چێدبوو کو رێرەوا رویدانا هاتبا گهۆرین و برەنگەکێ دی رێ لڤێ رویدان دلتەزین هاتباگرتن، گەر هنەک کارو پێداویستیێن پێدڤی ژبو حالەتێن بڤی رەنگی، هاتبان ئەنجامدان.

لڤێرە خالەکە گرنگ هەیە ئەوژی حالێ دەرونی یێ نەخۆشی و یێن کەسێن عەزیز و نێزیکی نەخۆشی نە، کو ئەو ئەرک، ئەرکێ سێکتۆرێ تەندروستی یێ گشتییە و کا وان چ کرییە دڤێ وارێدا و چەند بایەخ  و پویتەدان دایە وی چەندێ.

د جفاکا مە کوردا دا، خەلکەک  وەکو  عاقلدار  یان کەسێن دیار دناڤ جڤاکیدا،  ب خۆبەخش، وی کاری ئەنجامددەن و نمونێن وان کەسان دیارن و  بتایبەت لدهۆکێ کو سەرەدانا کەسێن لێقەومی و  خودی موسیبەت دکەن، کو دروەشەک دەروونی خرابدانە و بۆ وان دئاخڤن و دلەی دلێ وان دەدەن و ئەو کار کارەکە پیرۆزە، ئەو دکەن و جهێ دەستخۆشیێ نە، بەلێ ئەو نەشێن جهێ پسپورێن دەروون ناسیدا کاردکەن  بگرن، کو بزانستی سەرەدەریێ دگەل حالەتێن هۆسادا دکەن.

ئەز نزانم هەتا چەند نەخۆشخانە و بنگەهێن تەندروستی لکوردستانێ کەسێن دەرون ناس و پسپورێن دڤی واریدا کاردکەن هەنە،  کو کارێ وان نە چارەسەرکرنا وان کەسا بیت، ئەوێن نەخۆشییێن دەرونی هەین، بەلکو بتنێ کارێ وان  ئەوبیت، چاڤدێرییا نەخۆش و کەسوکارێن نەخۆشا بکەن و سەرەدەریێ دگەل رەوشا دەرونییا وان بکەن، گەر هات و درەوشەکا دەرونییا خرابدابن، و  دەستێ هاریکاریی پێشکێشی وان بکەن ، ژبەرکو ئەڤ جورێن سەرەدەریا پسپورێن دەروناس، دگەل نەخۆش و کەسوکارێن وان نەخۆشێن نەخۆشییێن گران هەین، دا دکەن، لهەمی نەخۆشخانە و بنگەهێن تەندروستیێن زوربەی وەڵاتێن جیهانێدا یێت هەین. و زێدەتر رێڤەبەرییا نەخۆشخانا گرێبەستان دگەل کەسێن ئایینی دا دکەن، د هەمی ئۆل مەزهەباندا، کو گەر پێتڤی بوو، پرس ژ نەخۆش ی و کەس و کارێن نەخۆشی دهێت کرن گەر ئەو بخازن، ئەو ڤی کاری بو وان بێ بەرامبەر  بکەن و ئەڤ کەسایەتیێن ئایینێ  بهێن و دلێ وان ئارامکەن .


خالەکا دی یا فەر  ئەوە،  کو دختورێن دەروونی یان نورینگەهێن دەروونی دڤێت وەکو سەکتۆرێن دی یێن تەندروستی پویتە پێ بهێتەدان و وەکو بەشێ هەرە زۆرێ دەولەتێن جیهانێ و هنەک  وەڵاتێن دەوروبەری کوردستانێ، نورینگەهێن تایبەت بن و بێ بەرامبەربن و سەر بدەولەتێ و ئیدارییا وان دەڤەرانڤەبن  و ئامادەبن، کو دخزمەتا وان کەساندابن کو ئاریشێن دەروونی هەین یان دروەشێن نەئاسایی یێن دەروونیدا بن.