ماددەیێن بێ هوشکەر دێ مە ژناڤ بەن؟!

2 مانگ پێش ئێستا

كەریم حەسەن
مێژوو ڤێ چەندێ بۆ مە دسەلمینیت، د بەردەوامیا ژیانێ دا کوردستان ب گشتی و باشورێ کوردستانێ ب تایبەتی دبن هەرەشێن دۆژمن و وەلاتێن داگیرکەر و جیران دایە، هەر جار و ب رەنگەکێ راستەوخو و نەراستەو پیلانێن ژناڤبرنا کوردان دهێنە دارشتن و کار لسەر وێ یەکێ دهێتە کرن، کا چەوا ڤێ ئاخێ داگیربکەن و خێروبێرا ڤی وەلاتی تالان و وێران بکەن، لێ هەرەشەیا ئەڤجارە یا جیاوازە و کوشتن و ژناڤبرنەکا هێدی هێدی یە.

هەرەشەیا ئەڤجارە ئینان و بازرگانیکرن و بکارئینانا مادەیێن بێ هوشکەرە ب رەنگەکێ نەراستەوخو، هەروەکو دیار دڤان چەند سالێن دوماهیێ دا ب رەنگەکێ دیار بازرگانیکرن ب ڤان جورە ماددەیان زور بویە، دهێتە زانین تارادەیەکێ بەرچاڤ بکارهێنەرێن بێهوشکەران زێدەبوینە و پتریا وان ژی گەنجن ژ هەردوو رەگەزانە.

گەنج دینەمویا پاراستن و پێشکەفتن و راگرتنا هەمی مللەت و مەزهەب و وەلاتانە، هەر دەما گەنجی روو ل خرابیێ کر، ئەو وەلاتە یان مەزهەبە لاوازدبیت و ڕەنگە ببیتە ئەگەرێ ژناڤچوونێ.

هەروەسا چو جڤاک و مللەت و هەردیسان مەزهەبان رێک نەدایە ئەڤ جورە مادەیە بهێنە ب کارئینان و خودایێ مەزن ژی ئەڤ ماددەیە لسەر مرۆڤان حەرام کریە، ژبەر خرابیا وی و ژناڤچوونا ژیانێ.

زێدەبوونا ڤان جورە ماددەیێن زیان بەخش بۆ گەلەک ئەگەرا دزڤریت، ژوانا هاتن و چون و پەیوەندیا خەلکەکێ دگەل وەلاتێن جیران بتایبەتی وان وەلاتێن ب درێژیا مێژوویێ دوژمن، هەردیسان تارادەیەکێ خالێن سنوری د لاوازن، رێکخراوێن جڤاکا سڤیل کێم تەرخەمن، رەوشەنبیریەکا گشتی ل دەف گەنجی کێمە، بێ کاری ژی ئێک ژوان رێکایە گەنج روو ل خرابیێ بکەتن.

لەورا پێتڤیە ب بەرنامەیێن دارشتی ژلایێ حکومەت و ڕێکخراوێن جڤاکا سڤیل و پارتێن سیاسی و هەمی جهەتێن پەیوەندیدار و هەمی تاکێن ڤی وەلاتی هەر ئێک و ب رێکا خو و ژلایێ خوڤە کار لسەر وێ یەکێ بکەن و رێکێ ل ئینان و بازرگانیکرنێ و بکارئینانێ بگرن، هەردیسان بەردەوام گەنجێن ڤی وەلاتی بهێنە فێرکرن لسەر خو پاراستنێ و ئاگەهداربوون ژ خرابیا ڤان جورە ماددەیان، داکو دوژمنێ مە ئەڤ جارەژی وەکی جارێن دی بەرامبەر مە بشکێت.