بەلێ ژبۆ ڕەخنەکا دژوار!

جاسم محمد شرنەخى
من و هەڤالەکێ خوە هەڤپەیڤینەکا نەرم و تەبایى ل دۆر ڕەخنەگرتنێ و رۆلێ وێ یێ گرنگ دکر، وەکو تۆربینەکا - بڤێ نەڤێ-  ژبۆ پەیداکرنا هەر وزیەکا پێشکەفتنەکێ ل هەر دەم و جهەکێ هەبت، لێ ژ ئاخفتنێن ویێن هەژى گوهداریکرن و بهادانێ ئەوبوو دەمێ خوەیاکرى: (فەرە زمانێ ڕەخنا نها ئەم ل میدیا و سۆشیاڵ میدیایێ دبینن، ژزڤراتى و هەوارهەوارێ بەرەڤ نەرماتى و نازکیێ بهێتە گوهوڕین، چونکى ڕەخنە گیانێ چاکسازیێ یە، و ڤەگوهاستنا خەلکەکێ دەستنیشانکریە، ژ بەراڤا خەلەتى و خرابیێ ژبۆ بەراڤا باشى و چاکیێ و تا ئەڤ ئارمانجە ب جهبێت، د ڤیا پرەکا ڤێکڕا گەهشتنێ – تەواصلێ – هەبیت ژ پێخەمەت دەربازبوونێ ژوى لایى و بۆ لایێ دیترێ بەرامبەر و ئەگەر نەرماتى و زمانێ دیالوکێ نەبت، ئەو پرا ناڤبرى پەیدا نابت یانژى ئەگەر هەبیت دێ ژناڤ چتن. ئەڤە نیڤشکێ هزرا هەڤالى بوو، من ب پەیڤێن خوە ڤەهاند و بۆ خوەندەڤانێن هێژا ڤەگوهاست.

هەر چەندە گۆتنا خۆشکوک و نازک بنیاتە و دڤیا ئەو هێلا پەحن و سەرەکى بت، هەر وەکى شێوازێ گەهاندنا پەیامێت تەڤایا پێغەمبەرێن خۆدێ سڵاڤ ل هەمیان بن، دا ب دلێن نەرم گوهێن خوە ڤەکین، ژبۆ دەنگێ پیرۆزێ ئەبەدى و سەرمەدیێ خودا دەمێ دبێژتە هەردوو پێغەمبەران، موسا و هارۆنى: "فَقُولَا لَهُ قَوْلًا لَّيِّنًا لَّعَلَّهُ يَتَذَكَّرُ أَوْ يَخْشَىٰ"- ئانکو دەمێ هوین دچنە دیوانا فیرعەونێ ئاخفتنەکا نەرم بێژنێ، گەرەکە هوشێ وى بێنە سەرێ وى یانژى ترسا خوداى ب کەفتە د دلێ ویدا.

 ڕاستە لێ ئەگەر ئەم ئەم بەرێ خوە بدین ئاڕاستەیا گۆتارا چاکسازى و ڕەخنێ ل وێ دەمى ژى ل هەمبەر خرابکاریێ وەکى خوە نەمایە، کێلفێ وێ زۆر جاران بلندبوویە تا گەهشتیە نەفرەتلێکرنێ ئەوا بیست و هەشت جاران د قورئانا پیرۆزدا ل هەمبەر زاڵم و دکتاتۆر و زڤردەستان دۆبارەبووى، مینا گۆتنا خۆداى: " وَاللّهُ لاَ يَهْدِي الْقَوْمَ الظَّالِمِينَ أُوْلَئِكَ جَزَآؤُهُمْ أَنَّ عَلَيْهِمْ لَعْنَةَ اللّهِ وَالْمَلآئِكَةِ وَالنَّاسِ أَجْمَعِينَ ". ئانكو خودێ ستەمکاران ڕاستەرێ ناکتن، سزایێ وان ئەوە نەفرەتێن خوداى و فریشتە و مرۆڤایەتیێ هەمیێ ل زالمان بت و پاشان گەهشتیە گوپیتکا ڕەتکرن و شۆرەش و هەلوەشاندنا تەختێن زۆرداران.

ژبەرکو ئەگەر ب هیڤیا ئاخفتنا نەرم و نازک بتنێ با موستەحیل بوو، ئەو هێز و توندیا ستەمکارى و خرابیێ هەلوەریابا و ژناڤچووبا، تشتەکێ لوژیکیە ڕەخنێ دوو ئاست هەبن، زۆر ژ نەرماتیێ بەرەڤ دژواریێ بچتن:

ـ ل دەستپێکێ دڤێت ڕەخنە ب شێوازێ میانڕەو  بکاربهێت، دا بیاڤ هەبت هۆش و دل گوتارا چاکسازیێ د کەناڵێ ڕەخنەگرتنێدا وەرگرن، یانژى بێژین: ئەوێن ب ڤێن چاڤێن خوە ژ حەقى و ڕاستیێ نا نەقینن ب بینن، باشە لێ ئەگەر رێگرى ل گوهوداریکرن و دیتنێ ب زۆرى هاتەکرن، و گوهێن گەندەڵکار و خرابا سمتى بن، ما نە دڤێت گێچێ ڕەخنێ ژبۆ ئاستێ دوویێ بلند ببیت؟!

ـ یادیتر، دڤێت ڕەخنە ل ئاستێ قەبارە و دژواریا خرابکارى و ستەم و گەندەڵیێ بتن، واتە مەعقول و مەقبول و مفا تێدا نینە ئەو ڕەخنا مرۆڤ ل حوکمڕانەکێ یانژى سیاسەتمەدارەکێ د ئیجیتهادەکا سیاسیدا خەلەتیەک هەبت و ئەڤە تشتەکێ نێزیک و چاڤەڕێیە ژ هەمى سییاسەتمەدارێن جیهانێ، هەر هەمان ڕەنگێ ڕەخنەگرتنێ مرۆڤ ل کەسەکێ دیتر یانژى لایەنەکێ دیتر بگرت، ئەنقەست مالا مللەتى خراب بکت ب دزى و گەندەڵیێ و ڕەوش و ئایندە و پاشەرۆژا گەلێ مە بتاوان و ستەمکاریێن خوە ل گەل تەڕ و هشکا بسۆژتن!

  گەلو – وەکو میناک - ما چێدبت هەمبەر وى کەسێ ئاگرى بەردت خانى و زەڤى و ئاقاران گازندەیەکا نەرم و ڕومانسى بهێتە ئاڕاستەکرن بێژنێ: خۆدێ تە بهێلت ئەڤە خەلەتیە تۆ دکى، ئەگەر تو دەستان ژێ بەردى، باشترە عەزێزێ من!!

   هەلبەت ئەڤ جۆرێ ڕەخنێ ب خوە هەژى ڕەخنەگرتنێ و تا ڕەتکرنێ یەژى، و وەکى هەناسەدانەکێیە زۆر دکتاتۆر رێکێ پێ ددن دا ڕەوشا زۆریا وان پەیداکرى نە پەقیتن، ئانکو ئەفیونەکا ڕاست و دروستە ژبۆ نڤاندنا جەماوەرى، براستى ژى پێ ئالینەکە دڕێکا چاکخوازى و چاکسازاندا، هەتا رۆژا هەڵامەتێ ڕابیت ڕەخنا ب ڤى جۆرى قەت گەل و وەڵات چ بەرهەمەکێ ژێ نا چنن.

   ل کوردستانا مە چەقووا گەهشتیە هەستى و خەنجەرا خرابکاریا سیاسى یا دەربازى دل و مێلاکێ بووى، ژنوى ئەم بێژنە ملیونەها گەنجێن خوە ئەڤێن مافێن وان دهێنە بنپێکرن و کەرامەتا وان دهێتە بێ بهاکرن: گەنجینوو ڕەخنەکا ڕومانسى بگرن دێ چێ بیت!! و ئەو ب خوە یێن دئاگرێ زڕبەهرکرن و هەژارکرن و بێ دادیێدا دقرقچن، ئەڤ ئاڕاستە سەرڕاى وێ چەندێ کو دلئێش و هەستشکێن و بێ ڕێزیە هەمبەر گەنج و هەمى ماڤسۆتى و ڕەخنەڤانێن دلسۆز، چونکى مینا کارەکێ وەکى وێ چەندێیە تۆ هەوڵ بدى تۆنێلەکێ ب سەرێ بزمارى ل چیایەکێ هشکەبەر ڤەکى!!

    کورت و کرمانج دڤێت ڕەخنەکا بهێزا هەلوەشێنەربت ل بەرامبەر خرابکارى و خیانەتا ل ڤى وەڵاتى دهێتەکرن، دڤێت ڕەخنەکا ئاڤەکربت ل سەر بنیاتەکێ توندێ بهێز و دیوارەکێ کونکریتیێ  موکوم، نەکو ڕەخنەک ب پەمبى و ئاڤالمیشى  هاتبت ڕستن، پشتێن گەندەڵکاران پێى مەساج بکن و ل هیفیێ بن رۆژا گوهوڕینا گەش بهەلیتن!!