بۆچی ناكه‌یی كه‌نی، حه‌قێ خۆ د نیڤا ده‌ستێ خودا نابینی؟!!

2 مانگ پێش ئێستا

جه‌میل شێلازی
ئه‌ز دخوازم بابه‌تێ خۆ ب ڤێ كورته‌ سه‌رهاتیا كوردی ده‌ستپێ بكه‌م، ئه‌وژی: ((دبێژن كه‌سه‌كی هنده‌ك پاره‌ ب قه‌ر دابوونه‌ ئێكی، پشتی چه‌ندین جاران چوویه‌ قه‌رێ خۆ، دویماهیك جار كابرایی گۆته‌ خودانێ قه‌ری: هه‌ما خۆ بگره‌ بهارێ ده‌ما كو كوچه‌ر په‌زێ خۆ دبه‌نه‌ زۆزانان، دێ هرییا په‌زی مینیته‌ ب ته‌ڕاشان ڤه‌، پاشی پاییزێ دێ چم وێ هرییێ ژ ته‌ڕاشان ڤه‌ كه‌م و به‌م بازاڕی فرۆشم و پاشی دێ پارێن ته‌ ده‌مه‌ ته‌!! خودانێ قه‌ری ژی شین بوو ژ كه‌نیادا!! ئینا كابرایی گۆتێ: بۆچی ناكه‌یی كه‌نی؟ تۆ حه‌قێ خۆ د نیڤا ده‌ستێ خودا نابینی؟!!)).
پشتی كو دوهی حكومه‌تا هه‌رێمێ دویماهیك بڕیار ل دوور چاره‌نڤیسێ مووچێن نه‌دایێن فه‌رمانبه‌را بڕیار دایی كو (ئه‌و مووچێن نه‌ هاتینه‌ دان، د ڤێ كابینێ ژی دا، دێ وه‌ك قه‌ر میننه‌ ل نك حكومه‌تێ، وه‌كو یێن كابینه‌یا به‌رییا ڤێ). و وه‌ك چه‌ندین ساڵه‌ كو حكومه‌ت دبێژیت دێ بۆ فه‌رمانبه‌ری كارته‌كا بانكی هێته‌ دورستكرن و مووچێن وی یێن پاشه‌كه‌وت كری، دێ چنه‌ سه‌ر حسابا وی یا بانكی، لێ ل وی ده‌می ژی تنێ فه‌رمانبه‌ر دشێت وی پاره‌یی وه‌ك قه‌رێن حكومه‌تێ یێن باج و سولفه‌ و كاره‌ب و ئاڤ و...هتد ژێ بده‌ت، هه‌كه‌ر وه‌ك دی نه‌شێت چ پاره‌یی ژێ وه‌ربگریت بۆ مه‌زاختیێن خۆ!!
ئه‌رێ پسیار ئه‌ڤه‌یه‌، ئه‌رێ هه‌كه‌ر قه‌رێن حكومه‌تێ ل ده‌ڤ من نه‌گه‌هنه‌ (ملیونه‌ك)ێ و مووچێن منێن پاشه‌كه‌وتكری زێده‌تر بن ژ (30) ملیونان، ئه‌رێ پا دێ حكومه‌ت بۆ چ دی وی پاره‌یی ڤ به‌ر قه‌رێن خۆ یێن چ دی ئێخیت؟!! یان پلانه‌ك هه‌یه‌ هه‌وایێ ئه‌م د هه‌لكێشین بكه‌ته‌ باجه‌ لسه‌ر مه‌ دا بشێت وی پارێ پاشه‌كه‌وتكری ڤ به‌ر بێخیت؟!!
و ل دویماهیێ تنێ دبێژمه‌ هه‌می فه‌رمانبه‌ران: (بۆچی ناكه‌نه‌ كه‌نی، مووچێن خۆ یێن پاشه‌كه‌وتكری دنیڤا ده‌ستێ خودا نابینن؟!!).