دایك و بابان دڤێن كراسێ خوە ل بەر زارۆكێ خوە بكەن

2 مانگ پێش ئێستا

ویداد سەبری
ھەمی دایك و بابان یا باشتر بۆ زارۆكێن خوە دڤێن و مرۆڤی نەڤێت كەس ژ مرۆڤی باشتر بیت، بتنێ زارۆكێ مرۆڤی نەبیت، ژبۆ ڤێ چەندێ ژی گەلەك دایك و باب حەزدكەن زارۆكێ وان كوپیا وان بیت، دێ ھەمی ھەولان دەن ڤی زارۆكی بۆ ڤێ چەندێ ئامادە كەن و ئەو ھزر دكەن، ئەو بڤێ چەندێ یێ باشیەكێ ل وی زارۆكی دكەن..

بۆ نمونە بابەك ئەندازیارە یان ژی نوژدارە یان پارێزەرە، دێ حەزا وی ھەمی ل سەر وێ چەندێ بیت، كو زارۆكێ وی ژی دەما مەزن دبیت وەك وی ببیتە ئەندازیار یان ژی نوژدار یان پارێزەر. ھەكە ھات و زارۆكێ وی بۆ نمونە ئەكتەری ھەلبژارت، ئەو دێ رابن بھەمی شێوەكی بەر سینگا وی زارۆكی گرن و بێژنێ ئەڤە دووماھیا وەستیانا مەیە و ڤێجا ئەوا مای ببیە لێبووك، ئەڤە نمونە بۆ گەلەك كارۆ و پیەشیێن دی ئەڤێن زارۆك دەما مەزن دبن بەرەڤ دچن و ئەو كارو پیشە بەروڤاژییا یێن دایك و بابێن وان بن.

یان دێ بینی زارۆكەكی ھەر ژ قوناغێن دەستپێكی ژ خواندنا خوە دێ ماموستایێ كەتە دھزرا خوەدا، ژبەركو حەزا وی ئەڤ چەندە یە دێ بینی دەیكا وی بھەمی ھێزا خوە ل بەر سینگا وی راوەستیت و ل سەر فەرز كەت كو ببیتە نوژدار، رەنگە ئەڤێ دەیكا ھەنێ وێنەكێ تایبەت ل سەر نوژداری وەرگرتە، كو برێكا كلینیكا خوە دێ شێت گەلەك پاران خرڤەكەت یان دێ شێت ھاریكاریا گەلەكان كەت، كو ئەو تشت لدەف وێ دەیكێ یێ كێم بوویە و ئەگەر ھات و وان زارۆكان دەست ژ حەزا خوە بەردان و بدویڤ حەزا دەیك و بابێن خوە كەفتن كا وان چ كراس بۆ كەركرینە یان نەشێت بگەھیتە وێ ئارمانجێ و دێ یا خو ژی ژدەست دەت یان ژی ئەوا دگەھیتێ ژی سەركەفتنێ تێدا نائینیت، ژبەركو بحەزا وی نەبوویە.

یا من دڤێت بێژم كو ڤەكولینێن زانستی و پەروەردەی و كومەلایەتی گەھشتینێ ئەوە، دڤێت دایك و باب ھەر ژ قوناغا دەستپێكی چاڤدێریا زارۆكێن خوە بكەن و كا حەزا وی ل سەر چ تشتە و دێ شێت سەركەفتنێ د چ بیاڤ دا بینیت، بلا ھاریكار بن دگەل دا و ھینگێ دێ مفای گەھینتە خوە و دێ ژیانا وی یا سەركەفتی بیت و دێ كومەلگەھـ ژی مفای ژ وان شیانان وەرگریت.