ھەرێم و قوپیا

2 مانگ پێش ئێستا

مستەفا سالح بامەرنی
ڤێ ژنێ بهەمی وێرەكیا خوە گوت، من قوپیا یا كری و ل سەر وێ بۆ كەیس و خەلك هاتە دەنگ، لڤێرە من دڤێت پسیار بكەم:
چەند بەرپرسێت مە لڤی وەلاتی باوەرنامێن ساختە بۆ خو چێكرینە؟
چەند ژوان باوەرنامە ل وەلاتێن بیانی كرینە، بێی كو تاقیكرنەكێ ژی بكەن؟
چەند بوینە خودان پلە و پوست و ئەو بخو دبێ باوەرنامە؟
چەند قوپیا دژیانا مە دا هاتیەكرن و د هەمی سكتەراندا؟
چەند قوپیا د دمێژویا مەدا هاتیە كرن، جاش بوینە شورەشگێر و مستەشار بوینە شیرەتكار و رەفیق بوینە خەباتكەر؟
چەند كورێت تەخێن برجوواز و بالادەست بوینە خودان باوەرنامە، سەرخاترا كو بابێن وان كوچكێت هەین یان ژی ئیمزایا وی گوهورینا دكەت؟
چەند كەسا لڤی وەلاتی دەستهەلاتا خو ب گوپالی، ل سەر خودانێ باوەرنامێ سەپاندیە؟
چەند خودانێن باوەرنامێن بلند ل پشت دەرگەهێن ئومیێن حیزبی راوەستاینە و چاڤەرێ ژڤانێت وانن، داكو رێنمایا بۆ یێ ئومی جێبەجێ بكەت، ئەگەر نە باوەرناما وی سەلكا گلێشی ژی قەبیل نابیت؟
چەند قوپیا ل نەخوشخانێن مە و دەرمانخانێن بازرگانی ڤە دهێتەكرن، تو دشێی هەر دەرمانێ بیت بدەستخوڤە بینی؟
چەند ژوان بازرگانێن دەرمانا قوپیا د كوالێتیا دەرمانا داكریە و چاڤدێریا ساخلەمیێ ب قەلەمێ كەسك رازیبوونا خو بۆ ئینانا وان نیشاندایە؟
چەند ملەفێن یاسایی ب قوپیایێ هاتینە نڤاندن و چەند هاتینە هەلكولان، لدویف میزاجێ ملپانەكی؟
چەند قوپیا د عەردێ ملكێ گشتی دا هاتیە كرن و یێ بهێزتر پتر یا بۆ خو بری و دگەل وی كەسێن كرێت موستەفید بوونە ژ پارچێن عەردی و یێ ژ هەژی هێشتا كرێدارە؟
چەند قوپیا د وەبەرهێنانێ و ئاڤاكرنا یەكەیێن ئاكنجیبوونێ دا هاتیە كرن، بناڤێ كێم دەرامەتا و هەژارا و ماموستایا و شەهیدا و پێشمەرگەی و پشتی خلاس بوین، ب دەفتەرا فروتینە و عەرەب و خەڵكێ زەنگین ژێ مفادار بووینە؟
چەند قوپیا د لیستێن پێشمەرگەی دا هاتیە كرن، كو كورێن پلەدارا و دەستدرێژا یێ ل ئەوروپا یان یێ ل ئوفێسا خو یا بازرگانی و موچێ پێشمەرگەی وەردگریت؟
چەند قوپیا هاتیەكرن، بندیوار هاتینە دامەزراندن بۆ دەمێ پێتڤی ل سوشیال میدیایێ هێرشا بەكەنە سەر نەرازیبوویا؟
چەند قوپیا دلیستا موچا داهاتیە كرن، خەلكێن جولەمێرگ و شەرنەخ و هوزێن سەر سنوری لناڤ توركیا موچێن خو لڤێرە وەردگرن و بتنێ روژێن دەنگدانێ دهێن وەكی من و تە دەنگێ خو دەن؟

دا ڤێ ژی بێژم و بەس بیرا خو بینن، چەند قوپیا د هەلبژارتنا دا هاتیە كرن و كورسیك بلند و نزم كرینە و كەسێن حیزبەكێ بڤێت دێ بەت و یێ نەڤێت ژی دێ لسەر شاشا كەتە گری و بێژیت غەدر لمن هاتە كرن؟

ئەڤە وهەتا سوبەهی ڤی دەمی ئەز برێز بكەم خلاس نابن، چونكە دماوێ ژیێ ڤێ هەرێمێ دا، هەر دەم قوپیا ب ژیانا خەلكی دهێتە كرن و خەلك یێ دبیتە قوربانی و شوكور بۆ خودێ قوپیا یا بەردەوامە.