چەند خوزی بۆ وەلاتەکێ ژ ھەژی

1 مانگ پێش ئێستا

ژێگر نەجیب
مە بھارەکا ب خەمل دڤیا. یا تژی با ژ گول و گیا. دا سەدان جۆرێن خوران و دەرمانان ژێ چێکەین و فرێکەین بۆ بیانیا. ئەڤ خوارنێن کوردەواری ڤەژینینەڤە. ڤێجا دا چێکەین ترشکا کەڤیرێ. ھەستیکا کەینە بەر کاریا کەلێ. ساڤارەکا دناڤدا سێبسک. کەلاندی ب رۆنی و یا تژی کسک.
ھەما باشە کەس نزانیت مە ھنگڤینێ چیا یێ ھەی!!! باشترین جۆرێ ھنگڤینی و ھندێ ساخلەم، دەرمانە تو بخوی تەناگرن چ ئەلەم!. مێشێن مەژی د نازدارن، بەس دگەرن ل گول و گیا، ئەرێ باشە دێ کەنگی ئەم چاڤدەینە ئەڤان بەرھەما ھەمیا!!؟؟؟
بتنێ ئەگەر زکێ وەلاتێ من یێ تێر ئاڤەکا زەلال و پاقژبا، رویێ وی ب کانی و روباران یێ نەخشاندی با، داکەمە ژێدەرێ ژین و ژیارەکا ساخلەم، خەلک تێدا یێ ب کەیف با ھەر وەخت و دەم.
 وان روباران و وان گەلیان. وان تاڤگەو سیلاڤێن چیان. کەمە ھێزا ئەلکتریکێ، شەڤێن تاری ل ڤی واری و پڕکەم روناھی، گەش کەم وەکو دێمێ بیکێ.
ئەگەر مە گەلی و نەھال ھەبان، دا سەدان بەربەست و سکر و بەنداڤا دروستکەم و یاسایا قەدەغەیا دەرخستنا ئاڤا ژێر ئەرد پەیرەوکەم و کەمە تاوانەکا نیشتمانی! ب وان بەنداڤان ھزاران باغ و بیستانا ئاڤدەین، ئەڤرازی و نشیڤیا کەینە شینکاتی، ل گەرمەگەرما وەرزێ ھاڤینێ ب خەملیتن بھارەک دی، دا چەند مفا تێدا ھەبن، مینا (باشبوونا ئابووری، فێنکبوونا کەش و ھەوار، خودانکرنا ماسیا، گەشت و گوزار، یاریێن ئاڤێ، ئەلەکتریک، .....) ئەڤە دا بیتە داھات و دەرامەت بۆ سەدان خێزانا .
ئەگەر زڤستانا وەلاتێ من یا بەفرین با، گوپێن چیا، زنار و ناڤا گەلیا یا تژی بەفرا سپی با... دا بکارھینین بۆ یاریا خلیسکانا سەر بەفرێ، چەند عەرەب و بیاینا ڤێرکەینە گەشتێن زڤستانا کوردستانێ و ڤەژینین کەرتێ گەشت و گوزارێ.
ئەگەر مە گرنگیا گەشت و گوزارێ زانیبا، دا پلانەکا راست و درست دانین، کو د ھەمی وەرزێن سالێدا مە مفا ژێ وەرگرتبا. بچویکترین نموونە قەسرا سەرێ گارەی یا سەدامێ گورب گور، دا نویژەنکەین وەکی بەرێ و رویێ گەشتڤانا دەینە وێرێ، ھەم وەکو معلەمەکێ دیروکی یێ دکتاتورەکێ چەرخێ بیستێ ھەم ژی جھەکێ بلندێ گەشت و گوزارێ، دابیتە ئەگەرێ ڤەژاندنا ئابوورا دەڤەرێ ژی، نە مە زانی مفای ژ ئەنجامێ کەد و خەبات و رەنجا شورەش و سەرھلدانێن خۆ ببینین، نەژی مفای ژ پاشمایێن دوژمنێ خۆ.
مخابن وەلاتێ من ناگەھیتە پەراڤێن دەریا، ئەم ژی وەکو ڤێ جیھانێ د ئاڤێدا گەشتا بکەین، بازرگانیێ ل سنورێن ڤێ جیھانێ دەربازبکەین. ئەگەر وەلاتێ من یێ پڕ سنورە با!! دا وەرگرین باج و خویک، باج و خویک نە بتنێ بۆ بەریکێ، بەلکو دا پێ ڤەژینین ئابورا وەلاتی و خورتکەین بازار و سیکێ .....
چەند خوزیا د راھێلین، ھزرو بیرا دئینین و دگێرین، بوچی مەژی وەکو وەلاتێن (سعودیە، قەتەر، ئیمارات، ...)  گاز و غاز نینە... دا فروشین وەلاتان و بێژینێ پارا بینە، ڤێجا مالکی و عەبادی و کازمی کینە؟!
دا چەندا گرنگ بیت وەلاتێ من کەفتبا دناڤبەرا دوو رووباراندا "مێزوپوتامیا" ئەو جھێ لاندکا ئێکەم شارستانی لێ ھاتیە ژیانێ، ئەو وارێ ھەمبێزکری چەند مللەتێن جیھانێ، ئەو دەڤەرا چەندین شارستانی لێ گەشەبوین، دا ب دەھان موزەخانە و جھێن دیروکی و کەلتوری لێ ئاڤاکەین، رویێ گەشتڤان و دیرۆکزان و تەڤ خەلکەکی دەینە کوردستانێ.
ئەو دەریایا فۆلکلوری، ئەو کەلتورێ پاقژو بژین  یێ تژی دڕو مراری.. ئەو زمانێ ڕەسەن و خۆمالی مە پاراستبا.
مە کربا دناڤا ئەوان " ڤلێن" ل سەرێ گرا، ئەوان "بالەخانێن" لسەر دلا! مە کربانە د کەلێن زێری ڤە ھەر تشتەکێ "ماددی و مەینەڤی" یێ ب دەست بگرین یان سەر دەڤی، نیشاندابان، دا ب سەدان گەشتیار و فێرخواز، فێری  کەلتورو چاندا مەبن، دا ئامێدیکێ، کەلا ھەولێرێ، قوبەھان،.... چەندین شینوارێن ئەڤێ ئاخێ کەینە نیشان و رەمز ( معلم)ێن ئەڤی وەلاتی، بەرێ حەژێکەرێن دیروک و شارستانیا جیھانی دەینە کوردستانێ.
مە دڤێت یاسا یا سەروەر بیت .....
شڤانێ مە یێ پەروەر بیت.....
پەزێ مە نەیێ دوو کەر بیت .....
              دێ ھەژیت تەختێ سولتانی !

شاە لسەر تەختی ل تەھرانێ
چەند عەرەبێن بیابانێ
تەڤ دوژمنێن کوردستانێ
             دا ژ ناڤ بەین ب مێرانی !

کا رێکخستن کانێ دادی .....
کا ئابوورێ ڤی وەلاتی ......
مللەت وێرانکر جارەک دی ......
            روژا گەش نەما ل ئەسمانی  !

دەستا دانن ل ناڤ دەستا
ئاڤاکەن فێرگەە و خەستا
بەس پیچکەن پارا ژ قەستا
            سبـــــــا دێ گەرین ل نانی !

ژیان پڕ تەحل و دژوارە .....
کەس ژ مە نەیێ ھشارە .....
گەر وەلات ما بێ ستارە .....            
دێ خوت گورگ پەزێ شڤانی !

ـــــــــــــــــــــــــــــــــــــــــــــــــــــــــــــــ

چەند خوزی بۆ وەلاتەکێ ژ ھەژی (1)

http://www.rwangauraxna.com/ba/detail.aspx?IDNews=3410