قێرسی ژ بۆ شەرمزاریێ

1 مانگ پێش ئێستا

سەرفراز نەقشبندی
ئەز چاوا و لکیڤە و لچ دنێڕم، هەلامەتێ هاڤیبۆنا خو دبینم.. ل چەپا دنێڕم نە چەپن!! ل دیندارا دنێڕم نە دیندارن!! ل وەلاتی دنێڕم دهزراندنا هەڤپشكدا هەشڤتیە!! ل مرۆڤا دنێڕم نە یێ دڕندە هەست بدڕاتیا خو دکەت!! نە خوشمرۆڤا باوەری ب باشیێ مایە.!!
کورتو کرمانجی ئەز لناڤ ڤێ گێلەشوکێ ناکەڤمە د چ پەرژاناندا،  دناڤ کەڤزا بەقا نەشێم مەلەڤانیا بکەم.

پا دڤێت کیڤە بچم.؟ من دیت جهێ هەرێ ئارام ئەز بچمە موزەخانێ.. لدەستپێکێ کەنیا من هات دەمێ من خو دیتی پەیکەرەکم لسەر حەلانەکێ بەری، مروڤ دهێن و دچن لمن دنێڕن، هەر یەک لگور هزرا خو ئاڤریا چاڤێن منێن تژی روندک و گرنژینا لێڤێن من سالوخەت دکەت، هندەک دی ل کوریشکێن ئەنیا من دنێڕن و خەمێن من پێ د پیڤن، هندەک دی نڤیسینا سەر کەڤری دخوینن (ئەڤە پەیکەرێ ژنەکا کوردە، تم هزرا وێ ل وەلاتێ وێ یێ بێخودان بوو، هیچ تشتەک بۆ خو و هەزا خو نەکرە دپارزینێ خو دا، تم های ژ خەمێن خەمبارێن مینا خو هەبوو، هەز دکر تەڤ زاڕۆیێن سێوی هەمبێز بکەت ووووووووو).
کومەکا گەنجا قاقاقا دکەنن و دبێژن" دێ وەرن دا بچین، مانێ هەکە ئەڤ خولیسەرە نەبا نە دبۆ پەیکەر.

ئەز مامە د ڤێ هزرێدا و من گوت: بەلکی راست دبێژن.. دڤێت ئێدی کەڤلێ ڤان خەما ژ سەر پیستێ خو ڤەشێرم، نیشا کەسێ نەدەم کا ئەز چ توخمم، بەهسێ وەلاتێ خو نەکەم و کارەساتا وی د دلێ خودا مت بکەم.
ئەرێ ب هزاران توخم و مللەت یێ ل ئەلمانیا هەن، هەما بلا ئەز ژی دناڤ واندا وندا ببم.
ئەرێ ئەڤە بیست و پێنج سالە ئەز لڤی وەلاتی وەکی بەبەغای، من ل هەمی جها یا نیشادای ئەز کوردم، من نەهامەتیا وەڵاتێ خو یا دایە نیاسین.
ئەرێ وەلاتێ من بەری ناڤێ من لسەر ئەزمانێ من بوو، بەراهیا سڵاڤا من بوو.
لێ نهە پشتی ڤێ تەڤلیهەڤیا ل وەلاتێ من رویددەت، هەڤسویێ من یێ ئەلمان، کو چەند ساڵە ئەز باسێ وەڵاتێ خو بۆ دکەم گوتە من: (هەوە پارچەکا وەڵاتێ خو بدەستئینا، لێ هوین بخو لهەڤ ناکەن و دێ وێران کەن!). من ئەزمانێ خو داعویرا و خوها شەرمێ ئەز دام.. من گوتە خوە، بەسە ئێدی هەمی دونیا دزانیت ئەم خوخورین و جەردەینە، ئەم خاینێن نفشێ خوینە.. بەسە ئێدی نەبێژە ئاخ وەلات.
لێ مخابن بڕیارا من نە چوو سەر، ئیرو ل نەخوشخانێ، دختورێ ئەڵمان ژ من من پرسی: "تو تورکی؟" ڤێ پرسێ دکەن ژ بەر باهرا پتر ژ بیانیا ل ئەلمانیا تورکن.
قاڕیەک ب منکەت و من ژبنێ پیا کرە هاوار "ئەز کوردم، هاوار ئەز کوردم"، قێرسی بۆ شەرمزاریێ.