بوچی چاندنا داران ل سەر ناڤێ کچێن بێ سەمیان ل دهوکێ؟

1 مانگ پێش ئێستا

ئیبراهیم دێرگژنیکی
گرۆپێ ژین یێ ژینگەپارێزا، گرۆپەکێ خۆبەخشە کومەکا گەنجان ل دهوکێ شیایە چەندین چالاکیان دبیاڤێ ژینگەهێ دا ل دهوکێ ئەنجام بدەن، بێی چ پالپشتیەکا دارایی هەبیت و کارەکێ خۆبەخشیە و ژ خەمخوریا ئەندامێن ڤی گرۆپی یە.
دوماهی چالاکیا ڤی گرۆپی، ل رۆژا سێ شەمبی رێکەفتی ٢/٣/٢٠٢١ ێ ب هەلکەفتا وەرزێ بهارێ و هەلکەفتێن ئادارێ بوو، ب هەڤکاری دگەل رێکخراوا ئازا یا پاراستنا ژینگەهێ و رێکخراوا کوردستان یا پاراستنا مافێن ئاژەلی سمینارەک ل مالا کچان یا سەر ب رێڤەبەریا گەشەپێدانا جڤاکی ل دهوکێ ل دور مافێ ئاژەلان ژ لایێ د. سلێمان ڤە هاتە پێشکێشکرن، پاشی دەست ب هەوەکا چاندنا داران هاتە کرن، کو ئەو دا ژ لایێ کچ و زارۆکێن مالا کچان ڤە هاتنە چاندن وهەر ناڤێن وان ل سەر وان داران هاتنە دانان و هەر ئؽک ژ وان دێ سەخبێریا وێ دارێ کەت یا ب ناڤێ وێ، مەبەست ژی ژێ ئەوە ببنە دوستێن ژینگەهێ.

راستی ژی ئەڤە پێنگاڤەکا جوانە، چونکە دێ بیتە ئەگەر ژ لایێ دەرۆنی ڤە کەیفخوشیەکێ بۆ ڤان کچان پەیدا بن و دیڤچون و سەخبێریا وێ دارێ بکەن یا ب ناڤێ وێ و پەیدابوونا دوستینیێ دگەل ژینگەهێ و دیسان خزمەتکرنەکە بۆ ژینگەها دهوکێ و بەرفرەهکرنا بیاڤێ کەسکاتیێ ل دهوکێ، چونکە مخابن بیاڤێ کەسکاتیێ ل دهوکێ نەگەهشتیە وی ستانداردێ جیهانی کو ٢٢% ێ یە، ل دیڤ دیڤچونێن من کرین ل دهوکێ رێژا کەسکاتیێ ب تنێ ١٣% ؽ یە.
لەورا ژی داخاز ژ لایەنێن پەیوەندیدار و سازی و وەلاتیان دکەین، دارا بچینن وکەسکاتیێ زێدە کەن، دا مە ژینگەهەکا ساخلەم هەبیت، دا مە ژیانەکا ساخلەم هەبیت.