سەیرانێن مە و تازیا ژینگەهێ!

1 مانگ پێش ئێستا

بژێر بەنگین
هەر تشتەک دخزمەتا مرۆڤیدا هاتییە ئافراندن و مرۆڤ دگەل هەر تشتی دڕندەیە.! ما ئایینەک یان بیروباوەرک هەیە، کو ل دژی پاراستن و پاقژییا ژینگەهێ بیت؟ ئەگەرێ تالانکرنا ژینگەهێ چیە؟ ئەرێ ما ژینگەهـ دوژمنە، دا هندە ئازاربدەین؟ ما ئەگەر ئێک باشیەکێ ل مە بکەت، دێ زیانێ گەهینینێ؟ مانە ژینگەهـ، (ژین)ێ د(گەهـ)ینیت؟ ژینگەهـ وێنەیێ جڤاکییە، پاقژی یان پیساتی، ئاستێ پێشکەڤتنا وەلاتی، د هەر بوارەکیدا دیاردکەت. ئەگەر بیرا هەوە بهێت، ل قارەمانییا جیهانی یا سالا ٢٠١٨ ل ڕووسیا، سەر هندێڕا کو یاریگەهان کارمەندێن پاقژیێ هەبوون، پشتەڤانێن هەلبژارتییێ (یابان)ێ، پشتی ب دۆماهیک هاتنا هەر یاریەکا وەلاتێ خۆ، هەمییا پێکڤە دەست ب پاقژکرنا جهێ ڕوینشتنێ دکر. هەتا د ئەوێ یاریێ ژیدا، یا کو تووشی شکەستنێ بووین و ژ مۆندیالێ بارکری، هەم پشتەڤانان جهێ روینشتنێ پاقژکر، هەم یاریزانان جهێ جل گوهۆڕینێ و ئەڤە هەمی ل وەلاتەکێ بیانی.! ب ئەڤێ چەندێ، وانەیەک پێشکێشی هەمی مرۆڤایەتییێ کر و جیهانێ زانی کو یابان د چ ئاستەکیدایە.! هندی ل بیرە، ئەم کورد یێن داخازا دەولەتبوونێ دکەین، بەلێ ئەگەر ناخ و ئاخێن خۆ پاقژنەکەین، دەولەتا مە دێ ب چ ڕەنگ بیت؟ ما نەیا فەرە چاڤێ خۆ بدەینە ئەوی جهێ ئەم ل سەر دژین و خۆشیێ ژێ چێدکەین و بۆ بەرژەوەندیا خۆ بکاردهینین؟ ئەرێ بۆراندنا چەند دەمێ دی پێدڤییە، دا ئەم دەستپێبکەین؟ یێن خودان دلێن پاقژ، باندۆرا خۆژی، پاقژ دهێلن. یێن وژدان د ناخیدا بیت، دێ ب وژدان سەرەدەرییێ کەن. هەر سال ئەڤ جڕ و بڕەیە، هەر سال ئەڤ هەتکبەرییەیە. گاڤا بهارێ خۆ خەملاند، دێ چین لێ بینە مێڤان و خۆشیێن خۆ تێدا تۆمارکەین و دۆماهیکێ ئیمزایەکێ ب گلێشی لێکەین. دبێژین: مانێ هەر مافێن مە یێن دهێنە خارن، ما ژینگەهێ بۆ کێ پارێزم؟ ئێ دێ باشە، کا ل دەستپێکێ بێژە خۆ: ما ژینگەهـ یا تەژی نینە؟ دێ ئەوێ ژی وەکی هەمی تایبەتیێن خۆ بپارێزە.! یا دیارە، تۆلێن خرابکارییین ب سەرێ مە هاتین، هەمییا ژ ژینگەهێ ڤەدکەین. پێدڤییە (دەستهەلات، نڤێسەر، مامۆستا، دەیک و باب و هەر سەمیانەک و هەر هاولاتییەکێ بشێت)، ڕۆلەکێ بەرچاڤ د ئەڤی بابەتیدا بگێڕن. جیهان و مرۆڤایەتی، گەلەک یێن پێشڤە چووین، ئەگەر زوی نەبیت ژی، بۆ دەستپێکرنێ هەر درەنگ نینە. بلا هەر ئێک ژمە، ئەوێ خێرێ نە بتنێ دگەل ژینگەهێ، بەلکی دگەل خۆ بکەت. مەرەم ژێ نە چول و ئاقار و جهێن سەیرانا ب تنێ نە، بەلکی هەر پارچەکا وەلاتی و هەر پارچەکا جیهانێ و هەر جهێ کارەکی و هەر جادەک و کۆلانەک، بلا دپاقژ بن، دا چاڤێن مە ژ جوانییێ بێبار نەبن. هیڤییە جهێ گرنگیپێدانێ بیت.