زڕنابێژی

1 مانگ پێش ئێستا

جاسم محمد شرنەخى
داخوزا لێبوورنێ ژ سازبەندێن ڤى ئامیرێ مۆزیکیێ ڕەسەن دکم، بڕاستى ئەز بخوە پتر ژسازمۆرێن دیترین ڕۆژهەلات و رۆژئاڤا حەز ژ زڕنایێ دکم. زڕنابێژێن پرۆفشناڵ ل دەڤ من جهێ ڕێزێنە، چونکى ئەوژى - مینا مە هەمیان نە کێمتر و نە زێدەتر - بەندەیێن خوداینە، هەر وەکى پێغەمبەرێ شرین ناڤ سلاڤ لێ بن گۆتى: الناس سواسية كأسنان المشط... مرۆڤ مینا ددانێن شەهی وەکهەڤن"، مەرەما من ژ تایتڵێ گۆتارێ زاڕاڤ و ئێدیەمەکە ژبۆ ئێشەکا جڤاکیا زۆر خراب و ترسناک ژ ئەنجامێ پەیڕەوکرنا سیاسەتەکا بەرۆڤاژ دهێتە گۆتن، ئەو سیاسەتا دبتن ڕێگر ل ئاڤادان و گەشەپێدانا هاوڵاتیان ل سەر بنەمایێن ڕەوشتیێن بلند وەکى: ڕاستى، دلسۆزى، گیانێ هاوڵاتیبوونێ...هتد.

"زڕنابێژى" ئانكو وێڤەتر ژ بێ دەنگى و بێ هەلویستیێ هەمبەر خەلەتى و خرابیێن خرابکاران ژ کار ب دەست و سیاسیان، ئانکو پۆڵشکرنا ڕویێ کەسانێن خراب، و جوانکرنا شاشى و خرابیان ژبۆ خوەشرینکرن و سالویسیێ، مینا وێیا ئەڤرۆ ئەم ل بەرپەرێن تۆڕێن جڤاکى و ل سەر شاشەیێن دەزگەهێن ڕاگەهاندنێ دبینن، ل سەمتا گەشبوونا هەر  چرایەکێ ڕەخنەگرتنێ و هەڤدەم ل گەل هەر تبل درێژکرنەکێ بۆ جهێ ئیش و برینان و لێگەڕیانێ ل چارەسەرکرنێ ژ لایێ ڕەوشەنبیر و هزرڤانانڤە بت، یانژى ژلایێ خەلکێ بتن یێن دناڤ دەریا قەیران و مەرگەساتاندا خەندقین، دێ  حەشامەتەکا پەیدابوویان ببینى هاتن ل سەر هێلێ و چ ب چڕا نەهێلان ژ پاڕێزەرى و بەڕەڤانیکرنێ ژ سیاسەتمەدارێن فاشل و وان گەندەڵچیێن کورد و کوردستان کرینە سینەما بەلاش بۆ تەڤایا خەلکێ جیهانێ، گەلۆ بۆچى؟ پاڵدەرێن ڤێ زڕنابێژیێ چنە؟!

  ل ڤێرێ هندەک ژ پاڵدەرێن ل پشت ڤێ دیاردەیا کومەڵایەتى تا رێژەیەکێ دیارن، ل پێشاهیا هەمیان دۆریاتیا سیاسى و جڤاکیە ژ لایێ مفادار و خامەفڕۆشانڤە، پشتى نوخبەیا باڵادەست سیاسەتا: "هاوڵاتى برسى بکە دێ ل پەى تە هێت، ئەگەر نە دێ لەقا ل تەدت". ژ دەستپێکا ساڵێن حوکمڕانیا خوە و هەتا نهاژى بەردەوام پەیڕەوکرى، ئەڤ زڕنابێژێن نها وەکى وى سوپایێ نە سەر دیار و نە دویماهى ژ بندیوارێن ژ بۆ کوڵەتیێ – وەکى دەنگ فرۆشى، وژدان فرۆشى، تا ب گەهیت ئاستێ ب کارئینانێ ژبۆ سختەکاریێ-  ب نانێ حەرام تێر دکن، ئەڤ ئاوازێن نەشازێن ڤان زڕنابێژان، مرۆڤ دزانت ژ کیژ قولاچا عویرێ وان دهێت نەکو ژدل و ژدانێن وان.

   لێ هندەک ئەگەر و پاڵدەرێن دیترێن زڕنابێژى و مەللاقیێ زۆر ئاشکەرا نینن وەکى یێن بوورین، بۆ نموونە: هندەک دەمان دێ بینى چەندین گەنج بوونە زڕنابێژ و یێن خوەشرین دکن ب بەڕەڤانیکرنێ، هەمان زڕنا نەحەقێن گەندەڵچى لێ ددن، هەر وەکى کوراڵەکا تایبەت کا مایسترۆ و سترانبێژێ سەرکێشێ ئوپرایێ ب چ سەلیقەت سترانێ ئەدا دکن، ئەوژى ب هەمان نۆتە ڤەدگێڕن!

   ب ڕاستى هەلویستێ زڕنابێژیێ دویێ گوهـ پەقینتر و زک ئێشتر و دلژانترە، چونکى یا چاڤەڕێى ژ گەنجێن مەیێن ئومێدا ڤى گەل و ەڵاتى ب وانڤە هەلاویستى ئەوە، بمینن دەستپاقژ و جان پاک و هۆشمەند، خوە شۆر نەکن ژبۆ ئاستێ نزمێ گەلەک کەسانێن ل ژیێ مە ب تەمەن، ئەو ژى خۆ دقڕێژا خرابکاریێ ڤە نەدن و دەرۆنێ وان یێ پاراستى بت ژ کولەتى و دۆڕویاتى و گەندەڵیێ، نەمازە ئەو بخوە سەدجارى زڕبەهرتر و مەحرۆمترن ژ هەمى چینێن جڤاکى، یا دیارە قەبارێ ستەما جڤاکى و سیاسى ل سەر گەنجان کا چەند مەزنە!

   لێ هەر چەوان بت چ زڕنابێژیا دویماهیێ بتن یانژى یا ژبەرى وێ بتن، ڤەرێژا هەمان ژێدەرێ ئێشێن جڤاکیە، هەلبەت رەهـ و ریشاڵێن هەمى مەللاقى و کۆڵەتى و خوەشرینکرنەکا هەبیت ب پلەیا نایاب سیاسینە، واتە سیاسەتا فاشل و پاشڤەڕۆیە!
    ئەگەر ئەم مرۆڤ بین دونیا - ب هەمى گەنجینە و سامانێن خوەڤە - بەر وێ چەندێ ناکەڤیت کەڕامەتا خوداى ل مە بەخشى ب زڕنابێژیێ  ئەم بەربازار بکین.