دەرزیێن تێکەل، ماسکەکە بۆ ڤەشارتنا نیشانێت کورۆنایێ

سەفەر رێكانی
ب کارئینانا دەرزییێن تێکەل، دیاردەیەکا زۆر یا بەربەلاڤە دناڤ کومەلگەهێ دا، پرانیا جاران دێ نەخوشیەكا سڤك ھێتە كەسەكێ و دێ سەرەدانا كلینیكێن دەرڤە كەن و دێ ئەو بۆ نمونە دوو شرینقان كەنە دناڤ ئێكدا و بۆ نەخوشی ھێتە دانان و بتنێ ئەڤە ئارامكەرە و دێ نەخوش ھزر كەت كو زوی چارەسەر بوو، دا بزانین بەرەژەنكێن ڤی چەندێ ل سەر نەخوشی چنە، دڤێت ڤان دەرزییان بزانین.
 دەرزیێن تێکەل پێک دهێت ژ تێکەلکرنا چەند دەرزیان پێکڤە. دەرزیێن تێکەل ب گشتی بۆ سێ حالەتان بکاردهێن:

1ـ بۆ پەرسیڤی(هەلامەت) تایێ و لەرزینێ، کوخین و ئێشانا گەوریێ.
2ـ بۆ ئێشانێ ب گشتی و تەشەنجاتان بکاردهێت.
3ـ بۆ حەساسیەتێ و خوریانا پیستی.
بۆ حالەتێ ئێکێ:
ئەنتی بایوتیک ئانکو (ئەموکسیسیلین یان پروکاین یان ئەمپیکلوس)، دگەل ئەمپولی دیکسامیسازون(دیکادرون) تێکەل دکەن یان ئەنتی بایوتیک دگەل دیکسامیسازون ل گەل ڤولتارینێ تێکەل دکەن.

بۆ حالەتێ دوویێ:
1ـ ڤولتارین+دیکادرون.
2ـ دیکادرون+موبیک(میلوکزیکام)
3ـ دیکادرون+فیلدین
4ـ ڤولتارین+نیوروبین

بۆ حالەتێ سێیێ:
١ـ بیتاکورت+الرمین
2ـ الرمین+دیکادرون

ئەڤ تێکەلکرنە زۆر دهێنە بکارئینان و مفایەکێ دەمکی یێ هەی، بەس زیانێت وێ گەلەکن، ئەڤ جورە تێکەلەلکرنە دبیتە ئەگەرێ برینداربوونا مەعیدەی و نەزیفا مەعیدەی ژ ئەگەرێ هەردوو دەرزیکێن ڤولتارن و دیکادرون و کاریگەریەکا خراب یا هەی ل سەر مەعیدەی. دبیتە ئەگەرێ دابەزاندنا بەرگریا لەشی، ئەڤ چەندە ژی دبیتە ئەگەرێ هندێ ک میکروب ب سناهی زال ببن ل سەر لەشی دا  هەروەسا شەکرێ بلند دکەت و کاریگەریەکا خراب ل سەر چاڤان یا هەی، ئەگەر بۆ ماوەکێ درێژ بکاربینن دبیتە ئەگەرێ دروستبوونا ئاڤا سپی یا چاڤی.

گەلەک جاران تووشبوویێن کورونایێ پشتی ئەڤان دەرزیان ددانن، نیشانێت نەخۆشیێ دهێنە ڤەشارتن و دبیتە ئەگەرێ هندێ نەخۆشێ کورۆنایێ ل دەستپێکێ سەرەدانا نوژداری نەکەت و دەمێ سەرەدانێ دکەت، حالەت ژ دەست دەردکەڤیت.