ده‌هـ خۆله‌ك ل ده‌رمانخانێ
2 ساڵ پێش ئێستا
غیاس خالد زێبارى
به‌رى چه‌ند رۆژا
ژ بووى دابینكرنا وان چاره‌سه‌ریێن نۆژادارى بۆ نه‌ساخه‌كى نڤیسى، من قه‌ستا ئێك ژ
ده‌رمانخانێن باژێرى كر، ئه‌زێ نێزیكى ئێك ژ وان كارمه‌ندا بووم ئه‌وێ ب ئامیرێ ئه‌لكترۆنى چاره‌سه‌ریێن نه‌ساخا به‌رێكڤه‌ددان
و بها دیار دكر و وه‌ردگرت، هه‌تا گه‌ڕ گه‌هشته من، من ( 5 ) كه‌س دیتن، كۆ یێن
گه‌نگه‌شێ لگه‌ل وى كارمه‌ندێ پاره وه‌رگر دكه‌ن، جار دگۆته هه‌ڤالێ خۆ مه هند
پاره نینه بده‌ینێ، دێ چینە ده‌ف فلان كه‌سى به‌لكى ڤێهه‌بن، جار جار حیبه‌تى
دمان و خه‌مگینیه‌كا گران دناڤچاڤان را دیاربوو، پشتى پسه پسه‌كێ گۆته پاره‌وه‌رگرى
مه ئه‌ڤ پاره نینه ڤان ده‌رمانا بكڕین، لدیف پارێ مه چاره‌سه‌ریێ بده‌مه..!
ئه‌وى ژى درێغى نه‌كر، حه‌ب و ده‌رمان و ده‌رزیكێن وان ڤه‌كرن و لدیڤ پارێ وان هه‌ر
ئێكى پشكه‌ك لێ ده‌رئینا.
براستى ئه‌ز ل وان خه‌مگینتر بووم و هه‌تا نهۆ هه‌ر شه‌ڤ
ئه‌و دیمه‌ن دهێنه پێشچاڤێن من و ب سه‌دان پسیار لده‌ف من درۆست دبن.
ئه‌رێ گۆنه‌ها مه كوردا چیه ئه‌م كه‌فتینه دڤێ ره‌وشێ دا..؟ ئەرێ ما نافکا
کوردێن هەژار ب خەم و کۆڤان و ئەلەما بڕییە..؟ ئه‌رێ ئه‌گه‌ر بێ سه‌رۆبه‌رییا سیسته‌مێ
مه یێ ساخله‌میێ یه یان نه‌بوونا چاڤدێریێ یه لسه‌ر ده‌رمانخانه و كۆگه‌هێن
وان..؟ یان ژى دیارده‌كا جیهانى یه...؟ یان ژى پلانه‌كا دارشتى یه د به‌رژه‌وه‌ندا
بازرگانێن ده‌رمانا و خۆدانێن كۆمپانیێن تایبه‌ت كۆ زۆربه‌ى وان یان یێن به‌رپرسانه
یان نێزیكى وانه..؟
ئه‌رێ ئه‌ڤ نه‌ساخه
بڤێ نیڤ چاره‌سه‌رییا دێ هێنه چاره‌سه‌ركرن...؟ ئه‌گه‌ر د ده‌هــ خۆله‌كاندا ژ ئێك لایێ ده‌رمانخانه‌كا باژێره‌كێ
بچیك پێنچ حاله‌ت بهێنه دیتن، ئه‌رێ ل هه‌مى
ده‌رمانخانێن ڤى باژێرى دێ بنه چه‌ند..! ئه‌رێ ل باژارێن مه‌زن یان سه‌رتاسه‌رى
وه‌ڵاتى دێ چه‌وا بیت...! ئەرێ رێژا هەژاریێ لڤی وەڵاتی لسەر کانزا و پترۆلێ چەندە..؟ براستى بهایێ وان زۆرێ گرانه و سه‌رڤه‌ى شیانێن خه‌لكى دانه، نه‌ساخ هه‌بوون
ده‌هــ ده‌زى پێتڤى بوون و هه‌ر ئێك نێزیكى (25.000) بیست و پێنج هزار دیارا بوو،
ئانكۆ دوو سه‌د و پێنجى هزار بۆ ئێك جۆر، ژبلى جۆرێن دیتر..
دڤێره‌دا دیار دبیت خه‌لكێ كوردستانێ د ره‌وشه‌كا زۆرا
دژوار یا ئابووریدایه و دبیت ژبه‌ر ڤێ ره‌وشێ و نه‌بوونا شیانێن دابینكرنا چاره‌سه‌ریێ
رۆژانه خه‌لكه‌ك گیانێ خۆ ژ ده‌ست بده‌ت و ببنه قوربانى سیسته‌مێ سقه‌تێ ساخله‌میا
كوردستانێ، ئه‌گه‌ر سیسته‌م سیسته‌مه‌كێ ساخله‌م با یان ده‌ستهه‌لات د خه‌ما خه‌لكیدا
با، دا پشته‌ڤانیا نه‌خۆشخانێن حكومى كه‌ت بۆ دابینكرنا چاره‌سه‌ریێن پێتڤى و بهایه‌كێ
گۆنجایى لدیف شیانێن خه‌لكى ل ده‌رمانخانا دیار كه‌ت و چاڤدێریه‌كا به‌رده‌وام هه‌بیت.
هه‌ر كه‌سێ هه‌وجه‌ى خه‌سته‌خانه و نۆژدارا نه‌بیت،
نزانیت چ ماڵوێرانى یه..! و گازندێن خه‌لكى چه‌ندن..
پێتڤى یه حكومه‌تا هه‌رێما كوردستانێ و سازیێن ده‌ستهه‌لاتێ
له‌زێ ل ڤه‌دیتنا چاره‌سه‌ریه‌كا زوو بكه‌ن بۆ دانانا سیسته‌مه‌كێ ساخله‌می كۆ د
به‌رژه‌وه‌ندا خه‌لكیدا بیت و زێده‌تر پشته‌ڤانیا خه‌سته‌خانێن حكومى بكه‌ت بۆ دابینكرنا
چاره‌سه‌ریێن پێتڤى و هه‌تا وى ده‌مى هه‌وڵ بده‌ت بهایێن ده‌رمانا ل ده‌رمانخانێن
تایبه‌ت كێم بكه‌ت و چاڤدێریه‌كا به‌رده‌وام هه‌بیت، چونكى ئه‌ڤا نهۆ هه‌ى نه
چاره‌سه‌ریا خه‌لكى یه، به‌لكى كۆشتن و ڤه‌ڕچاندنا خه‌لكێ هه‌ژار و كێم ده‌ڕامه‌ته
ل كوردستانێ...! ئه‌گه‌ر نه خه‌لك زێده‌تر خۆ لبه‌ر ناگریت.