کی نەساخە خەلک یان پزیشک!

شهاب ئاکرەیی
هەڤالەکێ کو ل ئەوڕۆپا یە گۆتە من، پزیشکەکێ ئەورۆپی گۆت: دەما ڤەدگەڕێی بۆ وەلاتێ خۆ، هەرە بێژە حکومەتا هەرێمێ، پرانییا پزیشکێن وە ب دەردێ پارەی د نەخۆشن، وان رەوانەی ئەوڕۆپا بکەن، بەسە خەلکی ب راپۆرتێن وان رەوانەی ئەوڕۆپا نەکەن!.
تۆ ب خودێ کەی، ب کورتی ببێژێ، پرانییا خەلکێ هەرێمێ یێن ساخلەمن و دلسادە و دەرون پاک و خۆش باوەڕن، لێ مخابن! پزیشکان دەرونێ وەلاتی تێکدایە و بەریکا وی تاڵان و ژیانا وی ڤاڵا و بێ رامان کریە، بتەنێ ژبۆ پارەی.
پرانییا پزیشکان نەساخن، ئەگەر ئەو چێبوونەڤە ژ دەردێ کێم دەوامییا ل نەخۆشخانێن حکومەتێ و راکێشانا نەساخان ژ بۆ کلینک و کومەڵگەهێن خۆ یێن پزیشکییێن تایبەت، شیان زاڵبن لسەر دەردێ هەڤپشکییا پیشە و کاری و پارەی، چۆنکە وەکو دهێتە زانین، کو پزیشک و دەرمانساز و بازرگانێ دەرمانان د کومەڵگەهێن پزیشکی دا، ل گەل هەموو پشکێن تیشکی و سۆنارێ، و تاقیگەهـێ، و دەرمانخانێ و ...هتد. هەڤپشکن، بەریکا نەخۆشی ڤەدچڕن، سەرباری ساخلەمییا وی ژی وێران دکەن!.
ل گەل رێزێن من بۆ هندەک پزیشکێن بڕێز، یێن کو ب نەچاری د وان کومەڵگەهان دا کار دکەن، و هێش مرۆڤایەتی د سەرێ وان دا دلڤیت و ویژدانا وان زیندی و چاڵاکە، و هێش پیشەیا پزیشکیێ ب پیشەیەکا مرۆڤایەتی دزانن.
یا پێدڤی ژی ئەوە، کو لایەنێن پەیوەندیدار ئەڤ سیسەمێ هەم نەخۆش و هەم پزیشک تێدا دبەرزە بهێتە و گۆهڕین، داکو بکەڤیتە دخزمەتا جڤاکی دا.

لسەر ڤێ مژارێ "ئەسکەندەرێ مەکدونی" راست گۆت بوو "ئەز ب ئالیکارییا گەلەک پزیشکان دمرم"، دوماهی گۆتنا ب دلێ من ژی ئەوە یاکو "بەنژامین فڕانکلن"ێ دامەزرێنەرێ ویلایەتێن یەکبوویێن ئەمریکا گۆتی"خودێ چاک دکەتەڤە و پزیشک هەقی وەردگرن، هەموو لایەک بەردەوام بەختەوەر و پاراستی بن.