جوتیار و ب عەردی وەركرنا باجان سوركان!

رزگار چەمباھیڤی
گەلەک جارا ئەم ل سەر کەنالێن ئاسمانی دبینن، دەمێ بەرھەمێ جوتیارێن مە پێکڤە دگەهیت و ب شێوەیەکێ زور دکەڤیتە دناڤا بازاریدا و ژبەر پێکڤە گەهشتنا وی، دێ ب بھایەكێ هەرزان دناڤ بازاریدا هێتە فروتنێ. ئەڤ چەندە ژی دبیتە جهێ دلگرانیا جوتیاری و ژبەر نەبونا بازاری، گەلەک جوتیار رادبن ب هاڤێتنا بەرھەمێ خو و تایبەت ژی (باجان و خیار)ان. ئەرێ ما هاڤێتنا ڤی بەرھەمی لسەر جادەیان چارەسەرییە؟ بدیتنا من کوفرکرنە ب نیعمەتێن خودێ.

ئەرێ گەلۆ شوینا تو ڤی بەرەبومی بهاڤێژی! تو بوچی نادی خێر دا خودێ هندەک دەرگەهێن دی بوتە ڤەکەت، چونکی پێغەمبەرێ مە (س) ی سیند خاری و دبێژیت چ مال ب خێرو سەدەقێ کێم نابت و مانە دێ ئەڤ چەندە چێتربیت ژ هاڤێتنەکێ، کو چ کەس مفایێ ژێ نەبینن. ئەرێ ما ئەڤە نەتشتەکێ هەڤدژە هاڤینێ وی رزقی بهاڤێژی و کوفریێ ب نیعمەتێن خودێ بکەی و زڤستانێ بچی نڤێژێن بارانێ و دەستێ خو بۆ خودێ بلندبكەی دا بارانێ ببارینت و ئەڤە چەند سالەکە ئەڤ چەندە دهێتە رویدان.
دزانم ئەی جوتیار، ئەڤە ئەرکێ حکومەتێ و لایەنێن بەرپرسیارە بۆ وە بازاری پەیدابکەت و هوین بەرەبومێ خو تێدا بفروشن، هەروەسا دڤێت حوکمەت هندەک پێنگاڤێن رژد بھاڤێژیت و ل گەلەک وەلاتێن جیهانێ کەرتێ کوشتوکالی ژیدەرەکێ سەرەکییێ داهاتییە، دڤێت حوکومەت گرنگییێ پێ بدەت، دا جوتیار ژی بگەهیت بھایێ ماندیبونا خوو و بشێت بەردەوامییێ پێ بدەت.