خوەنیشاندانێن لایەنگرێن ڕەوتا سەدری و ئاماژێن خراب!؟

نایف مەحمود
خوەنیشاندانێن ڤێ داویێ ل عێراقێ وێ چەندێ دگەهینن کو ناڤخویا عێراقێ یا ئالوزە و تا نها ئالیێن بەشداری هەلبژارتنان نەکارینە حکومەتا نو یا عێراقێ پێک بینن، ئەڤ هەڤرکیا دناڤبەرا چارچێوێ هەماهەنگی(ایطار التنسیق) یاکو پتر سەرکێشیا نوری مالکی تێدا دیادبیت و هەڤپەیمانیا رزگاری نیشتمانی(انقاظ الوطن) ب سەرکێشیا موقتەدا سەدری.

 هەلبەت پشتی کوتلا سەدری ب هەڤپەیمانێن دگەلدا نەکارین حکومەتێ پێک بینن، ئەو بۆ ژنشکەکێ ڤە سەدری بریارا دەست ژکارکێشانا ئەندام پەرلەمانێن خوەدا و گورەپان بۆ چارچێوێ هەماهەنگی هاتە چولکرن و بڤێ چەندێ دەست ب دان و ستاندنان دگەل ئالیێن سیاسی کر، بۆ پێکئینانا حکومەتێ ژ دەرڤەی بەژداریا هەڤپەیمانیا سەدری ب مەرجێ وێ یەکێ یا هاتیە تاقیرن نابیت دوبارە بهێتە تاقیکرن د ئەزمونا حکومرانیا عێراقێدا، بەلێ دەرچونا سەدری ژ ڤێ هاوکێشێ نەکو دێ چیت مال ڕینیتە خارێ و پالدەت، بەلکی دیاربۆ کو گورەپانێ ژ لایێ لڤاندن و شلقاندنا جادێ دێ گەرم کەت و چ یا ب دلێ وی نەبیت  دێ رەفز کەت، ئانکو دێ هەیبەتا خوە ل جادێ ب رێکا جەماوەری نیشا لایەنێن عێراقی دەت.

 ژبلی بابەتێ هەلبژارتنا سەرۆک کوماری کو بویە گرێیەک دناڤبەرا پارتی و یەکێتی، ئەڤە بابەتەکێ دییە و ناچینە ل سەر ڤێ مژارێ، بەلکی یا کو ل بەر چاڤێن مە ڕون و ئاشکرا کو خوەنیشاندانێن لایەنگرێن سەدری ئاماژێن خراب و نەدلخوشکەر دەسەلمینن کو گەر هوسابیت بزەحمەت حکومەت ژلایێ چارچێوێ هەماهەنگیڤە بهێتە پێکئینان، نەمەرجە گەر بڤی شێوەی بیت بارودوخ ئالوزتر لێ بهێت بەرەڤ شەڕەکێ ناڤخویی ل عێراقێ بچیت، کو کەس هیڤیا ڤێ چەندێ ناخازیت چونکی دێ ئارامیا عێراقێ بگشتی تێکچیت، چونا ناڤپەرلەمانی ژلایێ لایەنگرێن سەدریڤە و دەرکەفتنا نوری مالکی ب چەکڤە دیسان ئاماژەیەکا خراب ل پەی خو دئینیتە ڕوژەڤێ و ئەڤێ چەندێ ژی تاراداەیەکی ترس و دو دلی ئێخستە جادێ و ڕەوش ئالوزکریە چونکی هەڤرکیێن دژوار سەرکێشیێ دکێشن ژبۆ پتر تێکدانا ڤان کاودانێن عێراق تێدا دەرباز دبیت.