رۆژا جیهانیا گەنجا و لاوان

لاوین سلێڤانەی
براستی من دڤیا ئەڤ رۆژە هاتبا و گەنجین مە چ ل وەلاتی خوە یان دەرڤەی وەلاتی، بهایێ خوە و هەبوونا خوە زانیبان. پلانەک هەبا ژیانا ڤان گەنجا پتر هاتبا ریکخستنێ، نەکو کەمپێن ئەلمانیا و سنورێن بیلاروسیا و کەنارێن دەریایێ ئیجە ڤەحواندبان، چونکی تاکە هێزا وەلات پێ دئێت ئاڤاکرنێ گەنجن و ئەو پاشەرۆژا هەر مللەتەکێ نە.
 ئەگەر ئەم بەری خوە بدن کوردستانێ، سالانە رێژەیەک زێدە ژ دەرچوویێن زانکویا باوەرنامێن جودا ب دەست خوە ڤەدئینن، بەلێ هەتا دچت باوەرنامەیا خوە ژ زانکوی وەردگرت ٥٠ هزار دینارا دەین دکت حەقێ باوەرنامی. باشە مانە کارەساتە تو شازدە سالا بخوینی لدوماهیکێ ئەو خواندن نەشێت حەقێ بدەست ڤەئینانا باوەرنامێ بکت دبەریکا تەدا! مە دەرچوویێن هەین ل پشکێن جورا جور، بەلێ ژ بەر نەبوونا پلانەک ریکخستی و بەلانسەک درست، رۆژ بو رۆژێ ئەڤ دەرچوو وەک گولەکێ ژبەر نەبوونا ئاڤێ دچرمسن و گەشبوونا خوە ژدەست دن، ژ ئەگەری بەتالی و بی کاریێ.
 ئەڤە بۆ ماوەی هەشت سالایە دامەزراندن یا راوەستای و کەرتی تایبەت ژی ب وێ ریژی کارگەھ نە هاتنە دانان هەمی دەرچوویا بدن کاری، ئەڤەژی کارتێکرنەکا نەرێنی ل سەر رەوشا گەنجا هەیە، ژبلی ئەوی باوەرناما نە هەی ئاستەنگین درێکا وی دا پترن. ئەز دبینم گوپیتکا بێ هیڤیبوونێ یە دەمی گەنج دبێژت خوزی من ژیێ خوە ب خواندنێ ڤە نە بوراندبا و من خوە فێری کارەکێ کربا ئان ئەز ل بەر دەستێ دکاندارەکێ دکانا پیشەسازی بام، نوکە ئەز دا بمە هوستا و ژیانا خوە ب خوشی و ب سەرفەرازی بم سەری. نەکو ئەز د بهارا ژیێ خوە دابم چاڤێ من ل ئێکی بت مەسەرەفێ ل من بکت و ئەز ژ هیڤیێن ژیانا خوە بێ بەهر بم و نە هەڤژینێ پێک بینم و نە بم خودان ترومبێل و نەشێم بچم گەریانەکێ. رۆژ و هەیڤ و سالا ژ ژیێ من بچن و ئەز هەر ل جهێ خوە بم و چ گوهورین ل من پەیدا نەبن.
 ئاریشە ل کوردستانێ گەلەک ب زحمەتە، گرتنا دەرگەهێ دامەزراندنێ و نەبوونا دەلیڤێن کاری ل کەرتی تایبەت و رێکخراوا و نەدانا قەرزا بۆ گەنجا بۆ خوە پێ پرۆژەیەکێ ڤەکن هەتا ریکێ نادن وان کاری خوبەخشی ژی بکن، لدویڤ حەزا خوە بی بەرامبەر، سەر هندێ را هەر رۆژ دێ زانکو ئان پەیمانگەهەکا ئەهلی ڤەکن و کومەک قوتابیا لێ وەرگرن دێ دی باوەرنامای ئینن و ب رەخ هەڤالێن خوە ڤە رینن خواری ، تشتی دل گران ئەوە ل هەمی هەلکەفتا دئیت گوتنێ کاری هەی بس گەنجێ ژ خوە ناگرت بکت.