ئەرێ ئایین شورەشە یان ئافیونە؟!!

ردوان گولی
پێتولێ ئەلمانی فریدریش ویلهام نیچە (1844 - 1900) دبێژت: ئایین شورەشا بەندانە و كارل ماركس ئابورناس و دیرۆكڤان و كومەلناسێ ئەلمانی (1818 - 1883) دبێژت: ئایین ئافیونێ گەلانە. ل دویڤ تێگەهشتنا جڤاكناسێ عێراق یێ ناڤدار دكتور عەلی ئەلوەردی ئەڤ هەردووك گوتنە یان بیردوزە راستن و دروستن، چونكە ئایین دهێتە بكارهینان ل دویڤ حەز و ڤیانا كەسێن خودان دەستهلاتدار و دراڤ ب درێژاهیا دیرووكێ. لدویڤ تێگەهشتنا من، ئایینێ ئیسلامێ هاتیە هەتا مرۆڤی رزگاركەت ژ هەمی جورێن تەپەسەری و بەنداتیێ بتنێ بۆ خودێ نەبیت، چونكە ئایین گوهورینەكا تەڤگر و خوەرستی د هەمی بیاڤێن ژیانا مرۆڤیدا دروست دكەت و كەسێن خودان باوەر، بتنێ ژ خودێ دترسن نەك بەندێن وی.
 لەوما دەمێ دبینن هندەك كەس یان سەرۆك و میر و بەرپرسێن حكومی زولم و ستەمێ ل هەمبەری هاوەلاتیان دكەن، ئەو رازی نابن بڤێ چەندێ و دڤێن گوهورینێ بكەن و ب درێژاهیا دیرۆكا ئیسلامێ، ب هزاران كەس هەبوونە دژی زورداریا دەستهەلاتداران یێن راوەستاین و یا گوتی ستەمكاران ستوپ، هەتا ڤێرێ و بەسە.
 ئەڤ چەندە ل دویڤ گوتنا پێغەمبەری سلاڤێن خودێ ل سەر بن (سيد الشهداء حمزة بن عبدالمطلب ، ورجل قام الى امام جائر فأمره ونهاه فقتله)، ئانكو پێشەوایێ شەهیدان حەمزەیە و زەلامەك ل هەمبەری زوردارەكی رابیت و فەرمانێ ل بكەت و نەهیا وی بكەت ئەوی ب كوژت، و هەروەسا ل جهەكێ دیتر هاتیە دبێژیت: (أفضل الجهاد كلمة عَدْلٍ عند سُلْطَانٍ جَائِر)، باشترین جیهاد گوتنا راستە – دادپەروەریە ل دەڤ دەستهەلاتدارەكێ زوردار. ئایین هێزەكا خوەرستی ددەت مروڤی بتنێ ژ خودێ بترسیت نەك ژ كەسێن زوردار و ستەمكار و دیرووكا ئیسلامێ یا پری هەلویستێن كەسێن دلشێرە یێن ل هەمبەری زورداران راوەستاین و گیانێ خوە یێ پیروز پێشكێشی پرەنسیپێن خوە كری.

ئەگەر ل دویڤ تێگەهشتنا رێچا سەلەفیان(مەدخەلیان) بیت، بۆ تێكستێن قورئانا پیروز و فەرمودێن پێغەمبەری سلاڤێن خودێ ل سەر بن و رویدانێن دیرۆكا ئیسلامی، دڤێت مرۆڤێ مسلمان ل ژێر سیبەرا حاكمی دەرنەكەڤیت و دژی وی نە راوەستیت و پشتەڤانی و هاریكاریا وی بكەت، بلا ئەڤ حاكمە بتنێ بناڤ مسلمان بیت و هیچ ئەركەكێ ئیسلامی نەكەت.
 ئەڤ مەدخەلیە ئاماژێ ب فەرموودەكا پێغەمبەری سلاڤێن خودێ ل سەر بن ددەن (وان جلد ظهرك وأخذ مالك)، ئانكو پێدڤیە ل سەر كەسێ مسلمان گوهداریا حاكمی بكەت خوە ئەگەر پشتا وی جەلدە بدەت و بقوتت و مالێ وی ژێ بستینت. ئەڤ گوتنە زانایێن فەرموودان هەمی ل سەر نە رێكەفتینە كو سەد ژ سەدێ یا دروستە و هەتا گەهشتی وی رادەی ل ڤی سەردەمی بانگخوازێ مەدخلی یێ سعودی (عبدالعزیز الریس) بێژیت: خوە ئەگەر حاكمی رۆژانە نیڤ دەمژمێرێ سكس كر و مەی ڤەخار و ل سەر تەلەفزیونێ هاتە پەخشكرن، دروست نینە  ل دژی وی راوەستی و بەحسێ وی ب خرابی بكەی، بەلێ دڤێت هەر پشتەڤانیا وی بكەی؟!!
 ئەگەر شروڤەكرنا ئیسلامێ ل دویڤ هزرا مەدخەلیان بیت، ل وی دەمی  گوتنا (كارل ماركس) دێ راستر دەركەڤیت، كو ئایین ئافیونا گەلانە و خەلكی بێ هوش دكەت و ژیرێ خوە بكارناهینن و بتنێ گوهداریا هندەك كەسان دكەن، هەر وەكی دێ بێژی ئاقل و ژیرێ وان یێ ل بهێنڤەدانێ و زانایێن مەدخەلیان یێن ل شوینا وی هزردكەن.