بەس ب (وەرزشێ و هۆنەرێ) یێ ناجحە!!

دلدار محەمەد
یا کو ل ڤان رۆژا د تۆرێن جڤاکی دا گەلەک دکەڤیته  بەرچاڤێن مرۆڤی، بەلاڤکرنا باوەرنامێن زارۆک و قوتابییانە، هەلبەت هەمی ژی ئەو قوتابی نە ئەوێن سەرکەفتی، چونکی ئەم د جڤاکی دا پیتەی ددەینە یێن سەرکەفتی و ئەوێن د پێدڤی مە بۆ سەرکەفتنێ ئەم ب پشتگوهڤە د هاڤێین، بەلێ ژبلی ڤێ چەندێ ژی گەلەک جاران وەکی نوکتەکێ لێ هاتیە دبێژن، فلان قوتابیەکێ لاوازە بتنێ ب وەرزش و هونەرێ یێ ناجح بوی؟!
چەند نوکتەکا خەمگینە!
خوزی سەد خۆزی مە تاکەک هەبا د جڤاکی دا ژ راست ب وەرزش و هونەران سەد هەبا یان ژی ل شوینا سەدا سەختە  پێنجی یەکا ژ راستی هەبا، گەلۆ خودانێن ڤان هەمی نمرە سەدا پا تو بێژی شوین دەستێن وان د جوانکرنا پاشەرۆژێ دا هەبن!
ئەڤە دەم گەهشتە سالا 2023 ێ و پرانیا زارۆکێن مە ژی وەکی دایک و بابێن خۆ چ تشتان ژ ڤان هەردوو وانەیان وەرناگرن، ژبلی ب چاڤ دیتنا دەم بورینێ و پیتەنەدانەکا مەزن بڤان وانەیێن گەلەک جاران نامەیێن گەلەک گەلێن جیهانێ گەهاندین ژبیرنەکەین ئەڤە ژ پشتی سەرهلدنا سالا 1991 پتر ژ سیهـ سالان دەربازبوون، ما نەدەمە ئەم ژی ژ خەو را ببین و ئاڤریەکێ ل ساخلەم پەروەردەکرنا خۆ و زاروکێن خۆ بدەین، ما ئەڤ هەمی نمرێن بلند و بێ ئەنجام دێ چ ل ئاڤاکرنا تاکێن جڤاکی زێدەکەت، ژبلی خاپاندنا زارۆکەکی ب نمرەیەکا بێ وەستیان پری د سەردابڕن،  داکو ل پاشەرۆژێ ببیتە کەسەکێ پر ژ خەون و ئارەزویێن مری.