گرنگیا سیاسی و ئینسانی و یاسایی یا جینۆسایدناسکرنا ئێزدیان ل ئەڵمانیا

رزگار حمید شریف
پشتی ئوسترالیا و بەلجیکا و هۆلەندا، ئەڤرۆ سێ فراکسیۆنێن پەرلەمانێ ئەڵمانیا (Bundestag)ژ ئیتلافا سەنتەر و کۆنسەرڤاتیڤان ب ئامادبوونا بەرپرسێن مەزنێن ئەڵمانیا و میرێ ئێزدیان و نوینەرێ حکومەتا هەرێما کوردستانێ، کۆمکوژیا ئێزدیان ل سەر دەستێ داعش ل سالا ٢٠١٤ ب هەمی پیڤەران جینۆساید ناسکرن. ئەڤ بڕیارا گرنگ پشتی نەھـ ساڵان ژ خەبات و ڤەکولین و کۆمکرنا بەلگەیان ژ لایێ حکومەتا هەرێما کوردستانێ دگەل یوئێن و ڕێکخراوێن مرۆڤ دۆست وەک “هاوار” و حکومەتا ئەڵمانیا و بسپۆرێن جینۆسایدێ هات.

ل ئەڵمانیا نێزیک ٢٠٠.٠٠٠ ئێزدی ئاکنجینە و ئەڵمانیا بەردەوام هاریکاریا قوربانیێن دەستێ داعش دایە ب وەرگرتنا وان وەک پەنابەرێن سیاسی و ڤەکرنا سەنتەرێن چارەسەریا نەخوەشییێن تراوما و دادگەهیکرنا تاوانبارێن داعش.

ڤێ بڕیارا جینۆسایدناسکرنێ چەند ئالیەک سیاسی و یاسایی و مرۆڤاتی هەیە. ژ ئالیێ سیاسیڤە ئەڤ بڕیارە حکومەتا ئەڵمانیا ناچار دکەت گڤاشتنێ بێختە سەر حکومەتا عێراقێ بۆ ڤەگەریان و پاراستنا ئێزدیان بۆ شنگارێ و رێگرتن ل جینوسایدێن پاشەرۆژێ. ژ ئالیێ یاساییڤە دادگەهێن ئەڵمانیا مەجبور دکەت ب هێزتر دیڤچوون و حوکمکرنا تاوانبارێن داعش بکەت.

ژ ئالیێ ئینسانیڤە ئەڤ بڕیارە ئارامیەکێ ددەتە مالباتێن قوربانیان، کو تاوانێن دژی وان نائێتە ژ بیرکرن و ل سەر حکومەتا ئەلمانیە فەرە کو هاریکاریا سەنتەرێ کۆمکرنا بەلگەیان ل سەر داعش بکەت بۆ مەرەمێن ئینسانی و دیرۆکی و نێڤدەولەتی ناسکرنا جینۆسایدا ئێزدیان و وەرگرتنا ئێزدیان وەک پەنابەرێن سیاسی.