بەردان(تەلاق) ئایا تاوانە؟!!!

عاسیما فەخری
بابەتێ جوودابوونێ (تەلاق) ڤان دووماھیان گەلەك دھێتە بەحسكرنێ، ژێکجودابوون دهێتە نیاسین ب ژێکڤەبوونا دوو هەڤژینان، ئەڤجا  پێش ڤەگوهاستنێ بیت یان پاش ڤەگوهاستنێ، ئەو ئەگەرێن بەردانێ دروستدکەن پێکئینانا زوی یا هەڤژینیێ، هەلبژارتنا کەسێ نە گونجایی، دروست تێنەگەهشتنا تێگەهی هەڤژینیێ، مایتێکرنا مالباتێن هەردوولایان دژیانا وان دا ئاریشان پەیدا دکەت، هەتا دگەهتە بەردانێ، ساریاتی و لاوازیا پەیوەندیێن سکسی ژی ژن و مێرا ژێک دویرکەن و جاران دبیتە ئەگەرێ بەردانێ.
بەردان د جڤاکێن ئەوروپیدا کارەکێ نورمالە و هەر ئێک ژ وان ب شێوەیەکێ ئاسایی ژیانا خۆ ب ڕێڤەدبەت، لێ د جڤاکێ مەیێ کوردی دا کارەکێ ب شەرمە و هەتا هندەک ب تاوان ل قەلەمددەن، دێ بێژن چەوان دێ ژ هەڤژینێ خۆ جودابی و شەرمە کەسێ ژ ماڵا مە یان بنەماڵا مە ئەڤ تشتە نەکریە و دێ بینە سەحبەتێن جڤاتان و خەلک دێ چ دەربارەی تە و خێزانا مە  بێژیت و پا زارۆیێن تە چ دێ پاشەرۆژا وان چ لێهێت،گەر تو کاربکەی ژی گەلەک کەس دێ وەسا باس ل تەکەن، تو ب ڕێیەکا نەیا دروست پاران بدەستخۆڤەئینی.
ئەڤجا هندەک کەس دێ لسەر پەیڤن بێی کو ڕاستییا بابەتی بزانن و کا چ تشتەک ڕوویدایە دێ هزار و ئێک ئاخفتنا لسەر بێژن و ب چاڤەکێ کێم و کەسەکا نە سەرکەفتی تەماشەیی وێ ژنێ کەن.
ئەڤ دیتنا خەلەت ناگونجیت دگەل بنەمایێن ئیسلامێ، بەلکو دابونەریتێن خەلەتن دناڤ مەدا ماین، ئەو فاکتەرێن دبنە ڕێگر هەمبەر بەردانێ پلا ئێکێ خێزانێن هەردوولایان پلا دووێ عەشیرەت و پلا سێیێ داب و نەریت ژبەرکو ب دیتنا وان بەردان کارەکێ شاشە و ب شەرمە.
بەردان نە تاوانە و د ئیسلامێ ژیدا حەلالە و جاران چارەسەریە، باشترە ل شوینا دوو خێزان د نەخوشیێ دا بن و دوو هەڤژینێن نە سەرکەفتی و نەگونجن، بەردەوام ئێک و دوو ئازار بدەن و گەلەک قوربانیا بدەن، باشترە ژ ئێک بهێنە بەردان و هەر ئێک ب دەست ژیانا خۆ بکەت و جڤاک ژی دیتنا خۆ بۆ ژنا بەردای بگوهریت، چونکە وێ ژی دووبارە مافێ ژیانێ هەیە و مافێ وێیە ژیانەکا نوی پێک بینیت.
گرنگە ژی دیتنا كو كومەلگەھی بۆ ژنا بەردای یان زەلامێ بەردای بێتە گوھورین، ژبەركو بەردان نە شكەستنە یان كێماسینە، بەلكو ھەستكرنە ب بەرپرساتیێ و دا كارتێكرنا مانەكا دگەل ئێك یا نەتەندروست بەردەوام نەبیت، دڤێت ھەر ئێك ژوان ژیانەكا نوی دەست پێبكەت.