بەراوردكرنەك دناڤبەرا (وەزیرێت من و وەزیرێت حكومەتێ)دا!

غەریب كەمال
وەزیر و وەزارەت، د ئەڤێ هەرێما ب قەبارەی بچیک و ب رێژا روونشتڤانا کێم، ل سەر دەریا و زەریایێت نەفتێ و داهاتەکێ هندە مەزن، کو هەتا نوکە کەسەک نزانیت چەندە، هەتا نوکە نزانن کارێ وان چییە و بتنێ یێ د ماینە ب خو زەنگینکرنێ ڤە و کرین و ئاڤاکرنا ڤێلا و مەزرەعا و درێژناکەم دەمێ دبێژن هتدددد.
من سێ وەزیرێت هەین، ئەز ژی دێ دگەل سێ وەزیرێت حکومەتێ بەراورد کەم و بلا خواندەڤانێت عەزیز، بریارێ لسەر بدەن کا یێت من وەزیرن یان یێت وان!

وەزیرێت من
1ـ یوسف وەزیڕێ تەندروستی: ئەگەر خودێ نەکەت ئێک ژ مە ل مالێ نەخوش بوو، دێ بابو مە بەتە نەخوشخانێ و پارێ مە دێ ئەو دەت و دەمێ دزڤرین بۆ مالێ، دێ ل خارنگەهێ خارنێ خوین و بەری زڤرینێ دێ ئایسکریمێ بومە کریت.
2ـ سموو وەزیرێ کشتوکاڵی: دەمێ بابو سماقێ و باهیڤا دفروشیت، دێ 13% وی پارەی دەتە مە و ئەگەر ما ل گومرکێ و نەهاتە فروتن، دێ زیان ب ئابورێ خێزانێ کەڤیت.
3ـ ئایناس وەزیرا دارایی: هەمی ئێڤاریا ئەگەر بابوی هزارەک دا مە، دێ ئەمژی چینە دکانێ چپسا یان موتا بۆ خوە كرین.
دەرئەنجام: وەزیرێت من دل پاکژ و خودان وژدان و ب رەحم و دلوڤانن.

وەزیرێت وان
1ـ وەزیرێ تەندروستی: ئەگەر بەغدا دەرمان ڤریکرن، دێ ل سەر نەخوشا بەڵاڤ کەین.
2ـ وەزیرێ كشتوکاڵی: ئەگەر بەغدا پارێ جوتیارا ڤرێکر، دێ ل سەر جوتیارا دابەشکەین.
3ـ وەزیرێ دارایی: ئەگەر بەغدا پارە فرێکرن، دێ موچەی ل سەر فەرمانبەرا دابەش کەین.
دەرئەنجام: ب دیدەڤانییا خەلكی، وەزیرێت وان ب ھەمیڤە بەروڤاژییا وەزیرێن منن، بتنێ چاڤێ وان یێ ل خێزان و زاروکێت وانن.