زمان ناسناما مللەتێ بێ دەولەتە!!!

قابیل محەمەد

زمان نیشانە و هێمایا هەڕ گەل و نەتەوە و میللەتەكە، کو پێ دهێتەنیاسین، ئەم دێ شێین ب بێژین كو زمان د ڕاستیدا ناسنامەیا نەتەوێ بێ دەولەتە. ئەو زمانێ ئەم رۆژانە پێ دئاخڤین پێ ل هەڤدوو دگەهین ژێڕا دبێژین زمانێ دایک. هەر گەل و نەتەوەیەک ی زمان و چاند و خاک و زانا و سەرکردە و  و هێزا خوە تێت ناس کرن. ئەز د گەل وێ چەندێمە کو هەر زمانەک كو مرۆڤ بزانیت و فێر بیت زور باشە، لێ زمانێ دایک زمانەک تایبەتە دڤێت گرنگیەکا زێدە پێ بهێت دان و سەرەکی بیت.
خواندن و زانست ل دەستپێکا سەدێ بیستێ بەئاوایەکی تا رادەیەکی باش  ل ناڤ مللەتێ کورد یا دەست پێکری و گەشەکری، نکولی لێ ناهێتەکرن کو خواندن روهنکەرێ ژیانێیە، لێ ل دەمەکی دا ئەڤ خواندەوریا نهۆ بوویە هۆکار ومەترسیەکا مەزنە بۆ سەر زمانێ کوردی چونکی خواندن نهۆ ب زمانێ کوردی نییە ل قوتابخانە و راگەهاندن و تۆرێن جڤاکی زارۆ و نڤشێ نوو فێری غەیری زمانێ کوردی دبن، تایبەت ل جهێن ئەکادیمی یێت خواندنێ زمانێ کوردی وەکو بابەتەکێ نەسەرەکی و فەراموشکریە لێ هاتییە.
ل لایەکێ دن زمانێ کوردی ژلایێ بەرپرس و کارب دەستێن ڤی نەتەوەی چ گرنگ پێ ناهێتەدان، زێدەتر دبینین زمانێ بیانی ل دەمێ کاری مەرجێ ئێکێ یە ئانکو دای باب نەحەق نینە زارۆیێن خۆ فێری زمانێ نان پەیداکرنێ بکەن.
خالەکا دی یا گرنگ ئەڤ سیستەمێ خواندنێ ل ناڤ مللەتێ مە کو ب دوو شێوە زارا دخوینن ئەڤ چەندەش  مەترسیەک و هۆکارەکە کو لێک تێنەگەهشتن دروست بیت ل ناڤبەر هاولاتیان تایبەت نهۆ ڤێ دیاردێ دبینین ل ناڤبەرا کەسەکێ سلێمانی و دهۆکێ پێتڤی ب وەرگێرەکی هەیە ل دەمێ ئاخفتنێ.
دیسا راگەهاندن و بێ سەنسۆری هەوال و دراما و بەرنامێن دوور ل ئاداب و کەلتور ژین و ژیارا کوردەواری ئەڤەش دبنە پالنەر کوتاکێ کورد ل سۆز و خۆشەویستی بۆ زمان و نەتەوەو رابەر و سەرکردێ خۆ دوور بێخیت.
ئەگەر ب ڤی شێوەی بیت پشتی چەند سالێن دی زارۆیێن مە دێ بێژن باب و پاپیرێ مە ب زمانەکی دئاخفتن ژێرا دگۆت زمانێ کوردی.
ل دماهیێ دبێژم دڤێت ئاورەکا جدی ل ڤی بابەتی بدەن هەول بۆ زمانێ ستاندەرێ کوردی بدەن تا زمانێ کوردی ژناڤچوونێ ب پارێزیت.