گه‌نجه‌ك ل مه‌له‌ڤانگه‌هێ

د. عبدالباقي مایی
دوهی ئه‌ز ل مه‌له‌ڤانگه‌هێ د گه‌ل ٣ گه‌نجێن ١٥-١٦ سالی بومه‌ هه‌ڤال.
پشتی من سلاڤ كری هه‌ر ٣ گه‌نجان ل ناڤ قولته‌ینكا په‌قپه‌قوشكان ل مه‌له‌ڤانگه‌هێ من پسیار كر:
ئه‌ڤ قولته‌ینه‌ یا گه‌رمتره‌ ئان ئه‌ڤا ژ ره‌خڤه‌؟
ئێكی ژ وان به‌رسڤا من دا ئو گوت:
- ئه‌ڤه‌ گه‌له‌كا گه‌رمه‌.
من پسیار كر: بلا ئه‌ز ژی بهێم تێدا دگه‌ل هه‌وه روینم‌؟
هه‌ر وی گه‌نجی به‌رسڤا من دا ڤه‌ ئو گوت: بلا، كه‌ره‌مكه‌.
ئه‌ز چومه‌ د ناڤ قولته‌ینێ دا روینشتم ئو من پسیار ژ هه‌رسێ گه‌نجان كر:
- ئه‌ڤه‌ گه‌له‌كا گه‌رم و خوه‌شه‌، هوین ژمێژه‌ تێدا؟
ئه‌وێ به‌رسڤێت من هه‌ر جار د دان، جاره‌كا دی به‌رسڤ دا ئو گوت.
- نه‌، هه‌ما بێهنه‌كه‌. خال تو یێ ژ كیژ عه‌شیره‌تێی؟
- ما هوین بێژن ئه‌ز یێ ژ كیژ عه‌شیره‌تێمه‌‌؟ هه‌ر ئێك ژ هه‌وه‌ ٣ ده‌رفه‌تێن هه‌ین كا دێ زانن
ئان نه‌.
- ما ئه‌م دێ ژ كیڤه‌ زانین خال. هه‌ر وی گه‌نجی به‌رسڤا من دا. من گوتێ:
- به‌لكی هوین ژ ئاخفتنا من بزانن.
- تو یێ فلان عه‌شیره‌تێی؟
- نه‌، به‌لێ تو نێزیك بوی. ته‌ ٢ هه‌ولێن دی یێت ماین.
هه‌ر وی به‌رده‌وامی دا ئاخفتنا خوه‌ ئو گوت:
- ئه‌ز یێ “فلان” عه‌شیره‌تێمه‌، ژ “فلان” گوندی. من پسیار ژێ كر:
- تو ل سه‌فا چه‌ندێی؟
- بده‌نگه‌كێ نزم و خه‌مگین گوت: ئه‌ڤه‌ ٢ ساله‌ من مه‌دره‌سه‌ یا هێلای، سوبه‌هی دێ ل
خارنگه‌هه‌كێ ده‌ست ب شوله‌كی كه‌م.
- من پسیار ژێ كر: ته‌ بوچی مه‌كته‌ب هێلایه‌؟
هه‌ر بده‌نگه‌كێ نزم و خه‌مگین گوت: ئه‌ز د زیندانێ ڤه‌ بوم.
من گوتێ بوچی؟
گوته‌ من: من دگه‌ل هنده‌كا شه‌ر كر ئو ئێك ب چه‌قوكێ بریندار كر.
من گوتێ ما ته‌مه‌نێ ته‌ جه‌ند بوو؟ گوت: ١٥ سال.
پا چاوا تو گرتی ئو ته‌مه‌نێ ته‌ هێشتا دبن ١٨ سالیێ دا؟
گوت: بابێ من گوته‌ دادوه‌ری: بلا جزایێ خوه‌ وه‌رگریت دا چ جار وه‌نه‌كه‌ت.
ده‌ما ئه‌م ل خوه‌ زڤرین و مه‌ ئاگه‌ه ژ خوه‌ بوی، كو ده‌مێ روینشتنا مه‌ د قولته‌ینكا ئاڤا گه‌رمدا درێژ
ببو بێی مه‌ ئاگه‌ه ژێ هه‌بیت، مه‌ دیت هه‌ردوو هه‌ڤالێن وی ئه‌م هێلا بوین و چبون ناڤ بركا
مه‌له‌ڤانیا.
من هزرێن خوه‌ كرن بوچی ئه‌ڤ گه‌نجه‌ هوسا یێ تێهنی ئاخفتن بوو، ئو ژ هه‌ردوو هه‌ڤالێن خوه‌
یێن هه‌ڤ ته‌مه‌ن زیره‌ك تر ئو سوحبه‌ت خوه‌ش تر بوو؟!