مەترسیێن ل سەر هەرێما كوردستانێ؟!!

ردوان گولی
تیروریزم: زێدەباری كو دهێتە هژمارتن وەكی مەترسیەكا جیهانییە، و هێرشەكا ئێكجار مەزنە ل سەر هەرێما كوردستانێ ژلایێ رێكخراوا تیرورستییا داعش و توندرەوێن دیتر، چونكە راستە ژیوارەكێ گونجای دروست بوویە، پشتی نەمانا رژیما بەعس، بەلێ بێ هاریكاری و پشتەڤانیا وەلاتێن زلهێز و دەردورێن عێراقێ، زور زەحمەتە سەربگرت، هەر وەكی هێرشا ڤی دوماهیكێ یا تیرورستێن داعش و كونترولكرنا گەلەك ژ خاكا عێراقێ. و هێرشێن توركیا و ئیرانێ ل سەر ئاخا هەرێمێ و تیروركرنا هژمارەكا زور ژ خەلكێ سڤیل و بێ تاوان، و هەروەسا ئەندام و لاینگرێن دیموكراتا ئیرانێ و كاركەرێن كوردستانێ ل باشورێ كوردستانێ، و هەبوونا دەزگەهێن میتا توركی و ئیتیلاعاتا ئیرانێ و هندەك وەلاتێن دیتر، براستی جهێ مەترسی و گومانێنە، گەلەك كارێن تیرورستی بكەن دژی هاوەلاتیان، و ئاریشا و گرفتان دروستكەن دناڤبەرا هێز و لایەنێن كوردیدا ل دەڤەرێ، بمەرەما تێكدانا ئارامیێ و ژناڤبرنا قەوارێ هەرێما كوردستانێ.

بازرگانیكرن ب مادەیێن بێ هوشكەر: ئەڤرو ل سەرانسەری جیهانێ، گرفت و ئاریشا هەرە مەترسی و كارەساتبار هەر مادەیێن بێ هوشكەرە، و تەخا پتر بكاردهینن بێ گومان تەخا گەنجانە، ئەوژی هێز و شیانێن مللەتانن و پاشەروژا گەشا وەلاتینە، دەمێ هێزەكا داگیركەر بڤێت وەلاتێ بێخت ژێر كونترولا خوە، ئەڤێ رێكا چەپەل و مەترسی بكاردهینت هەر وەكی بریتانیا دژی وەلاتێ چینێ پەیرەوكری ل سالا (1839) و هاتیە نیاسین ددیرووكێدا ب(شەرێ ئافیونی) و دبێژن پتر ژ(100) ملیون چینیان ئالودەبوون بڤان مادەیێن بێ هوشكەر، و هەتا دوماهیكی چین نەچاربوو خوە رادەستی بریتانیا كر، نوكە كوردستان ل بەردەم مەترسیەكا ئێكجار مەزن دایە، و ئەڤ ژەهرا  كوژەك بشێوەكێ بەرچاڤ دناڤ تەخا گەنجاندا بەلاڤ بوویە، و ژێدەرێ سەرەكی وەلاتێ ئیرانێ یە، و زێدەباری خەمساری و بازرگانیكرنا هندەك بەرپرسێن هەرێمێ و رێكخوشكرن بو بەلاڤكرنا ڤێ ژەهرێ.

جاسوسی و نوكەری: هیچ گومان تێدا هەمی وەلاتێن هەڤسویێن هەرێما كوردستانێ، ئیران و توركیا و سوریا ب سەدەهان جاسوس و نوكەر و كرێگرتی هەنە ل دەڤەرێن هەرێما كوردستانێ و ب  تایبەتی ل باژێرێن سەر سنوری، و كەسێن دەرون نزم و بێ بنەما  هەر ب درێژاهیا دیرووكا مروڤایەتیێ هەنە خوە فروتینە بو هندەك پارا و خەلات و ئیمتیازاتان، ئەڤچا كارێ سیخوری دژی حكومەتا هەرێما كوردستانێ بیت یان هێزێن ئوپوزسیونێ بن یێن وەلاتێن دەردوری مە.

بازرگانیكرن ب شینواران: دەڤەرا دبێژنێ میزوپوتامیا، ئانكو وەلاتێ هەردووك رویباران دیجلە و فورات، كو دهێتە نیاسین دناڤ لاپەرێن دیرووكێدا ب لاندكا شارستانیەتێ، و كوردستان بەشەكە ژ ڤێ دەڤەرا دێرین و پری شینوار، زور جهێن كەڤنار و دێرین لێ هەنە، و هەروەسا بەلگە و كەرستێن ئەنتیك و ئالاڤێن دیرووكا وان دزڤریت بو چەرخێن بەری زایینێ، و ئەڤە گەنجینەكا زور گرنك و سەرنج راكێشە بو كەرتێ گشت و گوزارێ، و هاتنا سەیرانچیان ژ وەلاتێن بیانی بو كوردستانێ، و نوكە بازرگانی یا بڤێ چەندێ دهێتەكرن، بەرپرس و بازرگانێن مە ژ پترول و غازێ و سامانێن دیتر تێر نابن، ئەڤچا گەرا شینوار و دیرووكا كەڤنار و دێرینە.

بازرگانیكرن ب چەكی: ئێك ژ وان دیاردێن هەرە بەربەلاڤ دناڤ خەلكیدا، ل باشورێ كوردستانێ كرین و فروتنا چەكیە، ئەڤچا دەمانچە و كلاشینكوف و فیشەك و تەقەمەنی ب هەمی جورێن خوەڤە، زێدەباری هندەك جاران چەكێ گران ژی دكەڤیت بازاری، و سنورێن هەرێمێ هەتا رادەكی ڤەكرینە بو ئینان و برنا چەكی دگەل وەلاتێن جیران، و براستی ئەڤە مەترسیەكا ئێكجار مەزنە، و هەروەسا جڤاكێ كوردی جڤاكەكێ هوزەكیە، و هندەك هوزان هەتا چەكێ گران هەیە، یا پێدڤیە چەك بتنێ ددەستێن هێزا پێشمەرگەی و هێزێن ئێمناهیێدا بیت، و بریارێن توند و دژوار بهێنە دەرئێخستن ژلایێ حكومەتێڤە هەمبەری وان كەسێن بازرگانیێ دكەن ب چەكی، و بەری نوكە دەمانچە ژ ئوكراینا داهاتن عێراقێ و هەرێمێ، بەلێ نوكە یێ دبێژن ژ بەرازیل و كرواتیا دهێن و ب نرخەكێ خیالی دفروشن، و ئەڤ چەندە ل سەر نوكە و پاشەروژا خەلكی مەترسیە. 

دزین و سپیكرنا پارەی: پشتی سەرهلدانا سالا (1991) سەركردێن مە كوردان ب دزی و بازرگانیكرنا كەل و پەلێن پشەسازی و بەرمائیكێن حكومەتا عێراقێ دەستپێكر و دڤێت ئەڤ پارە بهێتە رەوانەكرن بو دەرڤەی وەلاتی و بكەڤیت ناڤ بانكان، و ئەڤ چەندە برێكا بازرگانان دهێتە ئەنجامدان، چ ب كرینا كارگەه و تاوەر و سەنتەرێن بازرگانی بیت ل ئوروپا و ئەمریكا.

بازرگانیكرن ب ئەندامێن لەشێ مروڤان و زاروكان: ئەڤرو ل زور ژ وەلاتێن جیهانێ، كارێ بازرگانیكرنێ ب ئەندامێن لەشێ مروڤی دكەن، و عێراقێ و هەرێما كوردستانێ ژی تا رادەكێ ئەڤ بازرگانیكرنە سەرهلدایە، و بتایبەتی كرینا گولچیسكێ و هندەك ئەندامێن دیتر، و ل هندەك وەلاتان وەكی مسرێ گروپ هەنە بتنێ ژبو رەڤاندنا زاروكان و فروتنا ئەندامێن لەشێ وان، و براستی ئەگەر رێگری ل بازرگانیكرنێ نە هێتەكرن، بێ گومان رەڤاندنا زاروكان دێ بیت دیاردە، و ئەڤە دێ جڤاكێ كوردی زور ئێشینت.

بەزاندنا سنورێن هەرێمێ: سنور د فەرهنگا هەر ولاتەكیدا ب پیروز دهێتە ناڤكرن، و بەزاندنا سنورێن وەلاتان دبیت ئەگەر و هوكارێ شەرێن مەزن و وێرانكەر، بەلێ بەزاندنا سنورێن هەرێما كوردستانێ ژلایێ توركیا و ئیرانێ، یا بووی كارەكێ روژانە و ئاسای بتنێ ئیدانەكرن و خوە نەرازیكرن، ئیسرائیل پاسدارێن ئیرانێ ل سوریێ دكوژت و ئیران هەڤلێرێ و كویێ توباران دكەت و فروكێن بێ فروكڤان دئینت سەر خەلكێ سڤیل و زاروكان، ب بهانا هەبوونا دەزگەهێ موسادا ئیسرائیلی و هەبوونا حزبا دیموكرات و كومەلە، و هەروەسا هێرشێن توركیا ل سەر خەلكی یا ئاشكرایە چ ل زاخو بیت یان شنگال و مەخمور بیت، ب بهانا هەبوونا سازیێن پارتا كاركەرێن كوردستانێ.

گەندەلی: كورت و كرمانج ئانكو سەركیڤكەك مەزن و بلند، تژی مشك و جورد تێدا مەزن دبن، و كونێن خوە دویر و درێژ دبن، و ئەگەر بلەز نە هێن چارەسەركرن، دێ بینی ژ نیشكەكێڤە هاتە خوارێ و هەرفی! ئەڤچا هەر جورێ گەندەلیێ بیت (سیاسی، كارگێری، مالی، جڤاكی وووو) ئەڤ ئێشا كوژەك و كوشندە كەتیە ناڤ لەشێ بەرپرسێن هەرێمێ و خەلكێ ئاسایی، و ئەڤ نەخوشیە ڤەگرە، هەر ژبەر هندێ گەلەك مەترسیدارە وەكی كورونایێ، و گەندەلی دبیت هوكارێ سەرەكی یێ لاوازبوونا باوەری و متمانا خەلكی ب حكومەتێ و دەزگەهێن فەرمی. .

دووبەرەكی: دیرروكا كوردان وەكی یا زور ژ مللەتێن دونیایێ پری دووبەرەكی و هەڤركیا نە تەندروست، و بتایبەتی هەردووك هێزێن سەرەكی و خودان لەشكەر و چەك و جاماوەر، دەمێ پەیوەندیێن ڤان هێزا دگەل ئێك خوش و تەندروست بن، ل وی دەمی خەلك هەتا رادەكێ یێ ئارام و پشت راستە، بەلێ دەمێ تێكچوون، مافێ خەلكیە بترسن ژ شەرێ ناڤخویی هەر وەكی بەری نوكە رویدای، راستە كاودانێن دونیایێ هاتینە گهورین بەلێ براستی ئەقل و ژیرێ سەركردێن كوردان باش نە هاتیە گهورین، و ئەڤ دووبەرەكیە ببیت ئەگەر مایتێكرن و دەستوەردانا وەلاتێن داگیركەرێن كوردستانێ ب شێوەكێ ئێكسەر.