سه‌رهلدانا زاخۆ, باژێره‌ك نه وه‌كی چ باژێران
3 مانگ پێش ئێستا
بژار
هادی
ئ ا ز ا د ی وه‌ك پرۆسه‌كا
به‌رده‌وام، ئازادییا نه‌زۆك.. ڕێك ناهێن هه‌لبژارتن, دڤێت
بهێن چێكرن! "سارته‌ر".
ده‌نگ
و ڕه‌نگ و وێنه‌یێن مه, و شێوازێ كاركرن و كارپێكرنا مه ژ چ ئه‌زموونێن داهێنه‌رانه
و زه‌مینه‌سازیێن ساخله‌م دا ژ دایك نه‌بووینه, هه‌ر تشتێ هه‌ستێن مه بۆ د لڤن و
دلێ مه پێ خۆه‌شه, كۆ ل ده‌مێ فۆرمه‌كێ وه‌ردگریت و ناڤ و نیشانه‌ك هه‌یه و ئه‌م
چوارچووڤه‌یان بۆ دروست دكه‌ین، كۆ د حه‌قیقه‌تێ دا ده‌ستكه‌ڤت و ده‌ستكردێن مه نینن,
هه‌تا ژیان و مرن و حه‌زژێكرن و ناڤ و نیشان و ناڤه‌ڕۆك و ناڤێن مه, نه بیر و
باوه‌ر و هزرێن مه, یێن مه نینن, ئه‌م ژ
دایكبوویی و هه‌لگرێن ڕۆحێن مری نه, ب ڕۆكه‌شی و ب كۆمه‌لایه‌تیبوونێ ئه‌م وه‌سان
دیاردكه‌ین كۆ ئه‌م گرێدایی ئێكن, ئه‌م وه‌كۆ ته‌نێن پێكڤه‌گرێدایی یێن فیزیكی دیاردكه‌ین,
لێ به‌رئێككه‌ڤتنا ڕۆح و دوستایه‌تییا گییانی چ ده‌مه‌كێ نه‌بوویه به‌شه‌ك ژ مه,
چ جاران به‌ر ئێككه‌فتن ڕامانا وێ چه‌ندێ نادت كۆ په‌یوه‌ندیێن تۆند و ڕاسته‌قینه
و پێكڤه‌گرێدان دناڤبه‌را وان دا هه‌یه, كۆ ب ڕێكه‌فت ل سه‌رده‌م و جوگرافیه‌كا
ده‌ست نیشانكریدا, دلینی و هه‌ڤسوزی و خوین وان پێكڤه گرێبده‌ت چ جارا ئه‌م ب ڤی
ئاوایی نه‌بووینه ته‌نێن گرێدایی و هه‌رده‌م دابڕانێ پستۆكێن مه‌یێن گرتین, دبیت
جارا به‌رژه‌وه‌ندی مه كۆم بكه‌ت, یان ترس ژ تنێبوونێ, بازار و كار و جه‌نگ, لێ
هه‌ر دید و به‌رێخۆه‌دانا جیاوازییا كه‌سان بۆ بۆها و دیارده و ئایدۆلۆژییا, په‌روه‌ردا
ناڤ مالێ و قوتابخانه و مزگه‌ڤت و كه‌نیسه و حزب, پێشینه و مه‌زنان, به‌گڕه‌وه‌ندێ
چینایه‌تیێ و هزری و فه‌رهه‌نگی, ڕێكخراو و سه‌نته‌ر و سه‌ندیكایێن كارتۆنی, لایه‌نگرێن
كۆمه‌ل و گڕۆپ و مه‌زهه‌ب و ته‌كییا, باژێر په‌رستی و عه‌قلێ هۆزی, هه‌ر هه‌می پێكڤه
یان هه‌ر ئێك ژ ئه‌وان به‌سه كۆ مه ژ ئێك دویر بكه‌ت و پرت و به‌ڵاڤ بكه‌ت, هه‌تا
كۆ ڕاده‌یێ دوژمنایه‌تیێ.
ئه‌م
پشتی سه‌رهلدانێ, قۆناخه‌ك ب ناڤێ ئازادیێ, تۆشی دۆڕاندنێ بووین و خۆه په‌رستی ل
ده‌ڤ مه بوویه ڕه‌وشته‌كێ گشتی, ئه‌ز و ڕه‌تكرنا ئه‌وێن دی, شه‌ڕانگیری و نه‌رێكرن
و هنداكرنا یێ دی جهێ (له‌زه‌تێ) و چێژبه‌خشینێ بت, ئه‌م بوونه نڤشه‌كێ ڕۆژكۆژتن
و خۆه‌كۆژتنێ چ ڕێكێن دی به‌رمه نه‌هێلاینه, بارێ چییایه‌كێ ل پشتا مه كر و به‌رێ
مه دا چییایی, ئه‌م به‌رمایكێن هنده‌ك ڕۆژگاراینه گه‌له‌ك ب سه‌ختی تو دشێی ناڤ
و نیشانه‌كێ بۆ په‌یدا بكه‌یی, مه گه‌له‌ك ناسنامه و باج و (هه‌یێن ) سه‌خته چێكرن,
هه‌ر ئه‌م نه‌هاتینه ناسكرن و مه چ جارا نه‌شییا یه چ ده‌مێن مێژوویێ دا هه‌ڤالینیێ
دگه‌ل ناسناما خۆه یا ڕاسته‌قینه دا بكه‌ین, به‌لێ ئه, ئه‌م پاشماوه‌یێن دیرۆكی
نه ل ده‌مێ دهێنه ئاشكراكرن و كه‌س نه‌زانت كیه و مۆلكێ كێ یه, و هه‌ر ئێك بۆ
لایێ خۆه دكێشت لێ دراستی دا نه‌یێ كه‌سه‌ك ژ ئه‌وانه, خه‌ریبه خه‌ریب!
چ
جاران هوین نه‌بوونه ده‌رگه‌هـ و كارگه‌هه‌ك بۆ دروستكرنا مرۆڤه‌كێ ئازاد و هه‌ست
ب شكۆمه‌ندییا خۆه بكه‌ت, دڤێت ئێدی ئه‌م ژ قۆناخا هژمارتنا تابۆتێن خۆه و شانازیكرن
ب مه‌رگێ خۆه ده‌ربازبكه‌ین, ده‌ربازبین ژ هندێ كۆ كێمترین پلان مه هه‌بن بۆ
داهاتوویی و زۆرترین ئاخفتن مه هه‌بت لسه‌ر ڕابردوویی, خوینا هزاره‌ها جانگۆری و
فیداكارێن ئه‌ڤێ ئاخێ ب چ ڕه‌نگان بۆ ئه‌ڤرۆكه‌یا بێ ناسنامه و ناسنامه‌یێن به‌رزه‌كری
نه‌بوویه, بۆ هندێ نه‌بوویه نیشتیمان ب بیته دارستانه‌ك كۆ ئاڤ و ئاخ و سامانێن
وێ ده‌ڤێ سه‌رمایه‌دار و سیاسیێن وێ تژی نه‌كت, و تێر بوونا وان چ جارا نه‌بیت!