هەڤسوزییا دکتاتوران بۆ خاک و نیشتیمانی د چ ئاست دایە؟

سەگڤان ئەرتیسی
تێگەهشتن و وەرگرتنا هەست و سوزێن دکتاتوران بۆ خاک و وەلاتی ژ لایێ هەڤ نیشتیمانیان یا بەرزەیە یان بێژین زورا لاوازە، چونکی دکتاتور ب وێ هێز و شیانێن ماددی و مەعنەوەی دشێن و شیاینە وێنێ راستەقینە ل بەر چاڤ و هەستان بەرزە بکەن و دیمەنەکێ دی یێ بەروڤاژی بدەن پێش چاڤ. هەلبەت رویدانێن مێژووی باشترین و بهێزترین بەلگەنە ل سەر هەست و سوزێن وان بەرامبەر خاک و وەلاتی، لێ نەشارەزایی و نەخاندنا جڤاکی ل سەر رویدانێن مێژووی یان بێژین، هەکەر خاندن هەبن ژی بەس دەما دناڤ تێگەهێن راستەقینە یێن وان تێگەهادا نەچیت و وان راستییان بەرچاڤ نەکەت، ئەرێ ما ئەو خاندن بوچی نە؟
باشترین بەلگەیێ راستەقینە بۆ راستییا دکتاتوران، ئەوە دەما دکتاتور دکەڤنە تەنگاڤییا، و ل وی دەمی ژ بۆ مانا خوە هەر تشتێ ژێ دهێت دکەن، کوشتن بیت، رەڤین بیت، هەتا یا ژ ڤانا مەترسیدار گرتنا دەستێ بیانیا نە بۆ پاراستنا خوە، ڤێجا ئەڤ دەست گرتنە چ ئینانا وانا بیت بۆ ژناڤبرنا دەنگێ نەرازی، یان دروستکرنا سیناریوویەکێ، وەک بێژین دروستکرنا رەوشەکا تەنگاڤی یێ، وەکی دروستکرنا شەرەکێ هەڤبەر بەرامبەر دوژمنەکێ دروستکری یێ وەختی، دا خەلک ب وێ رەوشێ ڤە مژویل ب بیت.
هەلبەت ئەڤ خاندنە بتنێ بەسە کۆ تاک تێبگەهیت دکتاتوریەت ب وان درووشمێن خوە پێ گەهاندی دەستهەلاتێ، ژ بۆ وێ چەندێ نینە خزمەتا خاک و وەلاتی بکەت بەلکو بتنێ ژ بۆ مانا خوە و بکارئینانا داهات و سەروەتێ وی وەلاتی یە بو خوەش ژیارا خوە و دەردورێن خوە و نە زێدەتر.
ئەگەر وەسا نینە، ئەرێ بوچی ل دەمێ تەنگاڤیی یێ ئامادە یە وی خەلکی بکوژیت، ئەوێ ئەو حوکمی لێ دکەت یان بوچی ئێکسەر ژ وی وەلاتی درەڤیت ئەوێ وی بۆ چەندەها سالا حوکم لێ کری و ل سەر خێر و خێراتێن وێ خاکێ باشترین ژیار دەربازکری؟ یان بوچی یێ ئامادە یە دەستێ بیانییا بگریت ژ بۆ کوشتنا هەڤوەلاتیێن خوە، یان بوچی یێ ئامادەیە خوە و خێر و خێراتێن وەلاتی بدەت دەستێ بییانییا، بەس یێ ئامادە نینە وان خێر و خێراتا بێخیت خزمەتا هەڤوەلاتیێن خوەدا  و گەلەک بوچیێن دی؟!!