گەلی کوردا باپیرێ وە کاوەیە!!

بێستون بەرواری
ددیروکا خەباتا گەلێ کورددا، کاوە و ئاگر و نەوروز سێ هێمایێن پیروزن، بیرمەندێن مەزنێن کورد ئەحمەدێ خانی و پیرەمێرد هەست و هزرێن کوردا ب وان هێمایا ئاڤداینە. هونەرمەندێن مەیێن نەتەوەیی (بەدرخان سندی و حەسەن زیرەک و تەحسین طەها)ی ژی هەر بوان هێمایا د هەلبەست و ئاوازێن خوەدا ب شێوێن جودا جودادا لبەر دلێ کوردا شرینکرینە.
 د دەسپێکا سالێن ١٩٧٠ دا دەمێ مروڤی پەیڤا نەوروز گوھلێ دبوو، یەکراست خەتیرێن ئاگری و چەکوچێ کاوەی دهاتنە بەرچاڤێن مروڤی. ئاگر هێمایێ روناهی و گەرمێ، چەکوچێ کاوەی هێمایێ شورش و سەرهلدانێ هاندەرێن خەبات و تێکوشینێ بوون، لەوما ژی رێکخستنێن سیاسی و هێزێن ئازادیخواز ژ خوە را دکرنە درویشم و نیشان و هەر سال د شەهیانێن نەوروزێدا شانۆیا. کاوەی جهەکێ گرنگ هەبوو و گەرم و گوڕیەک ددا خەلکی ئەگەر داستانا کاوەی ئەفسانە ژی بیت یان هندەک دیروکنڤیسێن کورد کاوەی بخاین ژی ببینن و یان گەلێن دن خوە ل کاوەی بکەنە خوەدان ژی، بەلێ دیسا ئەز باوەرناکەم کاوە و ئاگرێ وی لبەر دلێ گەلێ کورد سڤک و بێ کاریگەری ببن. بەلێ ئەز باوەر دکەم ئەگەر ئێدی وەکی نەڤرو شانۆگەریا کاوەی ل گورەپانێن شاهیا نەوروزێ نەهێتە گێران و ل سەر ئەکرانێن تێڤی نەهێنە نیشان دان، هەما وەکی ڤان سالێن دوماهیێ نەڤروز ببیتە روژا سەفرە و دوڵمە و بریانیێ و ببیتە روژا هەلدانا ئاڵاو درویشمێن هێز و لایەنێن سیاسی، هینگی نەوروز دێ سار و سڤک بیت و ئێدی نفشێن نوی دێ هەست و هزرێن ئازادیخوازی و شورشگێری ژبیرکەن! ئێدی کاوە دێ بۆ خەلکی مینیت و کورد دێ بێ باپیرمینن! هینگی. نفشەکێ بێ هزر و هەستێ نەتەوەیی دێ بێ شورش و بێ سەرهلدان مینیت.