نەمانا هەرێمێ یان نەمانا گەندەلان!

بێستون بەرواری
بریارا دادگەها پاریس لسەر نەیاسایی بوونا فروتنا پترولا کوردستانێ(عیراقێ) ژ ئالیێ تورکیا ڤە شروڤێن جودا جودا و گەنگەشێن درێژ ئینانە رۆژەڤێ. عیراقێ پێشوازیا بریارێ کر. تورکیا پێگێریا خوە ب بریارێ ئەنجامدا و بوری دائێخستن. دەستهەلاتا هەرێمێ دیارکر، ئەڤ بریارە کارتێکرنێ لسەر پەیوەندیێن هەرێمێ و بەغدا ناکەت و دەملدەست شاندا هەرێمێ بەرەو بەغدا برێکەت! ئەڤە ئەکتەرێن سەرەکینە و چ دژبەری دناڤبەرا واندا نەهاتیە دیارکرن و دیارە جورە رێککەفتنەک ژی دناڤبەرا واندا هەیە!
ئەڤ بریارە جهێ ترس و تێڕامانێ یە ژ بۆ هەر کوردەکێ دلسوزێ بەرژەوەندیا نەتەوەیی و ژبەر خاترا ژیار و ژیانا هاووەلاتیێن هەرێمێ بگشتی و یا تەخا هەژاران ب تایبەتی، هەروەسا لبەرچاڤکرنا رەوشا خرابا ٣٣ سالا ل هەرێمێ و قەیرانێن جوداجودا دا. ئەڤ تەخە ژلایەکیڤە ژ کاریگەریا خرابا ڤێ بریارێ دترسن و ب مەترسی لسەر دوزا کوردستانێ دبینن و دهەمان دەمدا ب رێگریەکێ دبینن لبەر دزی وگەندەلیا بەرپرسێن دەسهەلاتێ و بازرگانێن گەندەل، وەکی چارەسەریەکا دەمکی دبینن بۆ باشترکرنا ژیارا تەخا هەژاران. تەخەکا دی تنێ هزرا نانی و ژیارەکا ئاسایی و ئەولەهیێ دکەن، ئومێدا دادا جڤاکی و وەکهەڤیێ و یاسایێ دکەن، پشتی بێهیڤیبوونەکێ ل ئارمانجێن نەتەوەیی!
مخابن دو جورە کەسێن دی ژی هەنە: یا ئێکێ ب هزرەکا حزبی یا بەرتەنگ و ژبۆ بەرژەوەندییا تایبەتی و بەرەڤانی ژ شکەستا دەسهەلاتداران ڤێ بریارێ ب پیلانەکا مەزنا دوژمنا ددەنە وێنەکرن ژ بو نەمانا هەرێمێ! و تەخا دی ژی خەلکەکێ دلپاک و دلسوزە، کو دکەڤنە بن باندورا ڤان جورە کەسان و دهێنە خاپاندن! لەو ئەڤ دو تەخێن مە گوتین سلوگانێن ساختە و ڤالا بلند دکەن و هەرکەسەکێ وەکی وان هزرنەکەتن ب خاین و کرێ گرتی دزانن! ژبو ڤان کەسان، ئەوێن لسەر سوشیال میدیا، خەلکی د خاپینن باشترە هزر دبەرسڤا چەند پرسیارا دا بکەن: ئەرێ دزییا مالێ گشتی و گەندەلی د فروتنا پترولا هەرێمێ دا هەیە یان نە؟ ئەرێ تو چ چارەسەریێ دبینی بۆ نەهێلانا دزی و گەندەلیێ؟ ئەرێ باشترە سودێ پترولا کوردستانێ ژبۆ تورکیا و هندەک بازرگانێن هەرێمێ بیت یان ژبۆ عیراقێ و هەرێمێ بیت؟ ئایا ژ سالا ١٩١٣ هەتا ئەڤرو سودێ فروتنا پترولی درێکا تورکیادا کی سودمەند بویینە؟ ئەرێ هەلویستێ دەستهەلاتا هەرێمێ لسەرڤێ بریارێ چیە؟!!
هیڤیدارم هەر کەس بەرژەوەندیا گشتی و ژیارا خەلکی و رەوشا ئەڤرویا هەرێمێ بدەتە بەرچاڤێن خوە و باش و باش هزرا خوە تێدا بکەت، بێی بەرژەوەندیێن حزبی و یێن کەساتی.