ئەوێن نەکەنە هەوار، کی دێ ل هەوارا وان چیت؟!

بیرهات مامسین
ئەڤ وەلاتە یێ بویە شانۆیەکا پری تراژیدیا، ڕوژانە دیمەنێن دلئێش ب پێش چاڤ و گوهێن مە دکەڤن، هەلبەت د هەیڤا رەمەزانێ دا ئەڤ دیمەنە زوورتر دهێنە دیتن، خێزانەکێ نەخۆشەکێ تێدا و دشیان دا نینە چارەسەریا وی بکەن، ئێک کرێدارە و نەشێت کریا خو بدەت، یێ دی یێ بێ حالە و نەشێت بچووکترین پێتڤیێن مال و زاروکێن خو دابین کەت، و یێ دیتر دبن نایلون و کاڤلا ڤە و نەشێت زاروکێن خو گەرم کەت، و.....هتد!! ئەڤە هەمی ل کیڤە؟؟ ل وەلاتەکی کو خودێ کێم وەلات وەکی وی ب خێر وبێر ئافراندین..
بوچ دێ بهێلین بگەهیتە وی ڕادەی کو هەژارەک یا پێتڤیەک بکەتە هەوار و خو ل بەرنامە و شاشەیان بدەرێخیت ژنوی دێ لێ هێینە دەنگ، بوچی دێ هێلین چاڤێ وی ل دەستێ خێرخوازا بیت! دبیت ئەو هەوار دوماهیک هەلبژارتنا وان بیت و ژ نەچاری و ل سەر کیستێ ناڤ و کەرامەت و شەرم شکاندنا خو (کو چ شەرم ژی تێدا نینە) دەنگێ خۆ بلند کربیت و دەستێ خو بو خێرخوازەکی درێژکربیت، چونکی دزانن سەرەڕای هەبونا خێرخوازێن پاقژ و خودان وژدان وبو خودێ دکەن و هەست و کەرامەتێن هەژارا ل بەرچاڤ وەردگرن، دێ بنە نێچیرا هندەک فەخفەخچیا ژی و دێ هێنە وێنە کرن، و دێ گەلەکێن نە ژوان چێتر ئەوێن ب مالێ وان وڤی مللەتی دەولەمەند بوین زەڤلەکێن خو بو ریمەتی پێ دەرێخن، ل پێش کامیرا وتی ڤی یا روینێ وان بخو دسەرێ وان دەن، لێ ژ نەچاری و ژبو ژیانێ دێ وێ هەمیێ کەنە قورچەک وداعیرن.
بەلێ ئەوێن نەکەنە هەوار کێ های ژێ هەیە؟!!!
چەند هەنە وەکی وان دەست کورت و خرابتر ژی بەلێ نەشێن دەنگ و ئازارێن خو بگەهینن، ژ شەرمێ یان ژبەر هەر ئەگەرەکێ هەی، کێ ئاگەهـ ژوان هەیە؟ کی هزر تێدا دکەت کا ب چ ڕەنگ  ژیانا خو دەرباز دکەن؟!
بو زانین ئەڤە نە کتێن جڤاکی نە کو ب خێرخوازا چارە ببن، بەلکو تەخێن درستێن جڤاکی نە ب ڤی حالی، ژبلی وان یێن دهێنه هژمارتن خودان داهات، بەلێ داهاتێ وان تێرا کریا خانی و بهایێ ئاڤ و کارەبا بتنێ ناکەت و کەس ژی نینە بێژیت ئەڤە چاوا دژین و ب چ دژین، و داهاتێ وان چەندە و پێتڤیێن وان بهایێ چەندێ نە!!!
ئەڤ هەیڤە رەمەزانە و مەها خێرانە، ئەڤرو خێرخوازەکی تێرکرن یان پێتڤیەکا وان قەتاند، پا هەیڤێن بهێن چ بکەن؟ مانە یا پێتڤی یە دەرگەهـ ب رویێ هەژاران دا بهێنە ڤەکرن و کار بو نەهێلانا هەژاریێ بهێتە کرن؟ ئەگەر ئێک بێژیت ل هەمی وەلاتا هەژارێن هەین، دبێژمێ نەخێر نابیت ل وەلاتەکێ وەکی کوردستانێ خێزان هەبیت زاروکێن خو ژخەو رانەکەت ژبەر نەبونا خوارنێ، نابیت خێزان هەبیت فتارا خو و زاروکێن خو ژ ناڤ گلێش و بەرمایکێن خارنگەها کوم بکەت، چونکی مە هەمی ئالاڤێن هەین بتنێ رێکخستن وئیدارەدان پێ دڤێت...
ل بەهرا پتر یا وەلاتێن روژئاڤا، و نوکە وەلاتێن کەنداڤی یێن خودان بەرهەمێن نەفتی، سەرەڕای هەبونا کاری، یێ کار ژی نەکەت تێرا ژیانا وی پێ دهێتە دان ژلایێ دەولەتێ ڤە، چونکی نابیت خودانێن وەلاتی دبێ مال و جهـ بن، دبێ خوارن وڤەخوارن بن، دبێ خزمەتگوزاری بن، ئەگەر ئەڤە نە بیت پا ئەڤێ کار بدەست نە کەڤیت یان نە شێت کار بکەت وچ داهات نەبن، چ بەهر دسامانێن وەلاتی دا هەیە؟!! لەوما دێ بێژم "مللەت ب خێر و خێرخوازا برێڤە ناچیت، چونکی ئەڤێن سەدەقە وخێر دگەل دهێنە کرن ئەو ژی خودانێن ڤی وەلاتی نە ب هەمی سامان وداهاتێت وی ڤە"، بتنێ ڕێڤەبرنەکا جوان وپلان دارێشتنەکا دروست پێتڤیە بو بکارخستنا هەمی دەرگەهێن زێرینێن وەلاتی کو ببیتە وەلاتەکێ رێکخستی یێ بەرهەمدار، زێدەباری وەکهەڤیێ ودادیێ، چونکی (بێ دادی دەردێ کوژەکێ ڤی وەلاتی یە) کو ئەڤە بخو بابەتەکێ دیر ودرێژە، وەکهەڤی ودادپەروەری نەبیت وەکی نوکە هندەک دێ یاریا ب پارەی کەن وهندەک ژی دێ زارویێن خو برسی نڤینن..
دڤێت مفا ژ فرەڕەنگیا سروشتی یا ڤێ ئاخێ بهێتە وەرگرتن وببیتە دەرگەهێ ژیانێ بو هەڤوەلاتیا، پلانێن دیراسەت کری ژبو ڤەژاندنا هەمی لایێن وێ بهێتە کرن، ژچاندن وگەشت وگوزار وپێشەسازی وبازرگانی و.... هتد، ژهەمیێ گرنگتر دڤێت بها ب مروڤا بهێتە دان، شیانێن مروڤا بهێنه کەیسکرن ومفا ژ پسپوریێ وباوەرناما بهێتە وەرگرتن، وکار بو هەر کەسەکی بهێتە دابینکرن، داهاتێ تاکی دگەل پێتڤیێن ژیانا وی بهێنە تەرازیکرن، ئێدی مروڤ ژیانێ بکەن و هەست ب تێربون وخوشی وئارامیێ بکەن دناڤ مال ووەلاتێ خو دا...