بازرگانییا دگەل خودێ

محەمەد گڤاری
رۆژەکێ مرۆڤەکی قەستا دوکانا فروتنا فێقی کر، گوتە دوکانداری کیلویا مۆزا ب چەندێیە؟ دوکانداری گوتێ کیلویا مۆزان ب (10) دینارایە، ئەگەر تە سێڤ دڤێن کێلو بـ( 15) دینارایە، لوێ چرکەساتێ ژنەک هاتە وێ دوکانێ بۆ کڕینا فێقی، دوکانداری ئەو ژن دنیاسی، وێ ژنێ گوتە دوکانداری کێلویا مۆزا ب چەندێیە؟ دوکانداری گوتێ  بـ(5) دینارایە، ئەگەر تە سێڤ دڤێن  بـ(10) دینارایە، وێ ژنێ گوت سوپاس بۆ خودایێ مەزن ئەڤرۆ زارۆکێت من دێ تێر مۆزو سێڤان خۆن، ئەو مرۆڤێ بەری وێ ژنێ هاتیە دوکانێ هەردوو چاڤێت وی سوربوون و ئەنیا خۆ کرە گرێ ها نێزیکە دێ ل خودانێ دوکانێ توڕەبیت، لەوا خودانێ دوکانێ ب دەستێت خۆ ئاماژا دایێ، کو  راوەستە و بێهناخۆ فرەبکە. پشتی وێ ژنێ (4) کیلویێت مۆزو سێڤان کڕین و ب دلخۆشی ژ دوکانێ دەرکەفتی، خۆدانێ دوکانێ گوتە وی مرۆڤی ئەز بناڤێ خودایێ مەزن سویند دخۆم ئەز قوپیایێ و تەشقەلا دگەل تە ناکەم، بەلێ ئەڤ ژنا نوکە تە دیتی خۆدانا (4) ئێتیمایە و هاریکاریان ژ کەسێ وەرناگریت و دڤێت ئەو ب کەدا دەستێت خۆ ئێتیمێت خۆ ب خۆدان بکەت، گەلەک جاران من بزاڤکریە وێ ڕازێ بکەم کو هاریکاریا وێ بکەم بەلێ هەمی جاران ڕەتکریە، من گەلەک هزرێت خۆکرن کو ڕێکەکێ ڤەبینم بۆ هاریکاریا وێ ژنێ، من ئەڤ چەنداهە ب باشترین ڕێک دیت بهایێ فێقی بۆ وێ کێم بکەم وەک هاریکاری، دا هەمی دەما هەست ب دلخۆشیێ بکەت، حەفتییێ دووجاران دهێتە دوکانامن بۆ کڕینا فێقی، ڤێجا ژدل ئەز داخوازا لێبۆرینێ ژتە دخوازم، ڕاستە بازرگانیا دگەل خودێ دێ مرۆڤی ژبەلایێت دونیایێ پارێزیت.