من دڤێت برایێ گەورە ببینم؟!

ردوان گولی
 ل دەستپێكێ مەرەما من ژ برایێ گەورە، نەك كەسەكێ دیاركریە هەر وەكی دناڤ خەلكیدا بەربەلاڤ و دهێتە گوتن، بەلكو هەر بەرپرسەكێ خودان شیان و دەستهەلاتە ل وەلاتی، ئەڤ ئیدیەمە (برایێ گەورە جاڤدێریا تە دكەت Big Brother)، نڤیسكارێ بریتانی جورج ئورویل د رومانا خوە دا، یا بناڤێ(1984) بكارهینایە وەكی سومبولا دەستهەلاتێ و ئەڤ نڤیسینا وی دچیت ناڤ رەنگێ ئەدەبێ ژیوارێ تەحل یان وەكی ئینگلز دبێژن دیستوپیا، و نوكە ل سەردەمێ جیهانگێریێ و سەختەكرنا راستیان و ڤەشارتنا رویدانانە.
ل ڤێ دوماهیكێ دەمێ ئەز تەماشەی تەلەفزیونێ دكەم و هندەك بەرنامێن گفتوگویان و دیدارێن تایبەت دگەل كەسانێن دیار و بەرچاڤێن جڤاكی مینا هونەرمەند و یاریزان و مەلا و جالاكڤان  ووو، ب كورتی ئەوێن گاریكەر و كارتێكرنا خوە ل سەر خەلكی هەین، دەمێ كەسەك یان مێهڤانەك بێژیت میدیاكاری خوزیا من ئەوە ئەز برایێ گەرە ببینم؟! ئەرێ دێ چ بێژی برایێ گەورە؟! ئەز ل وێ باوەریێ نینم، جەنابێ تە گلە و گازندە و ئاریشە و گرفتێن خەلكی بگەهینت برایێ گەورە، راستە تە دڤێت ببینی، بەلێ ژبەر بەرژەوەندیێن تایبەت و كەسوكینە و هیچ پەیوەندی ب خەم و كوڤانێن هاوەلاتیانڤە نینە.
ئەرێ بوچی هاوەلاتی ل وەلاتێن پێشكەفتی داخوازا دیتن و دیدارا بەرپرسێن مەزنێن خوە ناكەن؟ كورت و كرمانج چونكە هاوەلاتی ماف و ئەركێن خوە ب باشی دزانیت و بێ دەنگ نابن ل سەر مافێن خوە و ئەگەر ل شەقامەكێ ببینن یان ماركێتەكێ، وەكی هاوەلاتیەكێ ئاسایی لێ دنێرن و هەروەسا برایێ گەورە ژی باش دزانیت ئەو نە قرال و ئیمپراتورە، ئەو بتنێ خزمەتكارێ وەلات و هاوەلاتیێن خوەیە، ئەوی دەستهەلات نینە بشێت چ مووچە و پارچێن ئەردی و ئیمتیازاتان ب كەسێ ب بەخشت، بەروڤاژی خەلكێ دەڤەرا روژهەلاتا ناڤین، دەمێ دچن دیدارا بەرپرسێن خودان دەستهەلاتدار و ئەڤچا سەحكە مەلاقیێ(ئەزبەنی، قوربان، گەورەم، ئەگەر جەنابێ تە نەبیت دێ ئاڤ مە بیت وووووو).
براستی من هیچ جارەكێ نەڤێت نە برایێ گەورە و نە هیچ بەپرسەكێ بالا یێ وەلاتی ببینم، چونكە ئەز نە یێ بەرهەڤم هیچ داخوازیەكا تایبەت و كەسوكی ژێ بكەم، و ئەو باش دزانیت گازندێن خەلكی چنە، و دڤێت چ بهێتە كرن بو هاوەلاتیان، بەلێ ئەگەر نە كەت، ئانكو وی نەڤێت بكەت و هەمی تشت ل بەردەستێن وی هەنە.