وەرزێ ھاڤینێ بۆ قوتابیان؟!!

رۆژ یاسین بامەرنی
بهێنڤەدانا هاڤینێ رۆلەکێ گرنگ هەیە د پێشڤەبرنا ئاستێ هەر قوتابیەکی دا. بهێنڤەدان دبیتە چەند هەیڤەک، دەستپێدکەت ل وەرزێ هاڤینێ و رۆلێ قوتابخانێ و ماموستا د پێشڤەبرنا قوتابیان دا ب دوماهیک دهێت، دناڤا ڤان هەیڤان دا بۆ قوتابی دبیتە دەرفەت کو پتر خو پێشبێخیت و ئاستێ خویێ زانینێ باشتر و بهێزتر لێبکەت.
چ پێدڤیە بھێتە كرنێ:
گرنگە دناڤا ڤان ھەیڤاندا خولێن فێركرنێ و پێگەھاندنێ بۆ قوتابییان بھێنە ڤەکرن، ل ڤێرێ حکومەت دبیتە بەرپرس ژ ڤەکرنا خولاندا کو پتر دەرفەتێ بدەن و خولێن ب هێزکرنا زانینێ د بیاڤێن جۆداجۆدا دا بۆ قوتابی بهێنە ڤەکرن، ژبەرکو  زانست و زانین ئاڤاکرن و پێشڤەبرنا هەر نەتەوەکی یە، یا گرنگە  پویتە پێبهێتە دان، هەروەسا دڤێت سازیێن تایبەت ب پەروەردێ و زارۆکان ڤە خو لێ بکەنە خودان و دڤێت هندەک دەزگەهێن دی هەبن گرنگیێ ب ڤی بابەتی بدەن، دا پتر بۆ قوتابیا دیار بیت کا ئارەزوویا وان چییە و حەزێن وی دێ بەرەڤ کیڤە بەن و شارەزایی د چ بواردا هەیە، بۆ نمونە (وێنەکێشان، زمان، موزیک، باشنڤێسینێ، کومپییوتەر، وەرزشی و كارێن دەستی و …هند)، خولێن جیاواز و دبیاڤێن جیاوازدا بۆ ڤان قوتابیا بهێنە ڤەکرن ل دویڤ تێگەهێ تەمەنێ وان خول بۆ بهێنە دانان، ئارمانج ژ ڤەکرنا ڤان خولا ئەوە  دا قوتابی فێربیت ل دویڤ زانست و زانینێ بگەریت و هزربکەت نە بەس زانست و زانینن ل قوتابخانا بەردەستە،  بەلکو دیڤچوونە و لێگەریانە.