قودس...

25/02/2021

موستەفا ئەحمەد بامەرنی

سترانبێژا لبنانی یا بناڤ و دەنگ (فەیروز)، د سترانەكا خوەدا دبێژیت: قودس ئەی باژێرێ ئاشتیێ، ژبەرتە ئەز نڤێژا دكەم (ياقدس يا مدينة ألسلام من أجلك أصلي). دبێژن قودس باژێرێ ئاشتیێ یە و د راستی و یا بەرچاڤ دا، ناڤێ ئاشتیێ لایقی ڤی باژێری نینە دگەلدا بھێتە گوتن، ژبەركو و تا نوكە ژی ب باژێرێ (فتنێ) دھێتە دیتن و ب سەرەكانیا نەڤیانێ و دلرەشیێ و ھەڤركیێن ئاینی و شەران، دناڤبەرا ئاینێن سەرەكی یێن بدرێژاھیا مێژوویێ ھەڤرك (جوھی و مەسیحی و ئیسلام)، و ل سەر خاترا وێ گەلەك شەر ھاتینە كرن و ب مەلایینا مرۆڤ لدەڤەرێ و جیھانێ ھەمیێ ژبۆ بووینە قوربانی.

 د خورتبوونا ئیسلامێ دا ژلایێ موسلمانانڤە ھاتیە ئازادكرن و لدویڤدا شەرێن سەلیبی ژبۆ ڤەگەراندنا وێ ھاتینە كرن و نوكە كەتیە دگەرەوا ئاینێ جوھییاندا، ھەر سێ ئاینان ژی ل سەردەمێ كونترولا خوە پاشماوێن خوە یێن پیروز لێ ھێلاینە و یێن جوھیان دیوارێ مەبكی (ألحائط ألمبكي) و عەردێ پەیمانێ (ألارض ألموعودة) و یێن مەسیحییان دێرا قیامە (كنيسة ألقيامة) و لاندكا سەیدێ مەسیح (س) و یێن موسلمانا ژی مزگەفتا ئەقسا و قوبەھا كەڤری (ألمسجد ألأقصى وقبة ألصخرة)ن.

لدویڤ ڤێ دناڤێكراییا ھەر سێ ئاینێن لبەر ئێك راوەستییای، دێ (قودس) ھەر مینیت باژێرێ نەڤیانێ و دلرەشیێ و شەر و ھەڤكرییان و حالەتێ ژیانا ئاشتیانە(ألتعايش ألسلمي) دناڤبەرا دووڤەلانكێن ڤان ھەر سێ بیروباوەران دا، دێ یا ئەستەم(موستەحیل) بیت.

ئەڤێ نەڤیانێ ھەمی پارچێن جیھانێ بخوەڤە ڤەگرتینە و خودێ تەعالا چ دەستھەلات نەداینە داروبەرا و ئەڤ نەڤیان و كەرب و كینە ناھێتە راكرن، بتنێ براكرن و ھلوەشاندنا ڤان جھێن پیروز، كو ژ داروبەرا پێكھاتینە و ئەڤ كارە ژی موستەحیلە رووبدەت، لەوما موستەحیلە ژی شەر و نەڤیان بدووماھیك بھێن.