ل وەلاتێ ژنکۆژان.. ئەزا ژن ساخترین مرییا ھەبوونێ مە!!

شرین عومەر

ئەز ھند ل بیرا خوە دھێم ژ چێکرییەکێ، کۆ دبێژنێ مرۆڤ و ژ وێ مرۆڤبوونێ ژی رەگەزەک بووم، کۆ دبێژنێ مێ. ئەز د پرۆسەیا پەیدابوونا خوەدە نە ژ بەژدابوویان بووم، حەیا کۆ ناڤێ لسەر من ھەلبژارتنا ھندەک چێکریێن ژ بەری من بوو.

ئەز د جڤاکەکێ دە ھاتم ئەندامکرن، ژ بەریا کۆ ئەز بزانم جڤاک چییە. ئەز ھند د ھێمە بیرا خوە کۆ ئەز ژ زارۆکتیێ مەزن دبووم و مەزن دبووم، بێی کۆ ئەز بزانم ئەگەر ئەز مەزن ببم ناڤێ من ژبەر رەگەزێ من ژ زارۆکتیێ دێ بتە ژن. ئەڤە د دەمەکێ دە کۆ ئەزا مێ د ھاتم بێ دەنگکرن و نەچارکرن، کۆ تەماشەی ھەڤالێن خوە یێن نێر یێن زارۆک بکم، کۆ ئەو وان یاریان بکن یێن ئەز ژ کویراتییا ھەمی ناخێ خوە حەز دکم بکم. من نە دزانی ئەو مرنێن من یێن ژ بەری ژنبوونێ دەستپێکەکا نەچارکرییە بۆ مرنەکا درێژ و گرانتر، لێ یا من دزانی ئەو بەرێخوەدان مرنەکا مەزن بوون ل ھەمبەر بچویکییا من. پشترە وان چێکریێن ژ بەری من ھاتین ھەبوونێ، بێی کۆ من فێر بکن ئەز چاوا ببم ئەز، گوتنە من تو ئێدی ژنی و شەرەفی بۆ کومەکا چێکرییان!

ئەز ھێشتا فێر نەبوویمە ژبەری ئەز ببم، ئەز ببم شەرەفا ھندەکێن دی، لێ یا ئەز دزانم ئەزەک کۆ نەبوویمە ئەز د بن پەراوێزا شەرەفێ دا بھێمە کۆشتن، ئارامییەکە بؤ مرنان ژ من!