ڤار بۆ ڤار دانێن!

7 مانگ پێش ئێستا

چێنەر عەبدولقادر
ڤار هەندێك كێشەی چارەسەركرد بەڵام كێشەی زۆر زیاتری هێنا، یاسای تۆپی دەستی زۆر قوڵتركردەوەو حساباتی سانتیمەتر و ملیمەتری هێنایە ناو ئۆفسایدەوە، ئەوەشی نەهێشت كە دەوترا ناوبژیوانیس مرۆڤەو هەڵە دەكات.

تۆپ بەردەستكەوتن و یاساكانی زیاتر بونەتە كێشە، لە پرێمەرلیگ دەنگێك هەیە دەڵێن با چیتر گوێ بەو یاسایانە نەدەین، ناكرێت هەر كە تۆپێك بەردەستی بەرگریكارێك كەوت پێناڵتی بێت، ئێستا بەرگریكار وای لێ هاتوە نازانێت دەستی چی لێ بكات.

وەرزی پێشوو وتیان ئەگەر تۆپ بەردەستی هێرشبەر بكەوێت لە هەموو حاڵەتێكدا ئەوە فاوڵە، ئێستا گۆڕانكاریان تیاكرد و دەڵێن راستەوخۆ پێش تۆماركردنی گۆڵ نەبێت و بە ئەنقەست نەبێت ئەوە فاوڵ نیە، بۆیە گۆڵێ سێیەمی چێڵسی رەت نەكرایەوە هەرچەندە بەردەستی هاڤێرتز كەوت.

لە پرێمەرلیگ دوێنێ چەندین روداوی گەورەی ڤار رویدا بەڵام ئەوەی باشبوو تەنها رۆژێك باسكرا، بەس كە لەلالیگا رویدا ئیتر تا كۆتایی وەرزەكە باس ئەكرێت، حاڵەتەكانی یاری ریاڵ ئەوەنە زۆر بوو مەگەر ڤار بۆ ڤار دانێین!!!

كێشەیەكی تری ڤار ئۆفسایدە! خەتەكەش دەكێشرێت بەڵام بە سانتیمەتر چۆن دیار ئەبێت؟ گۆڵێ دووەمی ریاڵ مەدرید بە خەتەكەشەوە دەرنەكەوت كە بنزیمە لە ئۆفسایدایە یان نا، بێگومان بەشداری هێرشەكەی كرد.

كار وا بڕوات ئەبێت ئەمساڵ هەر باسی ناوبژیوان و ڤار بكەین، هەقی ئەو هەموو یاریزان و راهێنەرە دەخورێت كە ئاستی بەرز پێشەكەش دەكەن و كەس باسیان ناكات.