كێشەی ریاڵ تەنها دۆراندنی ڤالانسیا و ڤاران نیە!

5 مانگ پێش ئێستا

ڕوانگە و ڕەخنە
ریاڵ مەدرید دوای چەند جەولەیەك لە پێشەنگی خولی ئیسپانی، گورزێكی توندی بەركەوت و لە دەرەوەی یاریگای خۆی بەرامبەر بە شەمشەمەكوێرەكان توشی شكستێكی گەورە هات بە چوار گۆڵ بەرامبەر بە گۆڵێك.
لەم یاریەدا بە ئاسانی و ئاشكرایی كێشەكانی ریاڵ مەدرید دەركەوتن، لە بەرگریەوە بۆ هێرشبەر.
هەندێك پێیان وایە كە كێشەی ریاڵ مەدرید لەو یاریزانانەدایە كە لە یاریگادا هەڵە دەكەن یان ئەوانەی توشی پێكان بون و یاریان نەكرد.
لە راستیدا كێشەی ریاڵ مەدرید زۆر لە ئەو دوو كێشەیە زیاتر و گەورەترە:
-یەكەمین كێشە، لە بەڕێوبەری تۆپی پێ و بەرپرس لە گرێبەستەكانە، كە چەند ساڵێكە یەك لە دوای یەك گرێبەستی شكستخواردوو دەكات و هیچ ئەنجام و سودی بۆ ریال مەدرید نیە، لە نمونەی گارێس بەیڵ و ئیدین هازارد.

-ریاڵ مەدرید پیربوە: بەشێك لە یاریزانانی ریاڵ تەمەنیان هەڵكشاوە لە نمونەی كەریم بەنزیمە و مارسێلۆ و رامۆس و چەندانی تریان، ئەمەش لە روی توانای جەستەییەوە هەم كاریگەری لە خۆیان كردوە و هەم لە یاریزانانی دیكەش كە دەبێت زیاتر ماندوو بن بۆ پڕكردنەوەی بۆشاییەكانی ئەوان لەناو یاریگا.

-كۆرۆنا: توشبون بە كۆرۆنا، یەكێ:ە لە كێشەكانی ئەمساڵی رایڵ مەدرید، كە چەند هەفتەیەك تێناپەرێت و یاریزانی سەرەكی ئەو یانەیە دورنەخاتەوە بە تایبەت یاریزانە كاریگەرەكانی وەك كاسیمێرۆ.

-نەبونی یەدەگی جێگرەوە: بەپێچەوانەی ساڵانی رابردوو، كورسی یەدەگی ریاڵ مەدرید زۆر لاواز بوە و جێگرەوەی نیە بۆ ئەو یاریزانانەی كە یاری دەكەن. بۆ نمونە، لەكاتی یاری نەكردنی كاسیمێرۆ، كروس، مۆدریچ، كەمن ئەوانەی دەتوانن ئەو شوێنە پڕ بكەنەوە و لەكاتی یاری نەكردنی یاریزانی وەك كاپتن رامۆس، مەحاڵە شوێنەكەی پڕ ببێتەوە.

-فرۆشتن و نەكڕین: ریاڵ چەندین یاریزانی گەورەی یانەكەی فرۆشت، بەبێ ئەوەی هیچ یاریزانێك لە ئاستی فرۆشراوەكان بكڕێتەوە، ئەمەش كاری كردۆتە سەر ئاستی یانەكە.

-نەبونی ئەستێرە: ریاڵ بە یەك جار ئەستێرەیەكی گەورەی وەك كریستیانۆ دەفرۆشێت و یانەكە بەبێ ئەستێرە دەمێنێتەوە، ئەمە كاریگەری نەك تەنیا لەسەر خودی یانەكە، بەڵكو لەسەر خولی ئیسپانیاش هەبوە و ركابەریەكانی سارد كردۆتەوە ، جگە لەوەی ئەو گوڕەشی نەهێشتوە كە جاران لە كلاسیكۆدا هەبوو... رەنگە هەندێك پێیان وابێـ ئەم لایەنە زۆر كاریگەری نیە، بەڵام بۆ رون بونەوەی ئەو كاریگەریە باشترە لە بونی میسی لەناو بەرشەلۆنە و هاتنی زڵاتان بۆ میلان و بونی رۆناڵدۆ لە یۆڤی، وردببێتەوە.

بۆیە كێشەی ریاڵ تەنیا بەرگری نەكردن و گۆڵ نەكردن نیە، تەنیا ئەو چوار گۆڵەی ڤالەنسای نیە، تەنیا ئەوە نیە ڤاران هەموو یاریەك گۆڵێك لە خۆیان دەكات و خەریكە دەبێتە گۆڵكار، بەڵكو كێشەكە تەواوی سیستم و مەنومەی ریاڵ مەدریدە كە ئەگەر لە مێركاتۆی داهاتوو گرێبەستی گەورە نەكات ئەوا ئەمساڵ لە هەموو خولەكان بە دوو دەستی بەتاڵ دەچێتە دەرەوە.