دوژمنێكی تاریك و مەترسیدار لەماڵەكانماندا...

3 مانگ پێش ئێستا

پارێزەر/ پروشە قەلەندەر كەسنەزانی
س: رێكخراوی میدیا
دارك وێب (Dark web) ئەو دوژمنەیە كە لە ماڵەكانماندا خۆی حەشارداوە و لەهەر كاتێكدا بێت دەستی خۆی دەوەشێنێ و ماڵەكانمان لێ دەكات بە زیندان . دارك وێب یەكێكە لە هۆكارە سەرەكیەكان بۆ ئەنجامدانی هەموو جۆرە تاوانێك بەتایبەت تاوانی دەست درێژی سێكسی و بەدەستهێنانی مادەی هۆشبەر و هەموو ئەوتاوانانەی تر كە بە گروپ یان بە تاكە كەسی ئەنجام ئەدرێت !!! 
پرسیارەكە لێرەدا ئەوەیە دایك و باوك بۆچی دەبێت هۆشیاریان هەبێت و بەتایبەت ئاگایان لە مناڵەكانیان (هەرزەكاران) بێت لەم مەترسیە گەورەیە؟ 
چۆن خۆیان و منداڵەكانیان ئەپارێزن لەم مەترسیە؟

پێش وەڵامدانەوەی پرسیارەكە دەمەوێت بەكورتی بزانین ئینترنێت چیەو چۆن بەكار دەهێنرێت لەم جۆرە تاوانانەدا.
ئینتەرنێت بە شێوەیەكی سەرەكی لە ٣ بەش پێك دێت :
بەشی یەكەم:
‏ (surface web) واتە ئەنتەرنێتی گشتی كە ئەمە بەشە ئاسایەكەیە كە هەموو خەڵك بەكاری ئەهێنن ڕۆژانە بۆ گەران بە دوای بابەتەكان كە لە رێی google ,Yahoo ,Bing دەكرێ ، ئەم بەشە تەنیا لە ٤٪ ئینتەرنێتە بەڵام دووبەشەكەی تر لە ٪ 96 پێك دێنن.

بەشی دووهەم:
ئەم بەشە بە دیپ وێب ناسراوە Deep web
دیپ وێب Deep web ئەو بەشەیە كە حكومەتەكانی وڵاتان بەكاری ئەهێنن بۆ سیستەمی حكومی و بەرێوبردنی وڵات و كاروباری ڕۆژانەی هاووڵاتیان لەلایەن دامودەزگا حكومیەكانی و دائیرەكانی دەوڵەتەوە. بۆ نموونە سیستەمی نەخۆشخانە و زانیارییەكانی نەخۆش، بەرێوەبردنی نەخۆشخانەكان و سیستەمی بانك و پارەدانی ئەلكترۆنی، سیستەمی خوێندن و زانكۆكان ، سیستەمی پۆلیس و دادگا و وەزارەتەكانی حكومەتو ...هتد . 

بەشی سێیەم:
ئە م بەشە بە دارك وێب ناسراوە Dark web كە بە بەشە خراپ و مەترسیدارەكە ناسراوە و زۆربەمان زانیارییمان لەسەر نیەو كە ئەمەش 
 بابەتی ئەم نووسینەیە.
دارك وێب ئەو ئنتەرنێتە شاراوەیە كە ناتوانرێ بە ئنتەرنێتی ئاسایی داخڵی ببیت و بەكاری بهێنێت. ئەم بەشە مەترسیدارە زۆر شاراوەیە و بە بەشە تاریكەكەی ئنتەرنێت ناو دەبرێت چونكە ناونیشان و كەسایەتی بەكارهێنەرەكەی بە تەواوی شاراوە دەكات، ئەمەش وادەكات كە تاوانباران بۆ بەدیهێنانی خواستەكانیان ئەم ڕێگایە بەكاربهێنن و سەرنجی خەڵك بەتایبەت هەرزەكار ڕاكێشن بەلای خۆیاندا بۆ شاردنەوەی كردارەكانی ئارەزوو دەكەن بەكاری بهێنن . 

لەم بەشە تاریكە چی تێدایە و چۆن بەكاردێت؟
بەكورتی هەموو ئەو شتانەی كە لەژیانی ڕۆژانەدا قاچاخن و ناتوانرێت بەئاسانی بەردەست بن یان بەكاربهێنرێت لێرەدا هەیە ، وەك: 
 ١/ بازاری ماددە هۆشبەرەكان بە هەموو جۆرەكانی (heroin, benzos, Ecstasy, marijuana)....هتد
۲/ پۆرنۆگرافی، واتە فیلمە سێكسیەكان بەتایبەت ئەوانەی كە لە ئنتەرنێتی ئاسایی ممنوع بێت و نەتوانرێت سەیر بكرێ وەك دەست درێژی سێكسی ، مناڵباز ( پیدۆفایل) سێكس لەگەڵ مناڵ ، بەكار هێنانی مادەی هۆش بەر لە كاتی سێكسكردن .
۳ـ لێدان و ئازاردانی جەستەیی و بەكرێگرتنی خەڵك بۆ كوشتنی خەڵك .
٤ـ كڕین و فرۆشتنی شتومەكی نایاسایی وەك چەك و تەقەمەنی و كارتی بانك ( هەموو جۆرەكانی ) ، دراوی تەزویر ...هتد
٥ـ پرۆگرامی هاك كردن و پێشكەش كردنی ئەم خزمەت گوزاریە بۆ ئەوانەی كە دەخوازن بچنە ناو سیستەمێكی دیاریكراوەوە .
ئەم نموونانە بەكورتی ئەو بەشانەن كە بەگشتی خەڵك خولیایانەو بەتایبەت كاریگەری هەیە لەسەر كەسانی هەرزەكار. بەشەكانی تری دارك وێب زۆرە و ناتوانین لێرەدا باسی هەمووی بكەین. 

چۆن هەرزەكار ئەم دارك ویبە بەكار ئەهێنێت؟؟ 
ئەم بەشە رەشە شاراوەی ئنتەرنێت بە search واتە گەڕانی ئاسایی ئنتەرنێت نایەت بەڵكو پرۆگرامی تایبەتی خۆی هەیە و بەر بڵاو ترین پرۆگرام كە بەكاردێت پێی دەڵێن تۆڕ (TOR) كە كورت كراوەی (The Onion Router) هەر بۆیە هەموو ئەو سایتانەی لەم سێرچەدا هەیە كە بە سایتە رەشەكان ناودەبرێن لە جیاتی ئەوەی كۆتایی ئەدرەسەكانیان بە .com كۆتایی بێت ئەو بە onion كۆتایی دێت . بەكار هێنانی ئەو سایتانە قورسە و زۆرخاوە هەروەها دابەزاندنی پرۆگرامەكانی كۆمپیوتەرەكە توشی ڤایرۆس ئەكات كە ئەمەش وا دەكات بتوانرێت ئەو كۆمپیوتەرە هاك بكرێت. 
هەر كەسێك كە سیستەمی سێرچی TOR بەكار هێنا مانای ئەوە نیە خراپە و كەسەكە تاوانبارە بەڵام بەشە خراپەكەی زۆر زیاترە لە باشەكەی چونكە هیچ چاودێرییەك یان ڕەقابەیەك لەم بەشە تاریكە نیە مەترسیەكە لێرەدایە بۆ هەرزەكار. 
هەربۆیە كە هەرزەكار ئەم پرۆگرامە لەم بەشە تاریكەی ئینتەرنێت بەكاردەهێنێت لە ئنتەرنێت وەك ئەوە وایە لە رێگایەكی تاریكی مەترسی دار هەرزەكارەكەت فەرامۆش بكەیت و دەكەوێتە ناو گرۆپێك لە مافیاو تاوانبار كە دەكرێت لەهەر شوێنێكی ئەم جیهانە بن . 

**چۆن هەرزەكارەكەم لەم بەشە تاریكە بپارێزم؟؟؟؟
یەكەم شت دەبێت متمانە دروست بكەیت لەگەڵ مناڵەكەتدا كە بتوانێت هەموو شتێكت لا باس بكات بە باش و خراپەوەو وە چاوەڕێی ئەوە نەكات كە سەرزەنشت بكرێت. پاشان چاودێری بەردەوامی تەواوی كۆمپیتەر یان تەلەفۆن یان ئایپادی مناڵەكەت بە و سەیر كردنی وردی ئەو بەرنامانەی كە دایبەزانوە لێ پرسینەوەی تەواوەتی لێی سەبارەت بەو پرۆگرامو بەرنامانەی كە دایبەزاندوە كە نەوەك بەناوی یاریكردنەوە فێڵی لێكرا بێت. ئەگەر هەر كات هەر كام لەم بەرنامانە 

 واتە بەرنامەی TOR یاخود Freenet یان 12P بینی دایبەزاندبوو یان سێرچی بۆ كردبوو ئەوا بیسرنەوە دەست بە جێ وە لۆكی بكەن (قفڵ) بكەن بۆ ئەوەی نەتوانن دایبەزێننەوە وە كۆنترۆڵی تەواوی هەرزەكار بكەن لە رویی ئینترنێتەوە بەتایبەت پاسوەرد دابنێن و ئەو پاسپۆردە خۆت بیزانیت و ئەگەر پێویستیت بە هۆشیاری و رێنمایی لە كەسی شارەزا لە بواری IT ئنتەرنێت بپرسن كە چۆن ئەم بەرنامانە قفل بكرێ و چاو دێریی بكرێت . 

ئەم بابەتە لە ئێستادا بۆتە پەتایەكی جیهانی و هەموو ووڵاتان مەبەستیانە كە پارێزگاری لە مناڵەكانیان بكەن و نەكەونە ناو تۆڕی بێ ڕەحمانەی زاڵم و مافیاكان، بۆ ئەم مەبەستە هاوكاری نێودەوڵەتی هەیە لەنێوان دامو دەزگاكانی ووڵاتاندا ، لە چەن مانگی پێشوودا لە ووڵاتی بەریتانیا لە هەڵمەتێكی گەڕاندا لەلایەن ئاژانسی تاوانی نیشتمانی توانیان نزیكەی ٦٠ هەزار كەس لەجیهاندا بدۆزنەوەو كە لەوانە 10 هەزاریان لە بەریتانیا بوون و نزیكەی تا ئێستا 177 كەسیان دەستگیر كردوە كە تەنیا لەو هەڵمەتدا دەستیان گرتوە بەسەر ٥٤ ملێۆن پاوەن و 2 تەن ماددەی هۆشبەرو سەدان چەكو تەقەمەنی و كارتی بانكی ...هتد ، ئەمانە لە ڕێگەی ئینكرۆچات ( encro chat ) كە پرۆگرامێكە لەدارك وێب پەیوەندییان بەیەكەوە كردوەو بەڵام دواجار پۆلیس توانیوێتی بچێتە ناو تۆڕی پەیوەندیەكانیان و شوێنەكانیان بدۆزێتەوەو ژمارەیەكیان دەستگیر بكات ولە ئێستادا بەدوای ئەوانەی تردا دەگەڕێن. 

هەر بۆیە تكام وایە لە دایكان و باوكان هۆشیاریی تەواوەتیان هەبێت لە هەموو هەڵسوكەوتێكی هەرزەكار ، ناڵێم بەچاوی تاوانبارەوە سەیریان بكەن بەڵام لەبەرئەوەی زوو ئەبنە قوربانی ئەم كەسانە كە زۆر شارەزان و بەئاسانی فریو ئەدرێن ، مەڵێ مناڵەكەم ژووری خۆی هەیەو لەسەرەوەیە یاری دەكات یان لەگەڵ ڕەفیقەكانیدایە بۆ خۆی لەماڵەوەیە قسەیان لەگەڵ دەكات و هیچ ناكات چونكە ئەو دوژمنەوەو بەڵایەیی لێی دەترسی لەدەرەوە توشی ببێت ئێستا هاتوتە ناو ماڵەكانمانەوە و لەنێوانماندا دەژی بۆیە تكایە ئاگاداربە چونكە دواتر پەشیمانی دادی كەسمان نادات.



پرۆفایل
پارێزەر/ پروشە قەلەندەر كەسنەزانی
ماستەر لە لێكۆڵینەوەی تاوان /بەریتانیا