جۆرەكانی گۆرانی و گۆرانیبێژ

3 مانگ پێش ئێستا

توانا حەمە
هەندێك گۆرانی، خۆیان و خاوەنەكەیان دەشێت پیر ببن، بەڵام نامرن و هەر دەمێنن. 
- هەندێك گۆرانیبێژ بەر لە خۆیان گۆرانییەكانیان و هونەرەكەیان دەمرێت، دەشێت خۆیان زۆر بژین، بەڵام هونەرەكەیان ناژیت.
- هەندێك تا مردن بە گۆرانییەكانی رابردوویان دەژین، لە لوتكەی رۆژگارێكدا رادەوەستن، ئیدی یەك (پیتی) تر ناڵێن و گلەیش زۆر ناكەن، چونكە باش دەزانن هونەرەكەیان بەرگەی ئەمڕۆژگارە ناگرێت، هەرچی بڵێن: 
دەشێت رابردووی خۆیانی پێ لە ناوبەرن.
-هەندێك گۆرانیبێژ (هەر لە رابردووی خۆیاندا دەژین، رابردویان گەرم دەكەنەوە، وەستاون و نازانن چی بكەن، توڕەن كە گوێیان لێ ناگرن، كە رۆژگارێك لە لوتكەدا بوون، نازانن ئەوە هەڵەی خۆیانە كە نازانن خۆیان نوێ بكەنەوە، تا بەرگەی شەپۆلە نوێكان بگرن. 
ئەڵمانەكان دەڵێن: گرنگە (بگەیتە لوتكە بەلام لەو گرنگتر مانەوەیە، بەڵێ مانەوە لە لوتكەكەدا).
- ئەم ڕۆژگارەی ئێستامان بێ رەحمترە، بۆیە گۆرانیبێژ لەگەڵ بڵاوكردنەوەی بەرهەمەكانیان پاش یەك هەفتە مەرگی گۆرانییەكانیان دەبینن، بۆیە بە بەردەوامی لە خەمی ئەوەی كەخۆشی لە سەر شانۆی هونەردا نەمرێت، بە بەردەوامی فشار لەخۆی دەكات شتی نوێ بڵاو دەكاتەوە، تەنانەت خۆیان لە باسی رۆژ دەدەن، ئاساییە كە (قسەی نەشیاویش بە هونەرەكەیان بوترێ، ئاساییە كەسانێك كە گوێیان لێ دەگرن، گاڵتەجاڕیان پێبكەن)، بۆ ئەوان گرنگ ئەوەیە هەفتەیەك گۆرانیەكانیان باس بكرێ.  
تەنها لەبەر ئەوەی فەرامۆش نەكرێن، لەوە دەگەن كە (هونەر وەكو كۆرپەیەكە، بە فەرامۆشی دەمرێت).
یاخود زۆرجار بەرهەمەكانیان هەروەك ئەو كۆرپەلەیەی ناو منداڵندانی دایكن، كە دڵی بۆ دروست نابێ، لەجێی لە دایك بوون، لەبار دەچێت.
-كۆتا جۆر: هەندێك گۆرانیبێژ هەیە، گۆرانیش نەڵێت كەس گلەییان لێ ناكات.
بەگشتی لە دنیادا هەر ئەم جۆرانە هەیە، دابەش دەكرێن بەسەر دوو لقدا: هونەرێك هەیە پێی ئەڵێن: 
-كیچ- هەرزە هونەر 
-هونەرێك هەیە پێی  دەلێن: ئاڤانگارد- پێشڕەو
ئیدی ئەوە گۆرانیبێژە كام رێچكەیە هەڵدەبژێرێت..