تا نەكەویت، سەرناكەویت

2 مانگ پێش ئێستا

سومەیە عەلی
شكست بەشێكە لە ژیان، وەكچۆن سەركەوتنیش بەشەكەی دیكەیەتی، زۆرێك لە ئێمە لەگەڵ یەكەم شكستی  ژیانمان دوور ئەكەوینەوە لە ئامانج و خەونەكانمان، وا دەزانین تەواو، ئیتر كۆتای دونیایە، تەواو كە كەوتین، هەڵناسینەوە، ئەوەی لە دڵماندایە بۆمان نابێت.
بەڵام پێچەوانەی ئەمە دروستە، هەتا شكست نەهێنی سەر ناكەویت هەر كەوتنێك سەر كەوتنێكی مەزنی لە دوایە ئەگەر مرۆڤ گەشبین بێت و هیوا بەرنەدات.

ئەگەر سەیری ئەزمونی گشت كەسە مەزنەكانی جیهان بكەیت، بەر لە سەركەوتنیان، تامی چەندین شكستیان كردوە، بگرە هەندێكیان بەناو ئۆقیانوسێك لە شكستدا هەنگاویان ناوە، بەڵام دواتر چونەتە ناو لاپەڕە زێڕینەكانی مرۆڤایەتی .

تۆی مرۆڤ، كچ بی یان كوڕ، گەنج بیت یان پیر، خوێندەوار بیت یان نەخوێندەوار، تەنها ئومێدت هەبێت، ئەمرۆ یان رەنگە سبەی رۆژی وەدیهاتنی خەونەكەی تۆبێ. ئەوەش بزانە، چارەنوس نیە، بەڵ:و خۆتی دیاری دەكەیت كە سەركەوتوو دەبیت یان شكستخواردوو.
رەنگە ئەو كاتەی تۆ ئومێد بەرئەدەیت ، تەنیا چەند هەنگاوێكت مابێ لە تاریكیەوە بچیتە روناكیەكی ئەبەدی، یان لە شكستەوە برۆیتە سەركەوتن، لە خەمەوە بۆ شادی، لە خۆخواردنەوە بۆ خۆشنودی!

 هەرگیز لە هەوڵدان مەوەستە پشت بە تواناكانی خۆت و ئەو بەخششە ببەستە كە خولقێنەری تۆ پێی بەخشیویت، چونكە چۆن شكستی بۆ نوسیوی، ئاوەهاش لە سەركەوتن پشكی تۆیشی داناوە، وەك چۆن شكان هەیە، سەركەوتنیش چاوەرێتە، وەك چۆن خەم هەیە، شادیش هەر هی تۆیە، هەموو ئەوانە لە كاتی دیاری كراوی خۆیدا، هەر ئەوكاتەی تۆ وا هەست ئەكەیت هیچ شتێكی ئەم دونیایە بە دڵی تۆ نیە، جوانترین شتەكان چاوەڕوانتن، با شكستەكانتان نەتانروخێنی، بەهێزبن بەرامبەر ئاستەنگیەكانی ژیانتان، هیچ خەمێك، هیچ شكستێك هەمیشەیی نیە لەم دونیا كاتیە، ئەگەر باخەوان مەبەستی گوڵچاندن بێت زەویەكی وشك و بێ سودیش ئەكاتە گوڵستان ...