بۆ شەڕدەكەین لە یاریگاكاندا؟ گرفتەكان لە كوێدایە؟

2 مانگ پێش ئێستا

زەردەشت عوسمان
ئێستا شەڕ و ئاژاوە نەبێ هیچ سیمایەك لە وەرزشی كوردستان بەدی ناكرێ، سەیر ئەوەیە كەس بیرناكاتەوە بۆچی شەر دەكات؟ 
خولی كوردستان خۆی هەر پەیام و ئامانجی نیە تا شەڕی لەسەر بكرێت، نە لەڕووی هونەرییەوە ئەوەندە پێشكەوتوە بتوانێ یاریزانی ئەستێرە دروست بكات، نە بووەتە بازرگانی و سەرچاوەی داهات هۆكار نیە بۆ دەسكەوتی مادیی، نە دوایی ئەم ئەنجامانەی ئێستا وێستگەیەكی باشتر و بەهێزتر هەیە پێی بگەی، بۆ نموونە بڕۆیتە پلەیەكی بەرزتر و بەشداری پاڵەوانیەتیەك بكەی . 

ئەوەی كە وەرزشی پەیامی ئاشتی و برایەتیە كەس بیریشی لێناكاتەوە، ئەو پایامە وەك كردار خراوەتە ژێر پێڵاوەكان، خولەكانی كوردستان بوونەتە شوێنی دروستكردنی مەترسی بۆ سەر ژیانی مرۆڤەكان، ئەم وەرزشە خوار خێچەی كە دەكرێت دەبێ چاوەڕێیی ئەم گرفتانەش بكەی،  لەم ماوە چوار شەڕی گەورە لە شار جیاوازەكان ڕوویداوە . ڕاستیەكە ئەوەیە هیچ یانە و شارێك بەدەرنیە لەم نەخۆشیە، ئەو یانەی شەڕی نەكردوە چاوەرێیی دەكرێت بیكات ئەوەشی كردویەتی هیچ گرنتیەك دیسان لەبەر هەڵەیەكی بچووك دووبارەی نەكاتەوە . 

هەڵەكە لە كوێیە؟ 
بە بڕوایی من گرفتەكە لە بونیاد و پەروەردەی ئێمەیە، تێگەشتنی هەڵە بۆ وەرزش و نەبوونی ڕۆشنبیری تایبەتمەند لە كەسەكان كە ئایا تۆ چۆن هەڵسوكەوت دەكەی لەگەڵ كارەكەت . ئەوەی جێگەی سەرسوڕمانە یەكێك لەشەڕەكان لەسەر ئاستی تیپی تازە پێگەشتوان بووە كەواتە ئەوانەی لە داهاتوو دەبنە نوێنەری یانەكان لەسەر ئاستی پێشكەواتوان پەروەردە نەكراون . 

هۆكاری ئەم شەڕو ئاژاوە و یەكتر قبوڵ نەكردنە هی ئێستا نیە مێژووەكەی لەو كۆنترە بیری لێدەكرێتەوە، ئەوەی كە یەكەم كەس ئەنجام و هەڵە قبوڵ ناكات ڕاهێنەر و یاریدەدەر و سەرپەرشتیارەكانن، دێنە سەر شاشە دەڵێن نابژیوانەكان دژی ئێمەن و ڕقیان لێمانە ئیتر ئەم وێنە لە مێشك و بیركردنەوەی هەمووان جێگیردەبێ، كاردانەوەی ئەمان هۆكاری كاردانەوەیی یاریزانەكانن، كاردانەوەی توندی یاریزانەكان پاڵنەرن بۆ دروست كردنی كاردانەوەی توندتر و سەختی هاندەران . دیقەت بدەن لە یارییەكاندا لەسەر فاوڵێك یان هەڵدانێكی لا جار هەیە چەند یاریزان بە توندی بەرەو ڕووی نابژیوان  دەڕۆن شڵەژان و شێواوی لە یاریگا دروست دەبێت، كە ئەمە بەردەوام دەبێ سەر ئەنجام توندو تیژی لێ دێتە بەرهەم . كەواتە هاندەرەكان هۆكاری گرفتەكان نین ئەوان دواین كەسیشن داغڵی كێشەكان دەبن . 

ئەو یاریزانانەی كە ئێستا دۆڕان و هەڵە قبوڵ ناكەن لە داهاتوو هەر ئەمانە دەبنە ڕاهێنەر و یاریدەدەری ڕاهێنەر و سەرپەرشتیار، بیركردنەوەكە ناگۆڕێ تەنها زەمەنەكە گۆڕاوە كەواتە دۆخەكە هەر بەردەوامە . گومانم نیە ئەمە بنبڕ ناكرێ بەڵام دەكرێ كەمتر بكرێتەوە، چۆن ؟ دەبێ یانەكان بە جدی كۆنترۆڵی تیپەكانیان بكەن، كاپتنی تیپ دەبێ هێزی كەسایەتی و ڕۆشنبیری هەبێت توانایی گفتوگۆی هەبێ زمانی قسەكردنی لە یاریزانەكان جیاوازبێ، چونكە قسە و جوڵەی كاپتن لە زۆر كاریگەری هەیە لەسەر یاریزان هەیە و دەتوانێ كۆنترۆڵی یاریزانەكان بكات، تەنها ئەو ڕووبەڕووی نابژیوان ببێتەوە بە شێوەیەكی سەردەمی، لەم زەمەن كاپتن ڕاهێنەرێكی ترە لەناو یاریگا هێندە گرنگە . دەبێ بەرپرسانی وەرزش سزایی سڕكردنی ماوە درێژ دابنێن بۆ ئەوانەی لە ناو دامەزراوەی یانەكانن و هۆكاری شەڕ و گرفتەكانن، یان بە جۆرێك بەشدار دەبن، چونكە سزایی دارایی كاریگەری نەماوە 

لە كۆتایی دەڵێم ئەوەی هەیە ئێستا هەمووان چاكەت تۆزاوییەكانیان بە عەلاگەی نابژیواناندا هەڵدەواسن .