سیندرومی جەستەی جوان

16/02/2021

بەشیك لە ووتارێكی درێژ بە ناوی فیتشیزمی مێینە....
شارا تاهیر
وەك دەزانین دیاردەی جوانكاری ژنان لە دونیادا بە گشتی و لە كوردستانیشدا بە تایبەتی زۆر بڵاوە بە جۆرێك كە كەم ژن یان كچ دەبینین كە سیماو جوانی سروشتی خۆی دەسكاری نەكردبێت و شتێكی تیا نەگوڕیبێت. 
ڕەنگە ئەمە بە دێوێكدا وا دەربكەوێت كە ژن توانیویەتی لە گەڵ جەستەی خۆیدا ئاشتبێتەوە، پەی بەو جوگرافیایە لە چێژ و سێكسوالیتی  جەستەی دەبات. 

لە ئێستادا ژن خۆی هەم نمایشكارێكی بەردەوامی جەستەی خۆیەتی، بەو شیوەیەی كە دەیەوێت و بە بەرگەیش كە ڕازیدەكات نمایشدەكات وە هەمیش سوبێكتێكە و جەستەی خۆی دەكاتەوە بە ئۆبێكت دەستكاری سیماو سیفاتەكانی دەكات. واتە ژن لە یەك كاتدا هەم سوبێكتە وە هەمیش ئۆبێكتە بەلام ئۆبێكت بۆ خۆی، خۆی دەبێتەوە بە چێژ بۆ خۆی لەڕێی فیتشیزەكردنی پارچەیەك یان چەند بەشێكی جسەتەی خۆی بۆ نممونە (لێوی، سمتی، ڕوومەتەكانی یان مەمكی). 

بەربڵاوی ئەم دیاردەیە و ئەم مۆدێلە لە ژن و لە جەستەی جوانكاریكراو ڕەنگە ئاماژەیەك بێت بۆ ئەوەی كە جەستەی ژن چیتر ئەو جەستە پەنهان، شاراوە، ئەفسوناوی و ئیرۆتیكە نەبێت كە لە درزی عەبایەكەوە پیاو بتوانێت پەی بە تەلیسم ، جوانی و سیحر و نازو فریوی ببات. بەڵكو ژن خۆی جەستەی خۆی بەرجەستە دەكات و نمایشی دەكات تا چاوی ئەویتری پیاو نیگای بكات. ژن خۆی بۆتەوە بە خاوەنی جەستەی خۆی. ئەم پەیوەندیە نارسیستیەی ژن لە گەڵ جەستەی خۆی، ئەم عەشقە فیتشیە بۆ جەستەی خۆی. ژن دەكاتە جەستەیەكی فالیكی فیتشی.   
بە مانایەكی تر، هەڵبژاردن و بەرجەستەكردنی بەشیك یان جەند بەشیك وەك ئاماژەیەكی ئیرۆتیكی وادەكات كە چیتر جەستە ئۆبێكتێك نەبێت بۆ چێژ بەڵكو جەستەیش دەبیتەوە بە فۆڕمێك و ئاماژەیەك وەك هەر ئاماژەیەكی تری لە دونیای فاشێۆن و ڕیكلامدا. بۆ نموونە سمتی كیمكارداشیان لە دونیای ریكلامدا بە تەنیا خۆی ئاماژەیە وەك چۆنیش كۆپییە كە ئۆریژناڵەكەیمان نییە بە مانا بۆدریارییەكەی. 

 بەڵام پرسیارە جەوهەریەكە دەبێت ئەوە بێت كە ئایا بە ڕاست ژن توانیویەتی جەستەی خۆی ئازاد بكات؟ ئایا ئەو جەستە فیتشیە دروستكراوەی (فابریكەكراو) ژن زادەی خەیاڵ، چێژ و ئارەزووە سێكسیەكانی ئەویتری پیاو نییە؟  ئەوە هەر ئەو نەستە پیاوگەراییش نییە كە بۆتە بە هەوێن بۆ سیستمی سەرمایەداری تا جارێكی جەستی ژن بەكاربێنێتەوە بەڵام لە ڕێی خودی ژن خۆیەوە بە وەهمی ئازادیەوە، ئازادیكردنی جەستە لە خودی جەستە خۆی،  بۆ ساغكردنەوەی كاڵاكانی؟ ژن بێئاگایە لەوەی كە ئەو تەنها لەودا ئازادە كە چی دەكڕێت و چەندی پێدەدات، ئەوەی كە ئازاد بووە جەستەی نییە. ئازادكردنی نەستی پەشۆكاو پاتۆلۆژی ژنە بۆ جەستەی ناڕیك و ناتەواوی خۆی. 

ئەوەی ئەم ژنانە كۆدەكاتەوە لە ڕاستیدا جوانكاری و خۆدەرخستن نییە وەكچۆنش بەكاڵاكردنی و بە ئۆبێكتكردنی جەستەیان نییە وەك بوكەڵەیەكی پلاستكی و سلیكۆنیی، بەڵكو سیفەتی كەموكورتی و ناشرینیەكەیانە بە مانایەكی تر، ئەوەئ ئەم ژنانە كۆدەكاتەوە ئەوەیە كە هەموویان دەردەداری دەست  ئەو شتەن كە نیانە ئەویش جوانییە! ئەمانە  دەیانەوەێت جوان بن و ببینرێن. دەیانەوێت جوانی خۆیان دەربخەن بەڵام مەرجی پێشوەخت بۆ ئەم دەركەوتنە شاردنەوەی ئەوەیە كە ناشرینە ژنگەلێكن كە لە گەڵ جەستەی خۆیان و ڕۆحی خۆیان تەبا نینن. باوەڕیان بە خۆیان نییە. دەیانەوێت لە كەسێك بچن بەلام ئەو كەسە خۆیان نین. ئەم ژنانە هەر كات تەماشای خۆیان دەكەن لە ئاوێنەكەدا ڕووخساری خۆیان نابینین بەڵكو ڕووخسارگەلێكی تر كە ئەوانیش كۆپیین بۆ وێناگەلێكی تر، هەمیشە وینایەك هەیە لە دەرەوەی ئەوان جوانترە، كێشەی وێنای ناو ئاوێنەكە ئەوەیە كە جێگیر نییە هەمیشە لە گۆڕاندایە. بە مانایەی ئەو وێنایەی كە تۆ دەتوێت بچیتەوە سەری و لە بچیت ئەو خۆیشی كۆپییە لە گۆڕاندایە و ناگیرێت.

  بەڵام ژنی جوان كێیە و چۆنە؟ ئایا ژنی جوان ئەو دەموچاوە بێ سیما و شلۆكەیە كە دەتوانێت هەموو فیگەرێك بێت بەڵام هیچیشیان نەبێت؟ ئایا جەستەی جوان ئەو جەستە پارچە پارچە، فابریكە كراوەیە كە ئێستا هەیە؟ ئەی دەتوانین ئەمە بە نەزمێك لە نەزمەكانی ئازادی بۆ ژن ببینین؟ فێمینستەكان چۆن لە سەر ئەم بابەتە ‌هەڵوەستەیان كردووە؟ ئەی فێمینیزمی سوراوسپیاو چیمان پێدەڵێت لە سەر ئەم بابەتە؟