هاوسەرگیری لەنێوان نمایشی سناپچات و ژیانی راستەقینەدا!

20/02/2021

سۆزیار بەختیار
لەم واقعە كۆمەڵایەتیەی تیایدا ئەژین، لەم كۆمەڵگا داخراوەی دەیبینین، لای بەشێكی زۆر لە تاكی كۆمەڵگا بە تایبەت كچانی كورد بەختەوەری بەستراوەتەوە بە پرۆسەی هاوسەرگیریەوە ،كە بە داخەوە وا پەروەردە كراون تەنها یەك هۆكار ببینن بۆ خۆشی و ئازادی، زۆر كات ئەو ئازادیەشی پێ نابەخشرێت كە ئەیەوێ بە دەستی بێنێت.. ئەمەش چەندین هۆكار و پاڵنەری دەروونی و كۆمەڵایەتی لە پشتە كە ئەو خانمە پیاوێك بە هۆكاری بەختەوەری بزانێت.
ئەبینرێت و ئەبیسترێت، ڕێگری هەیە لەخێزاندا، خولیا و ئاواتی زۆربەی كچانی كورد بەهۆی ئەم ڕێگریە زۆرە نەك خۆشبەختی نەهێناوە بۆیان، بەڵكو چەندین تاوانی قێزەون و جۆراوجۆر لێ ئەكەوێتەوە، چەنەها نەخۆشی هێدمە و دەروونی تاكی لێوە بەرهەم دێت هەر ئەمەشە كە وا ئەكات كچان پەنا ببەن بۆ هاوسەرگیری بەڵام چ جۆرە هاوسەرگیریەك!!

هاوسەرگیریەك دەكەن دوور لە ویستی دەروونی خۆی، دوور لە گونجان، هاوسەرگیریەك كە تەنها دەیانەوێ  حەزە سێكسیەكان و غەریزەكانیان پڕ بكەنەوە بەبێ بوونی هۆشیاری و پاشان مناڵ درووست دەبێت لە كۆتاییشدا بە هۆی ناجۆری پرۆسەی هاوسەرگیریەكە و تێنەگەیشتن و پێنەگەیشتنەوە، جیابوونەوە دروست دەبێت، زۆریش ڕونە كە لە بنەڕەتدا ناتوانن ژیان درووست بكەن هۆشیان گەشەی پێ نەدراوە تا ئەو بەرپرسیارێتییە هەڵبگرێ.

هەندێ لە كچانمان چونەتە مۆدێلە سۆشیاڵییەكەوە، لاسایی كەسانی وەك خۆی دەكاتەوە، هاوسەرگیری بە بە (عید الزواج) و بێرزدەی و ڤالانتاین و سناپ تێگەشتووە، لەبەر زۆر كاریگەریان بەم شتە باوە دەیانەوێت بە زووترین كات بچنە ناو ئەم پرۆسەیەوە بەڵام كاتێك دەچێتە ناو ژیانە راستەقینەكەی هاوسەرگیریەوە قورس دەبێت بۆ ئەو توانایەی هەیەتی ئامادەگی تێدا نییە لە دواجاردا بە هەر بە جیابونەوە و ناكامی كۆتای دێت.
كچ لێرەدا فریوی سناپ و وێنەی هاوڕێكانی دەخوات كە لە سناپ چات و ستۆری سۆشیال میدیا دایدەنێن و وای پیشان دەدەن ژیانێكی ئاسودەیان هەیە، بێئاگا لەوەی كە سۆشیال میدیا بۆتە هۆی دروست بونی مرۆڤی ساختە و هەستی ساختە و زۆربونی نمایش كردن و نواندن، بە مانایەكی دیكە، كچانی ئالودەبوو بە سۆشیال میدیا، تەنیا نواندن دەكەن و لەورێگەیەوە دەیانەوێ دۆزەخەكەی ماڵەوە وەك بەهەشتێكی پڕ لە ئاسودەیی نمایش بكەن و كەسانی تریش بكەنە هاوبەشی ئەم دۆزەخە زێڕكەفت كراوەیان.
لێرەوە كچ بۆی دەر ئەكەوێت كە تەنیا ڕەگەزی بەرامبەر تاكە هۆكار نیە بۆ بەختەوەری بەڵكو ڕەنگە ببێتە هۆی تاڵكردنی هەموو ژینت..بەڵام پاش چیی !!

هاوسەرگیری قۆناغێكی گرنگ و گەورەی ژیانە، بۆ هەردوو رەگەز، بەڵام بەر لەم قۆناغە پێداویستی خۆی هەیە و پێویستە تاك بە ئامادەكاری زۆردا بروات ئەگەر هاوسەرگیری وەك پرۆسەیەكی بنیاتنانی خێزان سەیر بكات، بەڵام ئەگەر بابەتەكە هەر بۆ زیادبونی نمایشكارێكی تر و مرۆڤێكی ساختەی تری ناو سۆشیال میدیا بێت، ئەوا باشترە پرۆسەی هاوسەرگیری بگۆڕین بۆ پرۆسەی نمایش یان نواندن.

من و تۆی كچ، ئەگگەر هاوسەرگیری دەكەین پێویستە بەدوای باشترین بژاردەدا بگەڕێین، ئامادەكاری دەرونی و كۆمەلایەتی بۆ بكەین، بەڵام ئەگەر هاوسەرگیریمان تەنیا بۆ نمایشەكەیە، ئەوا باشترە لەبری هاوسەرگیری و خۆ وێران كردن، بچین ببینە ئەكتەر و مۆبایلێكی نوێ بكڕین و لەو شانۆ و فیلمانەی بەشداری دەكەین چێژ لە هاوسەرگیری درۆینە وەربگرین.