فەوزای میدیای كوردی

2 مانگ پێش ئێستا

چی لەو هەموو قەحبە و هەتیوبازە بكەین؟
توانا ئەمین
وروژاندنی كەیسی هاوڕەگەزخواز و لەشفرۆشەكان و لەشفرۆشخانەكان لە میدیای كوردیدا بۆ ئێستا تەقەتەقی بێجێیە، ئەمە خەڵك توڕەتر دەكات..

ئەم پرسە لە سەرەتای ژیانەوە هەبووە (سەیر دەبێت بۆت ئەگەر بزانی لەشفرۆشی كۆنترین پیشەیە لە مێژووی مرۆڤایەتیدا)، ئەوجا لەو مێژووە درێژدا ئەم پرسگەلە هەم یاری هەبووە هەم نەیار، بەڵام ئەوەی ڕاستییە و كەس ناتوانێت بیشارێتەوە ئەوەیە ئەمە كێشەی هەموو كلتوورێكە.

هەرچی بابەتی هاوڕەگەزخوازییە، لەدنیادا مشتومڕ و كێشەیە؛ ئەمریكا وەك ئەو وێنەی ژیانە ئازادەی خۆی لەسەر زەوی نیشان دەدات دوای 300 ساڵ هێشتا دوو هاوڕەگەزخواز ناتوانن وەك دوو ژن و مێردی ئاسایی لە خزمەتگوزارییە یاسایی و كۆمەڵایەتییەكان سودمەند ببن، تۆ بۆ لە كوردستان ئەم پرسە هەستیارە كە حاڵەتە و نەبووە بە دیاریدە دەوروژێنت؟

من لە سوید دەژیم لەوێش بۆ خێزانێكی ئاسایی سویدی قورسە لەپڕ كوڕەكەیان بڵێ گەیم یان كچەكەیان بڵێ لیسبیانم! ڕەنگە ئەگەر سۆسیۆلۆژیانە و بە سودوەرگرتن لە تیۆرەكانی فەیلەسوفی فەرەنسی میشێل فوكۆ ئەم ئاریشەیە بخوێنینەوە؛ بگەڕێتەوە بۆ ئەوەی كە لەسەرجەم كۆمەڵگای بەشەرییدا هاوڕەگەزخوازەكان كەمینەن و زۆرینە نین.

ئەوەی وابزانێ لەنێو ئێمەدا هاوڕەگەزخوازی بوونی نییە هەم خۆی دەخەڵەتێنێت هەم ئێمە، ئەوەتا نالی 200 ساڵ لەمەوپێش وەك ناڕەزایەتی دەربڕین دژی حاڵەتی هەتیوبازی، ڕوو بە پیاوان پەسنێكی بەرزی كچ دەكات و دەڵێ خۆت لە كوڕ لادە.
فەرقی كوڕ و كچ ڕۆشن، وەك فەرقی مەه و میهرە
ئەم فەرقی شەو ڕۆژە وەك فەرقە لە كوڕ تا كچ
مەه مەه لە مەهی سادە: یەعنی لە قەمەر لادە
هەم شەمس و سورەییا كچ، هەم زوهرەیی زەهرا كچ

ئەم بابەتە دەبێ یاسا ڕێكی بخات، لە كوردستانیش هیچ هێزێكی ناو حكومەت و ئۆپزسیۆن نەیوێراوە و نایشوێرێ خۆی لە قەرەی ئەم پرسە بدات، كەواتە ئەوەی ئێستا لە میدیای كوردیدا دەگوزەرێ كە بریتییە لە خستنەبەرچاو و هەندێ جار هاندان و شوێن پیشاندان بۆ خەڵكی تریش؛ كارێكی ناشرین و نابەرپرسیارانەیە! 
ئێرا شەبەقی ئیتیكی كاركردنی میدیاییە بەوەی پرسێك دەجوڵێنیت كە لە زیانی ژیانی گشتی و كۆمەڵگایە و بۆشت چارەسەر ناكرێ، بەڵام تەسویقی دەكەیت، دەیخەیتە بەرچاو و خەڵكی تری بۆ هان دەدەیت!