لەشكڕەكان كێن؟!

22/02/2021

هیوا رەفیق
ئاشكراكردن و لادانی پەردە و تەمومژ لەسەر  لەشكڕ و لەشفرۆشان كارێكی زۆر زۆر مەزنە؟ پرسیارێك دێتە پێشەوە ئەویش ئەوەیە، بۆچی كارێكی زۆر باشە؟؟؟ 
كەناڵەكانی ڕاگەیاندن بەگشتی و كەناڵی تەلەفیزیونی بەتایبەتی كاری هەر ئەو نییە باسی هەواڵی گەرمی لە چەشنی سیاسەت و تەندروستی و ئابوری وڵاتەكەی بكات، بەڵكو پێویستە ئەو كەناڵانە دەست بەرن بۆ ئاكار و لایەنەكانی تری ناو كۆمەڵگاكەی واتا پێویستە لە پاڵ دەست بردن بۆ بابەت و دیاردە جوان و ناوازەكانی ناو كۆمەڵگا هەر لە هەمان كاتدا پەنجە بخاتە سەر دیاردە هەرە دزێو و ناشرین و هەستیار و نامۆ بە كۆمەڵگاكەی. پێویستە ڕووی ڕاستەقینە و بۆگەنییەكانی كۆمەڵگاكەشی پیشان بدات و بە مەبەست و نیەتی دۆزینەوەی چارەسەرێك. 

پرسیارێك دێتەپێشەوە كە ئایا: لەشفرۆشەكان دیارە كێن و بە كام زمانانەش قسە ئەكەن، واتا لەشفرۆش (ئافرەت)ەكان دیارن كە زۆرینەیان خەڵكی دەرەوەی سنوری هەرێمی كوردستانن و ڕەنگە ناوەوەی هەرێمیشی تیابێت و كورد زمان بێت. بەڵام ئەی ئەوانەی لەشئەكڕن و مەیلی جوتبونی نایاسایی ئەكەن كێن كێ؟

ئەزانن هەمووی خەڵكی ناوشار و شارۆچكە و ناحیە و گوندەكانی كوردستانن واتا خەڵكی غەریبە و ڕێبوار نایەت لێرە لەم سلێمانی و هەولێر و دهۆكە خۆی سارد بكاتەوە و سێكس بكات لە بەرامبەر بڕێك پارە.

ئەزانن ئێستا لەوەیە لە هەر گەڕەكێك یەك تا دوو یان زیاتریشی لەو لەشكڕانە تیا بێت!!؟؟ ئەوەی كە جێگەی سەرنجە و بە جوانی هەستی پێ ئەكرێت كە لۆمە و سەرزەنشتی خەڵكی بە تەنها لەسەر لەشفرۆشەكانە و كەمتر و تا ئاستی لە بیر كردن باسی لە شكڕەكان ناكرێت لە هۆشی خەڵكیدا نین. 

ئەمە لەكاتێكدایە گەر بۆ لەشفرۆشێك تاوان بێت ئەوە بە هەمان شێوە بۆ لەشكڕەكانیش تاوانە و زیاتریش چونكە لەشكڕەكان بە پارە هانی ئافرەتان ئەدات لەشی خۆیان بفرۆشێت.