رۆشنبیری دژە ئازادی

5 مانگ پێش ئێستا

  پێشواز فەیزوڵا
وەڵامێك بۆ مەریوان قانع و ئاراس فەتاح
 ووتارەكەیان بە ئەم رستەیە دەستپێدەكات: "لە كۆمەڵگای ئێمەدا، بەشێوەیەكی گشتی، ژن خاوەنی جەستەی خۆی نییە." لەسەر بنەمای ئەم رستەیە، ئەم ئارگیومێنتە دەخەنەڕوو: ئەگەر ژن خاوەنی جەستەی خۆی نەبێت (مەبەستیان لە كچان و ژنانە كە لە ڤیستیڤاڵی باڵاپۆشییدا بەشداربوون وەك گروپی یەكەم؛ ئەو ژنانەشی كە مۆدێلن و لە ئێستادا بوونەتە جێگەی باس لە كوردستان وەك گروپی دووەم)، كەواتە قسەكردن لەسەر ئازادی هەڵبژاردن لای ئەو ژنانە، بەگوێرەی ووتارەكەیان، "خۆهەڵخەڵەتاندنە". لە دەرئەنجامی ووتارەكەشیاندا باس لەوەدەكەن كە لەدەرەوەی ئەو دوو گروپە لە ژن، گروپی سێیەم هەیە كە ئەو ژنانەن كە خاوەنی جەستەی خۆیانن. هەروەها دەڵێن پێویستە بەرگری لە گروپی سێیەم بكرێت نەوەك لە گروپی یەكەم و دووەم لەبەرئەوەی تەنها گروپی سێیەم خاوەنی تەواوی جەستەی خۆیەتی و هەڵبژاردنەكانی دروستن.
ئەو نووسەرانە لەسەر بنەمای جیاكردنەوەی "ئەوانەی خاوەنی جەستەی خۆیان نین" و "ئەوانەی خاوەنی  جەستەی خۆیانن" تێكڕای ئارگیومێنتی ووتارەكەیان داڕشتووە. بەڵام بناغەی ئارگیومێنتەكەیان هەڵەیە. واتە ئەو جیاكردنەوەیە بەو شێوە رەهایە بوونی نیە. لەخوارەوە روونیدەكەمەوە.

خاوەندارێتی جەستەی ژن
یەكێك لە ئارگیومێنتە سەرەكییەكانی بزووتنەوەی فێمینیستی لە سەرتاسەری دنیادا بریتییە لە داكۆكیكردن لە مافی ژن لە خاوەنداریكردنی جەستەی خۆیدا (واتە سەربەخۆیی ژن لە كۆنترۆڵكردنی جەستەی خۆیدا). كۆنترۆڵكردنی سێكسكردن و سیستەمی منداڵبوون لەلایەن ژن خۆیەوە گرنگترین و سەرەكیتریین بەشی ئارگیومێنتی فێمەنیستەكانە و بناغەی خودخاوەنداریكردنی جەستەی ژنە.
خودخاوەنداریكردنی سیستەمی منداڵبوون واتە تەنها ژن خۆی بڕیاربدات لەسەر رێگەكانی بەرگرتن لە سكپڕبوون، هەروەها لەكاتی روودانی سكپڕبوونی پلانبۆدانەنراودا، ژن مافی بڕیاردانی هەبێت بۆ كۆتاییهێنان بەو سكپڕییە، لانیكەم لە یەكەم سێیەی قۆناغی سكپڕبووندا. 
ژنان لە چەندین ووڵاتدا ئەم مافەیان هەیە و ئەم مەسەلەیە یەكێكە لە تەوەرە گشتی و سەرەكییەكانی داكۆكیكاریی بزوتنەوەی فێمێنیستی لە دنیادا لەبەرئەوەی مافی كۆنترۆڵكردنی جەستە دەخاتەوە دەستی ژن خۆی و لەژێر كۆنترۆڵی پیاو و دیین و دەوڵەت و هێز و گروپەكانی دیكە دەرهێنراوە. 
ئەگەر پێوەرێكی گەردوونیی مافی ژن بۆ خاوەنداریكردنی جەستەی خۆی بریتیبێت لە مافی ژن بۆ كۆنترۆڵكردنی سیستەمی منداڵبوون، كەواتە دەتوانیین ئەم پێوەرە بەكاربهێنیین بۆ هەڵسەنگاندنی هەمان پرس لە كوردستان.
مەریوان و ئاراس پێماندەڵێن كە گروپی سێیەم لە ژنان لە كوردستان خاوەنی جەستەی خۆیانن. ئەم ڕاگەیاندنە ڕاست نیە.
لە عێراق و لە كوردستان لەباربردنی سكپڕیی تاوانە و ژنی ئەنجامدەر سزای یاسایی دەدرێت بەپێی ماددەی ٤١٧ لە یاسای سزادانی عێراق. 
لە ووڵاتێكدا كە ژن مافی كۆنترۆڵكردنی سیستەمی منداڵبوونی بەدەست خۆی نەبێت، كەواتە ژن خاوەنی تەواوەتی جەستەی خۆی نیە. ئەمەش ڕاستییەكی بابەتییە و لە 'ڕا' بەدەرە.
كەواتە ڕستە ڕاستەكە ئەمەیە: ژنان لە كوردستان خاوەنی جەستەی خۆیان نین. كەواتە ژنانی گروپی سێیەمیش كە مەریوان و ئاراس دەستنیشانیانكردوون، خاوەنی تەواوەتی جەستەی خۆیان نین.

بەڵام پرسیارەكە لێرەدا ئەوەیە كە بۆچی ئەم ناڕاستییەیان كردۆتە بناغەی نووسینەكەیان؟ 
لەناو مەتنی ووتارەكەی مەریوان و ئاراسدا خستنەڕوویەكی تێروتەسەل هەیە لەبارەی چۆنیەتی كۆنترۆكردنی جەستەی ژن لەلایەن هێزگەلی دەرەوەی ژن و بەو پێیەش پاشكۆكردنی ژن و ئیستیغلالكردنی لەناو كۆمەڵی كوردیدا لەلایەن هزری پیاوباڵایی و ئایینی و دەستەڵاتی مەعریفی و كۆمەڵایەتییەوە. لەم ڕووەوە، ئەوەی خستوویانەتەروو هەمووی سەرنج و شیكاریی یەكجار ورد و گرنگ و دروست و بەسودن و لەسەدا سەد لەگەڵیاندام. ئەگەر مەریوان و ئاراس بەتەنها سەرنجەكانیان لەچوارچێوەی ڕەخنەكردنی ئەو دۆخ و ژینگەیەدا بهێشتایەتەوە كە ئەو ژنانەی گروپی یەكەم و دووەمی كردووە بە قوربانی، ئەوا من ئەم نوسینەم نەدەنووسی. 
بەڵام ئەوان لە ڕەخنەكردنی ژینگە و دۆخەكەوە بازیانداوە بۆ ڕەخنەكردنی ئەو ژنانەی كە حیجابیانكردووە و جوانكاریی دەكەن و بوونەتە مۆدێل. بەڵگەش ئەوەیە كە لە كۆتاییدا گروپی سێیەم دەهێننە ناو بابەتەكە و پێماندەڵێن كە دەبێت تەنها بەرگریی لە گروپی سێیەم بكەین. لەم فەتوایەیانەوە دەردەكەوێت كە مەریوان و ئاراس ژنانی گرووپی یەك و دوو یەكساندەكەن بەو ژینگەیەی كە تیایدا هەڵدەسوڕێن، و كاتێك ئیدانەی ژینگەكە دەكەن (كە كارێكی ڕەوایە) بازدەدەن و ئیدانەی ژنەكانی ئەو ژینگەیەش دەكەن (كە ناڕەوایە). لێرەدا پرسیارەكە ئەوەیە بۆچی مەریوان و ئاراس لە ڕەخنەكردنی جەلادەوە پەڕیوونەتەوە بۆ ڕەخنەكردنی قوربانی؟ 

بەگوێرەی خستنەڕووەكانی خۆیان، ژنانی گروپی یەكەم و دووەم قوربانیین و ئەم دوو نووسەرە داكۆكیكارە لە مافی ژن چۆن هێرشدەكەنە سەر قوربانییەكان و تێكەڵیاندەكەن لەگەڵ ئەو دۆخەی كە ئەو ژنانەی كردووە بە قوربانی؟
ئینجا لەسەر بنەمای گریمانەیەكی ناڕاستەوە، دەچنە سەر قسەكردن لەسەر ئازادی و ئازادیی بڕیار و ئازادیی هەڵبژاردن و دواجاریش تەحریمكردنی بەرگریكردن لە هەڵبژاردنەكانی گروپی یەكەم و دووەمی ژنان و ژنەكان خۆشیان، ئەمەش چەند گرفتێك دروستدەكات:
یەكەم: لەناو ئەم ووتارە فەتوائاسایەی ئەم دوو نووسەرەدا تەنزێكی شاراوەی ترسناك هەیە كە پێماندەڵێت: لەبەرئەوەی ئەو ژنە جەستە لێزەوتكراوانە ئازاد نین لە خاوەندارێتی جەستەی خۆیان، كەواتە هەڵبژاردنەكانیان ئازادانە نیین، و بەوپێیەش ناكرێت بەرگری لە 'هەڵبژاردنەكان'یان و خودی ئەو ژنانەش بكەین.
بێگومان لە نووسینەكەیانەوە ئەو پەیامە شاراوە چەوتەشمان پێدەدەن كە بەرگریكردن یەكسانە بە تەبەنییكردن. واتە ئەگەر كەسێك بەرگری لە ئازادیی هەڵبژاردنی كەسێك یان گروپێكی دیكە كرد، واتە ئەو كەسە ئەو هەڵبژاردنەی پەسەندە. ئارگیومێنتەكەی ئەم دوو نووسەرە (و زۆرێكی هاوشێوەیان) دەیەوێت وەهای پیشانبدات كە ئەگەر یەكێك بەرگری لە مافی حیجابكردن بكات، كەواتە ئەو كەسە خوازیاری كۆیلەكردنی ژنە؛ ئەگەر یەكێك بەرگری لە مافی ژنێك بكات كە جوانكاریی دەكات و لایەنی جنسی خۆی دەردەخات، ئەوا ئەو بەرگریكردنە برەودانە بەو كردارە؛ بۆ نمونە ئەگەر یەكێك بەرگری لە زەردەشتییەكان بكات بۆ مومارەسەكردنی ئازادانەی دینەكەیان، واتە ئەو كەسە برەودەدات بە بڵاوكردنەوەی زەردەشتییەت. (وابزانم بیرۆكەكە روونبووەوە).

ئەم تێگەیشتنە تێگەشتنێكی چەوتە و لە دواجاریشدا هەزەلییە و بەرمەبنای تێنەگەیشتنە لە خودی بەرگریكردن لە ئازادیی هەڵبژاردن. لە كوردستان بەردەوام گوێمان لە گوتاری ئەم تێگەیشتنە هەڵەیە دەبێت، و ئێستاش مەریوان و ئاراس هەمان گوتار دووپاتدەكەنەوە. 
لەوەش مەترسیدارتر، پێشمەرجێكی ترسناك و دژەئازادی دەخرێتەڕوو ئەویش ئەوەیە كە تەنها مرۆڤی ئازاد و خاوەنداری جەستەی خۆی دەتوانێت بڕیاری ئازادانە بدات لەبارەی جەستەی خۆی، و ئەوانەی تر بڕیارەكانیان هەمووی پووچن، و بەرگریلێكردنیان هەڵەیە. ئەگەر گریمانەی ئەم قسەیە ڕاستیش بێت، دەرئەنجامەكەی چەوتە. ئەوان نایانەوێت لەوەتێبگەن كە كاتێك بەرگری لە مافی ژنێك بۆ حیجابكردن دەكەین، لە راستیدا بەرگری لە مافی ژنێكی دیكەش دەكەین بۆ لابردنی حیجاب.

لەسەرەتادا روونمكردەوە كە لە كۆمەڵی كوردیدا هیچ ژنێك خاوەنی تەواوەتی (رەهای) جەستەی خۆی نیە، كەواتە بەگوێرەی لۆجیكی ئاراس و مەریوان، هیچ هەڵبژاردنێكی ژنانی كورد مایەی بەرگریلێكردن نیە.
دووەم: جوداكاریی لەنێوان گروپەكانی ژناندا لەسەر بنەمایەكی ئایدیۆلۆجی كە مەریوان و ئاراس، بەشێوەیەكی هەڵە، دووانیان بێبەشدەكەن لە مافی بەرگریلێكردن و بۆ سێیەمییان ڕەوایدەكەن، كە لە ڕاستیدا گروپی سێیەمیش لەڕووی ئەو پێوەرەی ئەوان دایانناوە بۆ ئەو پێشمەرجە، كە خاوەندارێتی جەستەیە، جیاوازییان لەگەڵ گروپی یەكەم و دووەمدا تەنها لە دەرجە خاوەندارێتییەكەدایە نەوەك لە هەبوونیدا. لەباشترین حاڵەتدا لەوانەیە گروپی سێیەم بە چەند دەرەجەیەك زیاتر لە گروپی یەكەم و دووەم، خاوەنی جەستەی خۆی بێت، بەڵام خاوەنداریی تەواوەتی نیە. بەڵام ئەمە بناغەی ئارگیومێنتەكەی مەریوان و ئاراس نیە. لە ووتارەكەی ئەواندا جیاوازی لەنێوان هەبوون و نەبووندا كراوە، نەوەك پلەكانی هەبوون.

سێیەم: بەرگریكردن لە ئازادی 
مەترسیدارترین تەنزی ووتارەكەی مەریوان و ئاراس بریتییە لە حەرامكردنی بەرگریكردن لەو هەڵبژاردنانەی ژنان كە بەلای ئەم دوو نوسەرەوە بەرمەبنای ئازادی نین و حەڵاڵكردنی بەرگریكردن تەنها لەو گروپەی كە خاوەنی جەستەی خۆیەتی. بەگوێرەی لۆجیكی نوسینەكەیان، مەریوان و ئاراس مەرج دیاریدەكەن بۆ 'ئازادیی هەڵبژاردن' و بەرگریكردنیش لەو ئازادییە سنورداردەكەن بۆ دەستەیەك، نەوەك بۆ گشت. 
ئارگیومێنتەكەیان لەگەڵ ئەوەدا كە ناڕاستە، مەترسییەكی دیكەشی هەیە، ئەویش ئەوەیە كە گروپە ئایدیۆلۆجیستە دژە ژنەكانی دیكە دەتوانن بیقۆزنەوە بۆ داكۆكیردن لە سەركوتكارییەكانیان بەرامبەر بە ژنان. بۆ نمونە هێزە ئیسلامییەكان دەقاودەق هەمان ئەم ئارگیومێنت و میكانیزمەی مەریوان و ئاراس بەكاردەهێنن و دەڵێن ژنی سفور ئازادانە بڕیارینەداوە و ناكرێت بەرگریلێبكرێت و دەبێت تەنها بەرگری لە ژنی حیجابكردوو بكرێت چونكە 'تەنها ژنی حیجابكردوو لە ئازادی ڕاستەقینە تێگەیشتووە'. یاخود دەستەڵاتی سیاسی هەمان ئارگیومێنت بەكاردەهێنێت بۆ قەدەغەكردنی بەرگریكردن لەوانەی دژی دەستەڵاتەكەیین.

تێگەیشتن لە ئازادی
ئازادی لەلای كورد یەكێكە لەو چەمكانەی زۆرترین هەڵەتێگەیشتن لەبارەیەوە هەیە. بۆ نمونە ئازادیی هەڵبژاردن/بیركردنەوە/بڕیاردان بریتی نیە لە ڕێبازێك/ڕێگەیەك/بەرنامەیەك بۆ كردنی شتی باش یان باشترین. 
بەڵكو ئازادی بریتییە لە ژینگەیەك كە تیایدا مرۆڤ بتوانێت هەڵە بكات. ئازادی بوار و كایەیە، نەوەك بەرنامە و پرۆگرام و مەزهەب. كاتێك تاكەكەسەكان ئازادبن لە هەڵبژاردن و كرداركردندا (بەبێ زیانگەیاندنی جەستەیی ئەوانیتر و پێشێلكردنی مافی ئەوانیتر)، ئەوكات كۆمەڵ بەتێكڕا دەتوانێت زامنی ئەوەبكات مافی هیچ كەس پێشێلناكرێت و هیچ كەس سەركوت و دەمكوتناكرێت. هەر لەناو ئەو ژینگەیەشدا تاكەكەسەكان دەتوانن مومارەسەی ژیانی خۆیان بكەن بەمەرجێك زیانی جەستەیی بە كەسانی دیكە نەگەیەنن و مافیان زەوتنەكەن. بەرگریكردنیش لە ئازادیی كەسەكان لە هەڵبژاردنی ئەو شتانەی بەلای خۆیانەوە باشن، تەنانەت ئەگەر ئەو هەڵبژاردنە لەلای هەندێك باشیش نەبێت، بناغەی سەرەكی فەراهەمبوونی ئەو كایەی ئازادیەیە. بێبەشكردنی گروپێك لە مافی بەرگریلێكردن بەهەرپاساوێك بێت بێجگە لەوەی تێنەگەیشتنە لە خودی ئازادی، دژایەتیكردنی ئازادییە و دەبێتە مایەی بەرتەسككردنەوەی ئازادی و ماف. 

یەكێكی دیكە لە هەڵەتێگەیشتنەكان بریتییە لە یەكسانكردنی ئازادی هەڵبژاردن لەگەڵ هەڵبژاردنی راستترین بژارە. ئەمەش مەترسیدارە لەبەرئەوەی چەمكی 'ڕاست' یاخود 'بژارەی ڕاست' پاساودەدات بە سەركوتكردنی كەمینە لەلایەن زۆرینەوە، یاخود سەركوتكردنی خەڵك لەلایەن دەستەڵاتی ستەمكارەوە. كاتێك زۆرینەی خەڵك، یاخود دەستەڵاتی ستەمكار، پێناسەیەك بۆ چەمكی "ڕاست" بە جۆرێك دەكەن كە خۆیان دەیخوازن و سنورەكانی دیاردەكەن، لە ئەنجامدا هەموو ئەوانەی دەرەوەی پێناسەكەی خۆیان بە 'ناڕاست' دادەنێن و شەرعیەتیش دەدەن بە سەركوتكردنی هەڵاوێردكراوەكان. ئەو شەرعیەتدانە مەرج نیە ڕاستەوخۆ بانگەشەی سەركوتكردن بكات، بەڵكو دەشێت هاندەر و ڕێگەخۆشكەری بێت، یاخود بێدەنگبوونبێت لە ئاست پێشێلكارییەكاندا، كە دواجار ستەمكاریی لێدەكەوێتەوە.
مەریوان و ئاراس هەمان ئەم كارەیان كردووە لەم ووتارەیاندا. ئەمان وەسفەیەكیان داناوە یاخود پێناسەیەكیان كردووە بۆ ئەوەی كە لای ئەوان 'ڕاستە' و شایەنی بەرگریلێكردنە؛ لەبەرامبەردا ئەوەی دیكەیان بێبەشكردووە لە مافی بەرگریلێكردن لەبەرئەوەی بەڕای ئەوان 'ناڕاستە'. پێدەچێت مەریوان و ئاراس (زۆر كەسانی تریش لە كۆمەڵی كوردیدا) ئازادی و ئازادیی هەڵبژاردن وەك ئیمتیاز تەماشابكەن نەك وەك ماف. 

لە تەحریمكردنی بەرگریكردنەوە بەرەو سەركوتكردن
تەنزێكی مەترسیداری ئەو ووتارەی مەریوان و ئاراس پێماندەڵێت كە بەرگریكردن لە گروپی یەكەم و دووەم ناجائیزە و تەنها بەرگریكردن لە گروپی سێیەم ڕەوایە. پاساوەكەشیان ئەوەیە كە گروپی یەكەم و دووەم هەڵبژاردنەكانیان ئازادانە نەكردووە. پرسیارەكە لێرەدە ئەمەیە: ئەگەر قسەكەی ئەو دوو نووسەرە بە ڕاست وەربگرین، كەواتە بەرگریكردن لە هەڵبژاردنەكانی ئەو ژنانە كارێكی خراپە. و لێرەوە ئەمان لە بواری ئازادییەوە دەچنە ناو بواری بەهاوە، واتە باش و خراپ؛ بەواتەیەكی دیكە دەچنە پانتایی الامر بالمعروف و النهی عن المنكر.
پرسیاری گرنگ ئەمەیە: لەئەگەری بەڕاستدانانی ئارگیومێنتەكەی مەریوان و ئاراسدا: ئایا زیانی گشتیی بەرگریكردن لە ژنانی گرووپی یەكەم و دووەم بەبەراورد بە زیانی گشتیی سەركوتكردنی ئەو دوو گروپە لەكاتی بەرگرینەكردن لێیاندا، كامیان زیانی زیاترە؟ 

لە تێكڕای گشتیدا یاخود لە دەرئەنجامی كۆتاییدا (ئەگەر مەریوان ئاراس سەد لە سەدیش ڕاست بن لەبارەی بەهای كردارەكانەوە) بەرگریكردن لە هەڵبژاردنێكی ئەنجامدراو لەسەر بنەمایەكی چەوت و هەڵە هێشتا مەترسیی و زیانەكانی كەمترن لە بەرگرینەكردن لە هەمان ئەو هەڵبژاردانانە. لەبەرئەوەی لە ئەگەری یەكەمدا (بەگوێرەی ئەوان) هەڵبژاردەی چەوت بڵاودەبێتەوە، بەڵام لە ئەگەری دووەمدا ئازادیی هەڵبژارن و ئازادیی دەربڕیین زەوت دەكرێن. ئەگەر ئەم دۆخە بەراوردبكەین بە جەستەی مرۆڤێك، ئەوا لە ئەگەری یەكەمدا وەك ئەوە وایە ئەو جەستەیە تووشی هەوكردنێك بووبێت كە ئەگەری چارەسەری هەیە و لە ئەگەری دووەمدا ئەو جەستەیە تووشی شێرپەنجەیەكی كوشندە دەبێت.

شەڕی من لەسەر فراوانكردنی ئازادییە نەوەك بەرتەسككردنەوەی. دڵنیام مەریوان و ئاراسیش هەمان بانگەشە دەكەن. بەڵام جیاوازیی هەڵوێستی من لەگەڵ ئەوان لە ووشەی "بەڵام"دایە. ووتارەكەی ئەوان دەڵێت لەگەڵ ئازادیداین بەڵام دەبێت بەگوێرەی ئەو مەرجانەبێت كە لە ووتارەكەدا خراونەتەڕوو. منیش دەڵێم دەبێت بواری ئازادیی دەربڕیین و هەڵبژاردن و مومارەسەكردن فەراهەمبێت و خەڵك لەناو ئەو كایەیەدا هەڵبژاردنی ڕاست و هەڵەی خۆیان بكەن و لەهەڵەكانەوە فێرببیین.

بیری دەستەگەرایی و ئایدیۆلۆجی پێیوایە هەموو ڕاستی و باشی و چاكەكان بەشێوەیەكی ڕەها لەلای خۆیەتی و پێوەرە ڕەهاكەی خۆی دیاریدەكات كامە باشە و كامە خراپە. ئەم بیركردنەوەیە هەمان بیركردنەوەی دیینە. پیاو و گوتاری دیینی پێماندەڵێن: ڕێگە ڕاستەكە ئەمەیە و دەبێت پێڕەوی بكەن چونكە ڕێگەكانی دیكە چەوتن. 

بەڕای من پێویستە لێگەڕێین بوار هەبێت بۆ هەمووان بۆ ژیانكردن و پێگەوەژیان. ئەم تەحریمكردنی بەرگریكردنە لە حیجاببوون و مۆدێلبوون هیچ جیاوازییەكی نیە لەگەڵ تەحریمكردنی ئازادیی ژن بۆ خوێندن و خۆشەویستی و سێكسكردن و هەڵبژاردن و بڕیاردان و ژیانكردن. ئەمانە دوو دیوی هەمان دراوی دژە ژن و دژە ئازادیین.

تێبینی: لەم نوسینەدا 'ژن' وەك زاراوە بەكارهێنراوە بۆ وەسفكردنی نیوەی كۆمەڵ و 'كچ' تەنها بۆ ئەو ژنانەیە كە تەمەنیان لەخوار ١٨ ساڵەوەیە، ئەم بەكارهێنانەی زارەوەی گشتیی 'ژن' بۆ رەتكردنەوەی ئەو جیاكاردنەوە سیكسیستیانەیە كە لەناو زمان و كلتوری كوریدا هەیە و ژن لە كچ جودادەكاتەوە لەسەر بنەمای پێشتر سێكسكردن. بەكارهێنانی یەك زاراوە بۆ لەخۆگرتنی هەموو نیوەی كۆمەڵ گرنگە بۆ پرسی ئازادی ژن و دوركەوتنەوە لە سێكسیزم.