بۆچی تاكو نەگاتە (100,000$)نایفرۆشم؟!

23/02/2021

گۆران دوكانی - ئەمریكا
بیتكۆین نرخی گەیشتە سەروی (56,000$)دۆلار، لەگەڵ ئەوەی هەرگیز ئەو هەلە ئاڵتونیەی ساڵی (2008)دووبارە نابێتەوە بۆمن كاتێك هاوڕێیەكم ڕجای دنیای لێ كردم تەنها بایی (100$)بیتكۆین بكڕم كەئەوسا نرخی تەنها (2 سەنت) بوو ئەیكردە (50.000) بیتكۆین، بەنرخی ئێستا ئەو (100$)دۆلارە ئەیكردە (2.800,000,000$)دوو ملیارو هەشت سەد ملیۆن دۆلار.
 بەڵام وەك هەندێك كەس كەپەند لەڕابردوو وەردەگرن هەوڵمدا ئەو هەڵەیە ڕاستكەمەوە بۆیە لەنرخی (28,000$) شتێكم لێ كڕی (ئەگەرچی درەنگیش كەوتم بەلام ئەمرۆم بەباشترزانی لەبەیانی!) بەڵام بڕیارە قورسەكەم ئەوەیە تاكو نەگاتە (100,000$)هەزاری ڕێك نایفرۆشم!باكیشم بەوە نیە هەرئێستا نرخەكەی وەك ساڵی (2008)ببێتەوە بە دوو سەنت چونكە وەك هەندێك خەڵكی نەزان نەچووم هەموو سەرمایەكەم بخەمە بیتكۆینەوە!، بەڵام هاوكات چێژ لە سەركێشیش ئەبینم، (هەندێجار) ژیان بەسەركێشیەوە تاموچێژی تایبەتی هەیە.

وەك كارێكی ئەخلاقی هەر ئەوەندەشم لەسەرشانە جارێك تادووجار شتە باشەكان بەئەزیزانی چواردەورم بڵێم، ئیتر لەوەزیاتر ئامادەنیم كاتی خۆم بەهیچ كەسێك ببەخشم.

ئێستاش ئەمە بۆ پەبڵیك ئەڵێم: (كە بێگومان یەكەم و ئەخیر جارە لەسەر بیتكۆین بیڵێم):
گومانی تیانیە كەبیتكۆین بەرزو نزم دەكات بەڵام دواجار لەبەر ئەم هۆكارانەی خوارەوە هەموو ئاماژەكان پێمان دەڵێن داهاتوی بیتكۆین لانیكەم (100,000$)دۆلارە! (بەشیكاری خۆم، خۆڕەنگە پێچەوانەی شیكاریەكەی من دەرچێت)!:
یەكەم: تەواوی دەوڵەمەندو حكومەتە زلهێزەكانی جیهان نەیانتوانی بەر بەم شۆڕشە بازرگانیە ئەلیكترۆنیەی سەردەم بگرن (كە لەهەموانەوە بۆ هەموانە)!

دووەم: پشتیوانی كردنی بیتكۆین لەلایەن دەوڵەمندترین پیاوی جیهان (ئیڵان ماسك) پیاوی تێسڵاو! پیاوی ناسا!

سێیەم: بەشێك لەو كۆمپانیا زلهێزانەی كە لەسەرەتادا دژایەتیان دەكرد بەڵام كەبوە ئەمری وەقیع دانیان پیاناو بڕیاریاندا مامەڵەی پێوەبكەن، وەك بڕیاری ئەم هەفتەیەی هەردوو كۆمپانیای (ئەپڵ و ماستەركارد)!

چوارەم: بەسەدان هەزاركەسی ئەمریكی ئەوانەی كەخاوەن كاری سەربەخۆن (self-employed) وەبەرهێنانی ئۆنلاینیان لە كریپتۆكەرەنسی و فۆرێكس و،..هتد كردوە، هەردوو ویلایەتی فلۆریدا و تەكساسی ئەمریكا باجی ساڵانەی ئەو هاوڵاتیانەیان لەڕێگەی بیتكۆینەوە قبوڵ كرد، (هەروەك بەشێك لەئابووری ناسانی ئەمریكا دەڵێن پێ دەچێت ساڵی ئایندە زۆرینەی ویلایەتەكانی ئەمریكا ئەوە قبوڵ بكەن مامەڵە بە بیتكۆینەوە بكەن).

ئەمانەو چەندین وردە هۆكاریتر ئاماژەن بۆ بەرزبونەوەی نرخی بیتكۆین لەداهاتودا، تۆش ئازادیت لەوەی وەبەرهێنان و مامەڵە لەگەڵ ئەم دراوە ئەلیكترۆنیەی سەردەمدا بكەیت، وەئازادی لەوەش وەك جاران فشەت پێی بێت!، بەڵام ئەگەر ویستت وەبەرهێنان بكەیت تكایە..تكایە سەرەتا خۆت فێركەو پارە مەخە دەستی هیچ كەسێكەوە با سلێمان هەڵشۆییەكی تر دەستت ماچ نەكات، ئینجا بەكەمترین بڕە پارەش بەشداری بكە (با لە %5 كەمترو لە %20ی داهاتەكەت زیاتر نەبێت!)..