سوڵتانی سەودا

2 مانگ پێش ئێستا

هاوڕێ توانا
هێندێك دیكتاتۆر هەن خاوەن پرەنسیپ و سەوابتی نەگۆڕن، ئەگەر سەر و كورسی خۆشیان بدۆڕێنن سەودا بە سەوابت و پرنسیپەكانی خۆیان نەكەن.
ئەم دیكتاتۆرانە لەپۆلی دیكتاتۆری (وەتەنین) هەرچەند دیكتاتۆر وخۆسەپێن بن، بەڵام هێشتاش گرێدراوی كۆمەڵێك لەبەهاو قیەم و مۆڕاڵی تایبەتن.

ڕەجەب تەیب ئەردۆغان ئەگەر تیلەچاوێك پانۆڕمای بە هەنگاو هەڵوێستەكانیدا بگێڕیتەوە، ئەم كاركتەرە (پراگماتیستە) هیچ نەگۆڕێكی نیە نەگۆڕدرا بێت و هیچ بە هایەك نیە بۆ بەردەوام بوونی بێ بەهای نەكردبێت، ئەم كاركتەرە كە لە نۆستالیژیایی خەلافەتی عوسمانیدا دژی و خەون و خەیاڵی فراوانخوازیەكانی محمد فاتیحی لە زهنیەتدایە، بەڵام هەركاتێكیش سەودایەكی بۆ قایمكردنی پێگەكەی هاتەپێشەوە، بێ ڕەچاوكردنی هیچ بەها و قیەمێك هەڵوێست و هەنگاوی ناوە.

ئەم كاركتەرە دیماگۆجیە سەرەتای دەركەوتن و سەركەوتنی خۆی و پارتەكە وەك سەرۆك وەزیران، هەستا بە ختوكەدانی هەستی میلەتان و دەوڵەتانی ئیسلام نشینین، ئەردۆغان وەك دەم ڕاستی جیهیانی ئیسلامی خۆی وێنا دەكرد، دەنگی بەسەر شیمۆن پێرێزدا بەرز دەكردەوە، ئیدی گوایە ئەو لەمەودوا نوێنەرایەتی خەڵك و خاكی ئیسلامی دەكات و لە سعودیاش شیری ئیسلامی پێ بەخشراو وێنەكانی چەشنی پاڵەوانێك لەگردبوونەوەكانی فەلستین بەرزدەكرایەوە!

ساڵ هات و ڕۆیشت ڕۆژ بەڕۆژ غایەی ئەم كاركتەرە ئیستعرازی و تەمسیلكارە باشتر ڕوون بویەوە، ڕاپەڕین و بەهاری (عەرەبی) و خوێناوی بوونی ڕاپەڕینەكانی سوریا و لیبیا دەركەوتنی داعش، ڕووداوگەلێك بوون كە ماهیەتی ئەردۆغانی بەڕووتی دەرخست، سپۆنسەركردنی داعش و بە ترانزێتكردنی فرگەكانی بۆ (جیهادیستەكانی )وڵاتان و گواستنەوەیان بۆ (دارلئیسلام ) و (خەلافەتەكەی ) بەغدادی و هەم تەمویلكردن و تەوجیهكردنی بەرەی نوسرە ئەحڕار شام و هەروا گروپگەلی هاو فیكری تر بۆ زیاتر خوێناوی كردنی هەردوو وڵاتی عێراق و شام بەو هۆیەوەش و ئاوارە كەوتنی خەلكی سڤیلی و كۆچكردنیان بۆ وڵاتانی خۆرئاوا ڕێگریەكانی سوڵتان بە زەبری باج لێسەندنی لە وڵاتانی یەكێتی ئەوروپا ئیدی هەموو كەیسەكان پێكەوە بوونە كارتی سەودا و مامەڵەی سوڵتان.

بنۆڕن كەچۆن چەكداری موڕتەزیقەی (ئۆپۆزیسیۆنی) سوری ڕەوانەی لیبیا دەكات و لە تڕابلس بەكوشتیان دەدا و كاتێكی تر ڕەوانەی ئازەربیجانیان دەكات دژی ئەرمینیا، بێشك مامەڵەی نا مۆڕاڵیانەی سوڵتان بە خۆێن و گیانی گەلان ناوەستێت هەر ڕۆژە مامەڵە بە كەیسێك و میلەتێكەوە دەكات تەنها بەخاتری ڕاگیركردن و مانەوەی خۆی لە دەستەڵات و مێنتاڵیەتی فراوان خوازیەكانی.