سۆشیال میدیا و لێكەوتەكانی لە سەردەمی تەكنەلۆژیادا

2 مانگ پێش ئێستا

كاروان جلال بەگ
سۆشیال میدیا بوەتە بەشێكی گرنكی ژیانی تەواوی مرۆڤایەتی هەم خزمەتێكی زۆری كردوین، هەمیش كێشەی زۆری بۆ ئەفراندوین.
دەشێ بێژین ئێستا و داهاتوو رەنگە ژیانی بێ سۆشیال میدیا بچێتە قالبی مەحال، بۆیە كاتێك دەزانین مرۆڤ وسۆشیال میدیا ئاوێتەی یەكتری بوون، پێویستیمان بە رێكخستن و چۆنیەتی بەكارهێنانی ئەو زەروریەتە هەیە بە جۆرێك ئەگەر بێ زیانیش نەبێ، هەولبدەین سودەكانی زێدە تربن.

لەسادەترین پێناسەدا، سۆشیال میدیا ئەو جۆرە لە میدیایە كە چیتر خودی خۆی بە تەنها قسە ناكات، و جیاواز لە میدیا باوەكانی وەك رادیۆ و تەلەڤزیۆن و میدیای چاپكراو رێگە بە خەڵك دەدات ببن بە بەشێك لە بەهای ناوەڕۆكی ئەو زانیاریەی، كە سۆشیال میدیا بڵاویدەكاتەوە.

لە سۆشیاڵ میدیادا هەم دەزگا فەرمییەكان و هەم خەڵكیش دەتوانن ئازادتر بدوێن و بە ستایلی جیاواز بنووسن و بڵاوبكەنەوە، سەرمایەی مادی یان رەمزی ؟ جیهانی مرۆڤایەتی دابەش بوە بەسەر دوو بەش . 
بەشی یەكەم پێیان وایە سەرمایەی مادی پێگە و هێزی كەسەكان دیاری دەكات، واتا دواجار مرۆڤ كاتێ خاوەنی سەرمایەی مادی بێت هەموو شتێك بۆی مەیسەرە، لە هەموو یاریەكان براوەیە!
بەشی دووەم پێیان وایە نەخێر سەرمایەی مادی ناتوانێ هێندەی سەرمایەی رەمزی كاریگەری هەبێت، لەبەر ئەوەی ئەو كەسانەی بەهۆی سەرمایەی مادی پێگەیشتوون لەگەل نەمانی كۆتاییان دێت، بە پێچەوانە سەرمایەی رەمزی زەمەن و شوێن و سنوورەكان تێكدەشكێن و بۆ هەمیشەی دەمێنێتەوە.

ئایا ئێمە سۆشیال میدیا بۆ كام سەرمایە بەكاردێنین؟ 
ئاشكرایە سنوور بۆ حەز و خواستەكانی مرۆڤ نیە، هەمیشە هەول بۆ باشترینەكان دەدات، زۆر جار بۆ ئەم مەبەستە هەنگاوی هەلە و رێگای نا رۆشن دەگرێتە بەر ! لە جیهاندا زۆرن ئەوانەی لە رێگەی سۆشیال میدیا دەركەوتوون و ئێستە خاوەن نێو بانگ و كاریگەرین لەسەر ئاستی نێودەولەتی، جا چ بە سەرمایەی رەمزی بێت یان مادی، لە هەمبەردا كەم نین ئەوانەی بونەتە قوربانی سۆشیال میدیا.

ئەفلاتۆن دەڵێت : كەسی نەزان دەست بۆ هەرشتێك ببات خراپی ئەكات ،، ئێمەی كورد وا را هاتووین زوو لەگەل باروودۆخەكان ئەگونجێین بەهۆی ئەوەی مێژوومان تەژیە لە رووداوی هەمە چەشن، دوای هاتنی تەوژمی تەكنەلۆجیا هەر زوو بەبێ بوونی رۆشنبیری بەكارهێنانی قۆل و باسكمان لێی هەلكرد، كاتێك زانیمان لە نێو گێژاوێكین خەریكی نقوم بونین لە نێو زیان و خراپ بەكارهێنانی میدیا و سۆشیال میدیا ! رەنگە زۆر جار ئەوە بكرێتە پاساو ،، هەموو كۆمەلگەو نەتەوەكانی تر بە قۆناغی ئێمە تێپەرێوون،، ئەمە تا رادەیەك راستە لێ باشتر وایە ئێمە ئەو هەلەیەمان نەكردایە.

بەكارهێنانی سۆشیال میدیا بۆ پێگەیاندنی كەسانی مشەخۆر و جنێودەر بۆ مەرامی كەسی و حزبی كە دەست بۆ هەموو پیرۆزییە كەسی و گشتیەكان درێژ دەكەن كارەساتێكە لە داهاتوو باجەكەی زۆر بە قورسی دەدەین ! ،،قسەیەك هەیە دەلێت مار كەسی دەست نەكەوێ بەخۆیەوە دەدات،، بۆیە پێویستە زوو پێشگیری لێ بكرێت، بەجۆرێك نەوەیەكی وا پەروەردە بكەین كار لەسەر گۆرینی تەواوی كۆمەلگە بكەن، دوا جار نێو و بانگی كورد وەكو نەتەوەیەكی خوێندەوار بدرەوشێتەوە ،، نەتەوەیی خوێندەوار هەرگیز ناكەوێ و هەمیشە زیندووە.

لە كاتێكدا ئێمەی كورد لە قۆناغی گەشەسەندن و هەنگاونانی بەرەو بەجیهانیبون و تێكەل بوون بە كلتورە جیاوازەكان، ئەمە جگە لەوەی ئاشكرایە لە ناوچەكە چارەی كوردیان ناوێ یان هەر كورد بوون هەر قبول نیە، پێویستیمان بە جیلێكی رۆشنبیر و خوێندەوارە تاكو كار لەسەر دۆزی لە مێژینەمان بكەن، میدیا بە گشتی و سۆشیال میدیا دەرفەتێكی زێرینە ئەگەر بمانەوێ بە باشی سوودی لێ وەربگرین بۆ مەسەلە نەتەوەیەكمان.

ئەگەر وا بكەین دەبین بە خاوەنی سەرمایەی رەمزی و مادی لە هەمان كاتدا جگە لەوەی بناغەیەكی تۆكمەی نەتەوەیەكی زیندوو دادەنێین و نزیكتر دەبینەوە لە ئامانجەكانمان .