جیلی نۆتێلاو ئایپاد و ناوبردنیان بە نەزان و دواكەوتوو!!

2 مانگ پێش ئێستا

سومەیە عەلی
سەرەڕای ئەو هەموو پێشكەوتن و گۆڕانكارییانەی كە لە بوارە جیاجیاكانی ژیانی مرۆڤدا ڕوویداوە و ڕۆژانە ڕوو لە زیادبوونە، هەرچەند لەم سەردەمەدا مرۆڤ زووتر و خێراتر دەتوانن گۆڕانكاریەكانی دوونیا ببینن ئەویش لە ڕێگەی سۆشیاڵ میدیاو پێشكەوتنی تەكنەلۆجیاوە، بەڵام كەم نین ئەو كێشە و گرفتانەشی ڕوبەروی تاك دەبێتەوە، بە تایبەت لەو تەمەنەی ئێستا بە جیلی ئایپاد و نۆتێلا ناودەبرێن!

سۆشیاڵ میدیا بە ڤایرۆسە مەزنەكەی سەردەم ناو ئەبرێت هەرچەند لە زۆر بواردا كار ئاسانی بۆ كردووین بەڵام هۆكاریشە بۆ زۆرێك لەو كێشەو گیرو گرفتانەی كە لە كۆمەڵگادا بوونی هەیە، بە جۆرێك بیر و هزری زۆرینەی گەنجی بەلاڕێدا بردووە و گرفتی گەورەی كۆمەلایەتی هێناوەتە ئاراوە و هەندێ جاریش دەبینیت ئەو كێشانە هەڵكشاوە تا رادەی خۆكوژی!

كێشەی ئێمە تێنەگەیشتن و پێنەگەیشتنە لەو پێشكەوتنانەی بەدیهاتون، سۆشیال میدیا لە شوێنی دیكە بۆ مەبەستی دیكە بەكاردێ، بەداخەوە هەندێك لە گەنجەكانمان سۆشیاڵ میدیا بەكار ئەهێنن وەك چەكێك بۆ هەرەشەكردن لە پێناو بەدەستهێنانی ئارەزوەكانیان یان بەدەستهێنانی بڕێك پارە و كارتێكی ئینتەرنێت... بیركردنەوەیان بە جۆرێكە هێشتا دركیان بەوە نەكردووە كە بەم ڕەفتارەیان ئاستی كەسایەتیان كەم دەكات..

گرفتێكی دیكەی سۆشیال میدیا كە ئێستا لە جیهاندا قسە و باس و توێژینەوەی زۆرتری لەسەردەكرێت، ئالودەبونە بە سۆشیال میدیا و دوركەوتنەوەیە لە ژیانی راستەقینە، ئەوەی دەبینرێت لێرە سۆشیال میدیا هۆكارێكە بۆ دوور كەوتنەوەی گەنج لە واقیعیەت و كۆمەڵگا، ئەگەر چاوێك بە ڕا بردوودا بگێڕین و بەدواداچونی بۆ بكەین سەرەڕای كەمی پێشكەوتن و نەبوونی تەكنەلۆجیاو سۆشیاڵ میدیا مرۆڤەكان ژیرتر و تێگەیشتوترو بەڕێزتر بوون.
تێڕوانینیان بۆ ژیان جوانتر و كێشەو گرفتی كۆمەڵایەتیان كەمتر بوو، جیلێك، كەمتر خوێندەوار بوون بەڵام ڕۆشنبیرتر بوون، ئێستا زۆر خوێندەواری كەم ڕۆشنبیرن، خوێندنەوەی كتێب بەئاستێكی زۆر دابەزیوە بەڕادەیەك لای هەندێك ئەگەر باسی كتێب خوێندنەوە بكەین گاڵتەمان پێ ئەكەن ئەڵێن بۆ باوی كتێب ماوە؟؟ 
لە كاتی گفتوگۆدا وتەیەك یان پارچە هۆنراوەیەك بڵێن پێمان ئەڵێن خۆت ڕۆشنبیر مەكە قسەی كتێب مەكە یان خۆت مەكە بە فەیلە سوف لێمان، بەجۆرێك ئەدوێن كە خوێندەوەی كتێب كارێكی هەڵەو خراپ بێت، بێ ئاگا لەوەی ئەو دونیای ئەوان تیای ئەژین خودی هەڵەكەیە، هەڵەی تاك بە تاكی گەنجەكانمان وگرفتە نەرێنی خراپەكانی كۆمەڵگا و دواكەوتووی گەنجەكانمان و دابەزینی ئاستی ڕۆشنبیریان هەمووی بەهۆی هەڵە باكار هێنانی تەكنەلۆجیاو سۆشیاڵ میدیاوەیە، ئەخوازم.

ئەمەیە گرفتی سەرەكی ئەو جیلەی بە نەوەی ئایپاد و نۆتێلا ناودەبرێن، بۆ چارەسەریش پێویستە دایكان و باوكان هۆشیارتربن و زیاتر ئاگاداری منداڵەكانیانبن لە كاتی بەكارهێنان و بەركەوتنیان بە سۆشیال میدیا و تۆڕی فراوانی ئینتەرنێت، چونكە منداڵەكانن ئەبنە نەوەی داهاتو، بۆ ئەوەی داهاتووش رۆشنتر بێت لە ئێستا، بۆ ئەوەی چیتر ئەم نەوەیە بە نەزان و دواكەوتوو وەسف نەكرێن،  با هەمووان هەوڵبدەین نەوەیەكی پێشكەوتوو و ڕۆشنبیر پێ بگەیەنین نەك دواكەوتوی بێ پەروەردەو ناڕۆشنبیر ..